Вазорати тандурустӣ: 48 заҳролуд не, дилбеҳузур шуданд

Аз ҷониби

26/01/2023

Вазорати тандурустии Тоҷикистон баъди қариб 48 соат аз заҳролудшавии 48 нафар дар вилоят Хатлон ин ҳодисаро шарҳ дод.

Имрӯз, 26-уми январи соли 2023 Маркази матбуоти Вазорати тандурустии Тоҷикистон бо нашри як матлаб гуфт, “натиҷаи таҳлилҳои озмоишгоҳӣ нишон дод, ки шаҳрвандон ба ягон ҳолати заҳролудшавӣ мубтало нашудаанд. Танҳо истеъмоли аз ҳад зиёди равғани зард дар қурутоб боиси дилбеҳузурии шаҳрвандон гардидааст.“

Ба қавли манбаъ: “Ҳангоми ворид шудани беморон ба беморхонаҳо ҳолати беморон нисбатан қаноатбахш арзёбӣ гардида, дар миёни онҳо хушбахтона беморони вазнин набуд.” Аммо пеш аз ин гуфта мешуд, ки 24 нафар аз ин афрод, ки вазъи саломатиашон вазнинтар буд, ба Беморхонаи сироятии шаҳри Кӯлоб интиқол дода шудаанд.

Бо ин вуҷуд, дар шабакаҳои иҷтимоӣ аз ин шарҳи Вазорати тандурустиро аксари корбарон интиқод карда, қисме онро нишони камсаводии кадрҳои нолоиқи соҳаи тандурустӣ, ки мансабҳоро ишғол кардаанд, рабт додаву қисме дигар ин шарҳи вазоратро хиҷолатомез арзёбӣ кардаанд.

Корбаре бо номи Мирасил Мирзоев ин ҳамаро хато хонда гуфтааст: “Айбастее, наход дар ҳамин муддат як фарзияи дуруст бароварда нашуд, ин маънои онро дорад, ки ё мутахассиси соҳа надорем ё лаборатория таҷҳизот надорад…. Айби равған, о равған як нафар ё ду нафарро дилбеҳузурӣ мекунад ҳамаро неку ба фикрам…. Ҳама набошад аз як табақ истеъмол кардаанд!?… Як дурӯғи замини гӯянд намешавад...”

Аммо корбари дигаре бо номи Шаъмигул Муҳсинова таъкид мекунад: “Боз гуфтанд, ки намак мушкилӣ доштаст ку! Ман аз як табиби беморхонаи шаҳри Кӯлоб шунидам! Гуфт, намаки коркард нашударо истифода бурдаанд!”

Инчунин корбари дигаре ҳам бо номи Роҳбар Одинаев бо таассуфи зиёде гуфта, ки “агар ҳамин фарзияи хандаовар, ки гӯё истеъмоли зиёди равғани зард сабаби асосӣ бошадро, фарзияи асосӣ донанд, пас вой бар ҳоли медидцинаи мо…”

Вазорати тандурустии Тоҷикистон дар шарҳи ин ҳодиса меафзояд, “рӯзи 24 январи соли 2023 дар ҷамоати деҳоти Чаган, деҳаи Чагани нави ноҳияи Шамсиддин Шоҳини вилояти Хатлон соати 8-и субҳ пас аз истеъмоли хӯроки қурутоб 48 нафар сокини деҳаи мазкур дар худ дилбеҳузурӣ ҳис намуданд. Дар натиҷаи андешидани тадбирҳои зарурӣ 24 нафари онҳо ба Беморхонаи сироятии шаҳри Кӯлоб ва 24 нафари дигарашон ба Беморхонаи рақамии ҷамоати деҳоти мазкур бистарӣ гардиданд.”

Гапи Толибон ба Узбекистон гузашт

Аз ҷониби

amrullokhi

25/01/2023

Вазири корҳои хориҷии Толибон ба Узебикистон ҳушдор дод, ки ба қарордодҳои худ пойбанд бошад, ду рӯз пас Тошканд ваъда дод, ки дар муддати 24 соат уҳдадориҳояшро анҷом медиҳад.

