Президенти Тоҷикистон чанд тан аз судяҳои вилояти Хатлонро “бо сабаби расидан ба синни ниҳоии дар вазифаи судя будан” аз мақомҳояшон барканор кард.
Бино ба иттилои расмӣ, 23-уми майи соли 2023 бар асоси як Фармони Эмомалӣ Раҳмон “Холматзода Сафаралӣ Қурбон аз вазифаи судяи суди вилояти Хатлон, Қодирзода Ҳасан Нурулло аз вазифаи судяи суди вилояти Хатлон, Муҳидинзода Сайфидин Салоҳ аз вазифаи муовини якуми раиси суди шаҳри Бохтари вилояти Хатлон бо сабаби расидан ба синни ниҳоии дар вазифаи судя будан” аз мақомҳои ишғолкардаашон озод карда шуданд.
Инчунин бар асоси як фармони Эмомалӣ чанд судя, аз ҷумла Садриддинзода Насрулло аз вазифаи раиси суди ноҳияи Ҷаббор Расулови вилояти Суғд ва Қодирзода Зафар Абдураҳим аз вазифаи судяи суди Вилояти Мухтори Кӯҳистони Бадахшон бо сабаби “содир намудани кирдоре, ки шаъну эътибори судяро паст мезанад,” аз мансабҳояшон барканор шуданд.
7-уми феврали соли 2020 тибқи як фармони раисҷумҳур, Садриддинзода Насрулло раиси суди ноҳияи Ҷаббор Расулови вилояти Суғд таъйин гардида буд ва пеш аз он дар вазифаи муовини раиси суди ноҳияи Спитамени вилояти Суғд машғул ба кор буд. Ва Қодирзода Зафар Абдураҳим бошад, то 22-юми декбари соли 2022 дар вазифаи судяи суди шаҳри Ваҳдат кор мекард. Тибқи бархе гузоришҳо, ҳар дуи ин судяҳо ба гирифтани пора ва сӯиистифода аз ваколатҳои худ муттаҳам мешаванд.
Кумитаи ҳолатҳои фавқулодда ва мудофиаи граждании Тоҷикитсон шаҳрвандони кишвар, аз ҷумла сокинони наздикӯҳӣ ва соҳилиро аз омадани селҳо ҳушдор медиҳад.
23-уми майи соли ҷорӣ КҲФ бо такя ба маълумоти Агентии ҳавошиносии кишвар иттилоъ дод, ки имрӯз ва фардо (рӯзҳои 24-25-уми май) “бар асари боронҳои пуршиддат сатҳи об дар рӯдхонаҳои Ёхсу, Қизилсу (ҷанубӣ) ва дарёҳое, ки аз қаторкӯҳҳои Ҳисор ҷорианд, боло меравад.” Бо назардошти ин вазъият КҲФ эҳтимоли омадани селҳо дар ноҳияҳои кӯҳии кишварро (ба истиснои шарқи вилояти мухтори Кӯҳистони Бадахшон) хеле қавӣ медонад.
Масъулони Кумитаи ҳолатҳои фавқулоддаи кишвар аз шаҳрвандон ва меҳмонони кишвар хостааст, ки давоми ин ду рӯз, ки хатари омадани селҳо хеле зиёд аст, “ба соҳили махзанҳои об нараванд ва ҳангоми ҳаракат бо роҳҳои кӯҳӣ эҳтиёт кунанд.”
Ҳамзамон Кумита сокинони кишварро ҳушдор медиҳад, ки дар ин рӯзҳо аз ҷамъоварии занбӯруғҳо, алафҳои дорувор ва ҳезум худдорӣ кунанд ва инчунин рафтан ба моҳидорӣ ва шикорро низ ба манфиат намедонад.
Нархи сӯзишворӣ дар Тоҷикистон боз ҳам гаронтар мешавад. Нарҳо дар ҳоли афзоиш буда, ҳар ҳафта то 20-30 дирам боло меравад.Дар ин бора “Азия-Плюс” бо такя ба манобеаш хабар дод.
Синон Уғон, номзад аз эътилофи OTO дар интихоботи президентии Туркия, ки рӯзи 28-уми май баргузор мешавад, аз Раҷаб Тайиб Эрдуғон ҳимоят мекунад.
Оқои Синонро, ки сиёсатмадори миллигарои ифротӣ мегӯянд, дар интихоботи прездинтии 14-уми майи соли ҷорӣ бо бадаст овардани 5,2% овозҳо дар мақоми сеюм қарор гирифта буд, 22-уми май дар нишасти матбуотие дар Анқара аз ин тасмимаш ба расонаҳо хабар дод.