Бино ба иттилои расонаҳои Афғонистон, Вазорати корҳои хориҷии Узбекистон ваъда додааст, ки имрӯз, 25-уми январи соли 2023 барқи содиротӣ ба Афғонистонро пас аз 11 рӯзи вақфа дубора интиқол медиҳад.

Рӯзномаи “Анис” чопи Кобул ҳам имрӯз, иттилоъ додааст, ки сокинони пойтахти Афғонистон ва чандин шаҳрҳои дигари ин кишвар, ки бо нерӯи барқи воридотии Узбекистон таъмин буданд, чандин рӯз аст, ки аз бебарқӣ ранҷ мекашанд.

Шабакаи “Ориённюс”-и Афғонистон ҳам ба нақл аз раиси ширкати барқи Кобул гуфтааст, иллати камбуди барқ “мушкилоти техникӣ” аст ва “яке аз мушкилоте, ки бо мо шарик шудааст, иборат аз чоҳҳои газ дар Узбекистон аст, ки аз он барои тавлиди нерӯи барқ истифода мешаванд.”

Пеш аз ин Амирхон Муттақӣ, вазири корҳои хориҷии Афғонистон ба Узбекистон ҳушдор дода буд, ки дар ин рӯзҳои сард ба қарордодҳояш дар хусуси интиқоли нерӯи барқ пойбанд бимонад ва сари вақт мардуми кишварро тибқи қарордоҳои имзошуда бо нерӯи барқ таъмин кунад.

Ба қавли ББС, Вазорати корҳои хориҷии Узбекистон ду рӯз пас аз ин ҳушдори вазири корҳои хориҷии Толибон ваъда додааст, ки ҷониби Тошканд дар муддати 24 соати оянда уҳдадориҳояшро пурра иҷро, барқи содиротии худ ба Афғонистонро дар ҳаҷми 256 мГв таъмин мекунад.

Ин дар ҳолест, дар ин фасли замистон ва сармои шадиде, ки минтақаро фаро гирифтаасту аксари сокинони кишварамон дар сардиву торикӣ ба сар мебаранд, Ҳукумати Тоҷикистон барқро ба ҳамсояҳояш Узбекистон, Қирғизистон ва Афғонистон мефурӯшад.

Толибон дар оғози январи соли ҷорӣ қарордодҳои харид ва интиқоли нерӯи барқи содиротии Узбекистон ва Тоҷикистонро ба Афғонистон барои соли 2023 аз нав имзо намуда, иҷроиши онҳоро як соли дигар тамдид карда буданд.

Гуфта мешавад, ин шабу рӯзҳо тамоми кишварҳои Осиёи Марказӣ ва ба хусус сокинони Тоҷикистону Узбекистон ва Қирғизистон аз камбуди нерӯи барқ ранҷ мекашанд. Ҳатто сокинони пойтахтҳои ин се кишвар бо камбуди нерӯи барқ мувоҷиҳ ҳастанд.

Бо ин вуҷуд, ба гуфтаи бархе коршиносон, пас аз ин ҳушдори Толибон ин эҳтимол вуҷуд дорад, ки ҷониби Узбекистон нерӯи барқи зиёдтаре бо нархи арзонтар аз Тоҷикистон мехарад ва бо баҳои қиматтар ба Афғонистон мефурӯшад. Бо ин роҳ ҳам фоида ба даст меорад ва ҳам ба уҳдадориҳояш дар баробари Толибон амал мекунад.

Амруллоҳи Низом

▶️Барномаи хaбарии ИМРӮЗ – 25.01.2023 | AZDА TV | برنامه ای خبری امروز اخبار تاجیکستان

Аз ҷониби

AZDA TV

25/01/2023

Баррасии интиқоли нафту гази Қазоқистон ба Тоҷикистон
Сафари раисҷумҳури Эрон ба Тоҷикистон
Сафари сарвазири Русия ба Тоҷикистон
Боз “мобилизатсия” дар Русия оғоз мешавад?

Боз “мобилизатсия” дар Русия оғоз мешавад?

Аз ҷониби

firuzihait

25/01/2023

Владимир Путин, раисҷумҳури Русия ҷорӣ намудани “мобилизатсия” ё басиҷи сарбозон ба артиш ва ҷалби даҳҳо ҳазор сарбозро баррасӣ дорад.

Тавре шабакаи телевизионии CNN дар истинод ба шахсони расмии Амрико ва Ғарб, ки “ба маълумотҳои иктишофӣ дастрасӣ доранд”, хабар медиҳад, Путин ин бор қасд дорад беш аз 200 ҳазор нафарро ба артишаш ҷалб кунад.

Бино ба иттилои CNN, мавҷи нави басиҷи сарбозон “оромтар” мешавад, зеро мақомоти Русия “аз эътирози оммавӣ ва оқибатҳои иқтисодии он нигаронанд”. Вале гуфта мешавад, то ҳол дар ин бора тасмими ниҳоӣ гирифта нашудааст.

Котиби матбуотии Президенти Русия Дмитрий Песков дар суҳбат бо ТАСС ин хабарро рад кардааст.

Аммо пештар Песков ҳамчунин иттилоъро дар бораи он ки Хадамоти федералии амнияти Русия аз 9-уми январ хуруҷи шаҳрвандони ба хидмати ҳарбӣ мувофиқро аз қаламрави Русия маҳдуд кардааст, рад карда буд.

Ёдовар мешавем, ки 11-уми январи соли ҷорӣ Сарраёсати истихбороти Вазорати дифои Украина эълом карда буд, ки Хадамоти федералии амнияти Русия ба тамоми ниҳодҳои марзбонӣ дастур додааст, ки хуруҷи шаҳрвандонро аз кишвар маҳдуд кунад.

Песков ин хабарро дурӯғ хонда буд. Аммо дар давоми як ҳафтаи охир дар фурӯдгоҳҳои Русия барои зодагони кишварҳои Осиёи Марказӣ, ки шаҳрвандии Русияро дарёфт кардаанд, тарки кишвар то 12-уми феврал мамнуъ шудаааст.

Сафари раисҷумҳури Эрон ба Тоҷикистон

Аз ҷониби

amrullokhi

25/01/2023

Иброҳим Раисӣ, Президенти Ҷумҳурии исломии Эрон бо сафари расмӣ ва даъвати Эмомалӣ Раҳмон ба Тоҷикистон меравад.

Бино ба иттиллои сомонаи Вазорати корҳои хориҷии Ҷумҳурии исломии Эрон, соли ҷории мелодӣ Иброҳим Раис, Президенти ин кишвар бо сафари расмӣ ба Тоҷикистон хоҳад рафт.

Ба қавли манбаъ, Сироҷиддин Муҳриддин, вазири корҳои хориҷии Тоҷикистон ҳангоми мулоқот бо ҳамтои эрониаш Амир Абдуллоҳиён дар Тошканд “изҳори умедворӣ” кардааст, ки тибқи барнома соли ҷории мелодӣ Иброҳим Раисӣ бо сафари расмӣ ба Тоҷикистон меравад.

Ин хабар дар ҳоле расонаӣ шуда, ки то ҳанӯз Вазорати корҳои хориҷии Тоҷикистон дар ин бора чизе нагуфтааст ва таърихи дақиқе барои анҷоми сафари Иброҳим Раисӣ ба Тоҷикистон то ҳол эълон нашудааст.

Гуфта мешавад, пас аз ба қудрат расидани Иброҳим Расисӣ дар Эрон муносибатҳои сарди Душанбеву Теҳрон нисбат ба гузашта гармтар шуд. Нахустин сафари хориҷии раиси ҷумҳури кунунии Эрон ҳам ба Тоҷикистон сурат гирифт ва баъд аз он Эмомалӣ Раҳмон низ ба Теҳрон сафар карда буд.

Ин сафарҳои сарони давлатҳо ба Душанбеву Теҳрон санги сари роҳи робитаҳои сард ва ба қавли Эмомалӣ Раҳмон муносибатҳои “душманона”-и онҳоро аз васат бардошт ва ҷонибҳоро пас аз наздик ба 7 соли “дурӣ” ва “ҷудоӣ” дубора ба ҳам васл кард.