Аксар таҳлилгарон бар ин назаранд, ки пуштибонии Синон Уғон, ки беш аз 2,8 миллиони овозҳоро соҳиб аст, аз яке ин ду номзад – Раҷаб Тайиб Эрдуғон ва Камол Қличдоруғлу метавонад нақши калидӣ дар интихоботи президентӣ ва онядаи кишвараш дошта бошад.
Гуфта мешавад, Синон Уғон пас аз он ки интихоботи президентии Туркия ба даври дуюм кашида шуд, ҳам бо эътилофи оппозитстюн ва ҳам бо эътилофи ҳизби ҳоким нишатсу гуфтугӯҳоро оғоз кард. Дар нияҳот ӯ рӯзи душанбе ба расонаҳо гуфт, эътилофи Қличдоруғлу натавонист ӯ ва тарафдоронашро қонеъ кунад.
Дар интихоботи президентии Туркия, ки рӯзи якшанбеи 14-уми майи соли ҷорӣ баргузор шуд, ҳеч номзаде натавонист аксарияти мутлақи ороро касб кунад ва бо ин сабаб интихобот ба даври дуюм гузашт.
Дар он Раҷаб Тайиб Эрдуғон аз эътилофи “Ҷумҳур” 49,52%, Камол Қличдоруғлу аз эътилофи “Миллат” 44,88%, Синон Уғон аз эътилофи ОТО 5,17% ва Муҳррам Инҷе, ки як рӯз пеш аз интихобот номзадияшро пас гирифт, 0,43%-и овозҳоро ба даст оварда буданд.
Имрӯз, 23-юми майи соли 2023 дар Тоҷикистон Рӯзи ҷавонон аст ва дар ҳама шаҳру ноҳияҳои кишвар бо баргузории чорабиниҳои гуногун аз он таҷлил мекунанд.
Эмомалӣ Раҳмони 70-сола, ки тамоми марказҳои қабули қарор ва манбаъҳои пурдаромади давлатро байни фарзандон, домодҳо, қудоҳо ва наздикону пайвандони худ тақсим кардааст, дар паёми шодбошии худ хитоб ба ҷавонон гуфт, шумо бояд “манфиатҳои давлативу арзишҳои миллиро ҳимоя кунед ва дар мубориза бо ҳама гуна таҳдиду хатарҳои бар зидди давлату миллати худ равонагардида омода бошед.”
Президенти Тоҷикистон, ки ба сурати ғайриқонунӣ беш аз се даҳсола инҷониб курсии президентиро муҳкам қапидаву ахиран ҳам бо қимати беш аз як миллиард сомонӣ барои худаш аз буҷаи давлат як ҳавопаймо харида аст, мегӯяд: “Мо ба ҷавонони бонангу номуси худ ва ба эҳсоси гарми ватандӯстии онҳо бовари бузург дорем, бо онҳо ифтихор мекунем, зеро онҳо воқеан соҳибону бунёдгарони ояндаи Ватан ва идомадиҳандагони кору фаъолияти созандаи мо ҳастанд.”
Эмомалӣ Раҳмон ҳамчун президенти амалкунандаи кишвар, ки бо гузашти 31 сол ҳоло ҳам ба ҳеҷ ваҷҳ розӣ нест, ки ба сурати қонунӣ курсии раёсати ҷумҳуриро ба касе дигар таҳвил бидиҳад, таъкид мекунад: “Мо ҷавононро бояд тавре тарбия карда, ба камол расонем, ки онҳо фардо тавонанд Ватан ва давлатро соҳибӣ кунанд, онро обод созанд, боз ҳам пешрафта гардонанд ва миллату давлати худро ба аҳли башар ба таври шоиста муаррифӣ намоянд.”
Дар ин муддати 31 сол ҳамарӯза ҷавонони кишвар мебинанд, ки дар раъси қудрат ҳеч гуна тағйироти калидие ба вуҷуд намеояд ва расман дар Сарқонуни кишвар ҳам таъкид шудааст, ки Эмомалӣ Раҳмон метавонад барои ҳамеша ва то вақте зинда аст, президенти кишвар боқӣ бимонад, чӣ гуна онҳо ин паёми Президенти Тоҷикистонро, ки таъкид карда “шумо бояд ҳушёру зирак бошед“, қабул кунанд ва дилгарм шаванд, ки оянадаи беҳтареро дар Тоҷикистон метавонанд барои худашон рақам бизананд?