Мулоқоти ҳайатҳои Тоҷикистону Эрон дар Тошканд

Аз ҷониби

amrullokhi

25/01/2023

Вазирони корҳои хориҷии Тоҷикистон ва Эрон дар раъси ҳайатҳои ду кишвар дар шаҳри Тошканд мулоқот ва перомуни масоили мухталиф гуфтугӯ карданд.

Бино ба иттилои сомонаи Вазорати корҳои хориҷии Ҷумҳурии исломии Эрон имрӯз, 25-уми январи соли ҷорӣ сарони дастгоҳҳои дипломатии Тоҷикистон ва Эрон дар Тошканд мулоқот карданд.

Ба қавли манбаъ, дар ин мулоқот Амир Абдуллоҳиён бо ҳамтои тоҷикаш Сироҷиддини Муҳриддин “перомуни роҳҳои густариши ҳар чӣ бештари муносиботи дуҷониба, мавзӯъҳои минтақавӣ ва таҳаввулоти байналмилалии мавриди алоқаи муштарак гуфтугӯ ва табодули назар карданд.

Сомонаи Вазорати корҳои хориҷии Тоҷикистон дар бораи баргузории ин мулоқот то замони таҳияи ин хабар чизе нагуфтааст, вале ҷониби Эрон мегӯяд, ҷонибҳо инчунин дар бораи тавсеаи робитаҳои иқтисодӣ, тиҷоратӣ, транзитӣ ва таъсиси корхонаҳои муштарак дар минтақаҳои озоди иқтисодии Тоҷикистонро ҳам таъкид карданд.

Пеш аз ин вазири корҳои хориҷии Тоҷикистон бо ҳамтоёнаш аз Покистону Озарбойҷон, Узбекистон ва Туркманистон ҳам дидор ва дар бораи масоили дуҷониба, минтақавӣ ва байналмилалии мавриди алоқаи тарафҳо гуфтугӯ карда буд.

Гуфта мешавад, ин мулоқотҳои вазири корҳои хориҷии Тоҷикистон бо ҳамтоёнаш аз кишварҳои Осиёи Марказӣ, Озарбойҷон, Туркия, Эрон ва Покистон дар ҳошияи 26-умин нишасти вазирони корҳои хориҷии Созмони ҳамкории иқтисодӣ дар шаҳри Тошканд, пойтахти Узбекистон баргузор гардиданд.

Сафари сарвазири Русия ба Тоҷикистон

Аз ҷониби

AZDA TV

25/01/2023

Қарор аст дар аввалҳои моҳи марти соли ҷорӣ нахуствазири Русия Михаил Мишустин бо як сафари расмӣ ба Тоҷикистон биёяд. Дар ин бора сафорати Тоҷикистон дар Русия хабар дод.

Сафорати Тоҷикистон дар Русия дар саҳифаи фейсбукияш иттилоъ дод, ки 24-уми январи соли ҷорӣ сафири Тоҷикистон дар Русия Давлатшоҳ Гулмаҳмадзода бо муовини вазири корҳои хориҷии Русия Михаил Галузин мулоқот карданд.

Гуфта мешавад, дар ин мулоқот ҷонибҳо ба масоили омодагӣ ба сафари дарпешистодаи сарвазири Русия “Михаил Владимирович Мишустин ба Ҷумҳурии Тоҷикистон, ки аввали моҳи марти соли ҷорӣ дар назар аст”, гуфтугӯ карданд.

Дар хабар аз аҳдофи ин сафар ва дигар ҷузъиёти он чизе гуфта нашудааст.

Зоҳиран, пас аз буҳрони ҷанг дар Украина Русия талош дорад бо кишварҳои собиқ Шӯравӣ, аз ҷумла Осиёи Марказӣ робитаҳояшро амиқтар кунад. Русия гарчанд шарики стратегии Тоҷикистон ба шумор меравад, вале давоми як соли ахир дида мешавад, сафарҳои шахсиятҳои сатҳи аввали Русия ба Тоҷикистон бешта шудааст.

Баррасии интиқоли нафту гази Қазоқистон ба Тоҷикистон

Аз ҷониби

AZDA TV

25/01/2023

Рӯзи 24-уми январи соли ҷорӣ дар шаҳри Остонаи Қазоқистон масъалаи интиқоли нафту гази ин кишвар ба Тоҷикистон баррасӣ шуд.

Акс аз сомонаи Вазорати корҳои хориҷаи Тоҷикистон

Тавре Вазорати корҳои хориҷии Тоҷикистон иттилоъ медиҳад, сафири фавқулода ва мухтори Тоҷикистон дар Қазоқистон Ибодзода Хайрулло бо вазири энергетикаи Қазоқистон Акчулаков Болат Уралович мулоқоту гуфтугӯ карданд.

Гуфта мешавад, дар ин мулоқот ҷонибҳо масоили ҳамкориҳои дуҷонибаро дар масоили обу энержӣ, аз ҷумла воридоти нафту газ аз Қаоқистон ба Тоҷикстон баррасӣ карданд.

Тоҷикистон маҳсулоти нафтии худро дар шакли омодашудаи бензин ва салярка асосоан аз Русия ва Қазоқистон тавассути ширкати “Фароз”-и мутааллиқ ба Шамсулло Соҳибов, домоди Эмомалӣ Раҳмон ворид мекунад.

Ёдовар мешавем, ки ду сол пеш ширкати “Фароз” аз барҳамхӯрданаш хабар дода буд, вале таҳқиқоти журналистии расонаҳои дохилӣ нишон дода, ки ин ширкат натанҳо аз байн нарафта, балки ба чанд фаръи дигар тақсим шудааст. Ва ҳоло он аз воридоти газу бензин шуруъ карда, то аз қайди техникӣ гузаронидани мошинҳо ва ҳатто баъзе асонди тиббиву раванди қабули донишҷӯён ба донишгоҳҳо ва даҳҳо тиҷорати дигарро зери даст дорад.

Тоҷиконе, ки шаҳрвандии Русияро доранд ба ватанашон баргашта наметавонанд

Аз ҷониби

firuzihait

24/01/2023

Ба зодагони кишварҳои Осиёи Марказӣ, ки шаҳрвандии Русияро доранд, иҷозаи берун шудан аз ин кишварро надодаанд. Дар ин бора бахшии қирғизии Радиои Озодӣ дар истинод ба чанд зодаи Тоҷикистону Қирғизистон хабар дод.

Зодагони Тоҷикистону Қирғизистон, ки мехостанд аз Русия ба ватани худ бираванд, дар марз ба онҳо гуфтаанд, ки барои вуҷуди номашон дар руйхати мобилизатсия то 12-уми феврал иҷозаи тарки кишварро надоранд.

Гуфта мешавад, муҳоҷирони дорои шаҳрвандии Русия даъватнома барои рафтан ба артиш мегиранд ва ба комиссариатҳои ҳарбӣ барои суҳбат даъват намуда, мефаҳмонанд, ки фирор аз сафи қувваҳои мусаллаҳ ҷазои сахт дар пай дорад.

Ин хабар дар ҳоле расонаӣ мешавад, ки 13-уми январи соли ҷорӣ, раиси Кумитаи тафтишоти Русия Александр Бастрикин гуфта буд, хориҷиён, аз ҷумла тоҷиконе, ки шаҳрванди ин кишвар шудаанд, бояд ба ҷанги Русия ба зидди Украина сафарбар шаванд. Бастрикин афзуд, тайи панҷ соли ахир беш аз ним миллион нафар аз Тоҷикистон ва Қирғизистону Узбекистон шиносномаи Русия гирифтаанд ва уҳдадоранд, ки ба сафи артиш ҷалб гарданд.

Дар Бишкек пойтахти Қирғизистон коргарони дорои шиносномаҳои Русияро аллакай ҳушдор додаанд, ки дар шароити мобилизатсия наметавонанд ба онҳо кумак кунанд. Русия бо Қирғизистон ба фарқ аз Тоҷикистон созишнома дар бораи душаҳрвандӣ надорад.

Бар асоси қонунҳои ин ду кишвар ҳар касе, ки дар ҷангҳои хориҷӣ ширкат мекунад, ба ҷавобгарии ҷиноӣ кашида мешавад.

Маълум нест, ки чӣ қадар зодагони Осиёи Марказӣ, ки шаҳрвандии Русияро доранд, аллакай ба артиш даъват шудаанд ва дар ҷанги Украина ширкат мекунанд. Аммо аз хабару гузоришҳои охир шумораи онҳо хеле зиёд буда, дар ин муддат чандин нафар кушта ва ҳатто бе ному нишон шудаанд.

Дар Хатлон 49 нафар аз қурутоб заҳролуд шуд

Аз ҷониби

amrullokhi

24/01/2023

Дар ноҳияи Шамсиддини Шоҳини вилояти Хатлон 49 нафар, ки пас аз хӯрдани қурутоб заҳролуд шуданд, ба бемористонҳо интиқол додаанд.

Имрӯз, 24-уми январи соли 2023 дар деҳаи Чагамаи ноҳияи Шамсиддини Шоҳини вилояти Хатлон 49 нафар пас аз хӯрдани қурутоб заҳролуд шуда, ҳамаи онҳо ба беморхонаҳои ноҳия ва шаҳри Кӯлоб интиқол дода шудаанд.

Сомонаи Радиои Озодӣ ба нақл аз Шароф Рустамов, сардори Раёсати тандурустӣ дар минтақаи Кӯлоб хабар додааст, “пизишкон ҳанӯз дақиқ накардаанд, ки кадом маҳсулот дар қурутоб сабаби заҳролуд шудани сокинон шудааст.” Ва дар бораи тафсилоти ҳодиса дертар маълумот хоҳанд дод.

Дар аксар манотиқи кӯҳистонии Тоҷикистон қурутобхӯрӣ дар фасли замистон ба як расми маъмулӣ табдил шуда аст ва чун аксари мардум дар дигар фаслҳои сол нисбатан вақти камтаре барои дидорбинии ёру дӯстонашон доранд, дар фасли сармо фурсатро ғанимат дониста, ба баҳонаҳои мухталиф мардумро даъват карда, зиёфат медиҳанд. Ин нафарҳое, ки заҳролуд шудаанд, низ дар меҳмонии яке аз сокинони ин ноҳия ҳузур доштанд.

Гуфта мешавад, мақомоти Тоҷикистон то замони таҳияи ин хабар дар бораи ҷузъиёти ин ҳодиса тафсилоте надодаанд, вале бархе шоҳидони ҳол мегӯянд, 24 нафар аз ин заҳролудшудагон дар беморхонаи ноҳия мавриди ташхис ва табобат қарор гирифта ва боқӣ 25 каси дигарро, ки вазъи саломатиашон нисбатан вахимтар арзёбӣ мешуд, ба бемористони шаҳри Кӯлоб интиқол додаанд.

1...312313314...742 саҳифаи 313 аз 742

ШАБАКАИ ХАБАРРАСОНӢ ВА ТАҲЛИЛӢ

Вазорати тандурустӣ: 48 заҳролуд не, дилбеҳузур шуданд

Гапи Толибон ба Узбекистон гузашт

▶️Барномаи хaбарии ИМРӮЗ – 25.01.2023 | AZDА TV | برنامه ای خبری امروز اخبار تاجیکستان

Боз “мобилизатсия” дар Русия оғоз мешавад?

Сафари раисҷумҳури Эрон ба Тоҷикистон

Мулоқоти ҳайатҳои Тоҷикистону Эрон дар Тошканд

Сафари сарвазири Русия ба Тоҷикистон

Баррасии интиқоли нафту гази Қазоқистон ба Тоҷикистон

Тоҷиконе, ки шаҳрвандии Русияро доранд ба ватанашон баргашта наметавонанд

Дар Хатлон 49 нафар аз қурутоб заҳролуд шуд

Дар бораи мо

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

Дар бораи мо