Бо қарори нави шаҳрдори Душанбе хона-музейи Садриддин Айнӣ, сардафтари адабиёти навини тоҷик, вайрон ва ё ба ҷойи дигаре кӯчонида намешавад. Дар ин бора субҳи рӯзи 19-уми ноябр Мақомоти давлатии шаҳри Душанбе дар саҳифаи фейсбукияш хабар дод.

Дар хабари шаҳрдории Душанбе гуфта мешавад, ки Раиси шаҳри Душанбе Рустами Эмомалӣ қарори накӯчондану тахриб накардани хона-музей Садридддин Айниро, ки дар кӯчаи Ҳамза Ҳакимзодаи ноҳияи Исмоили Сомонии шаҳри Душанбе воқеъ аст, дар асоси пешниҳоду дархостҳо олимону нависандагони кишвар гирифтааст.

“Вобаста ба масъалаи мазкур дастур доданд, ки Хона-музей бартараф карда нашуда, нигоҳдошти минбаъдаи он таъмин карда шавад.”, – омадааст дар хабари шаҳрдории Душанбе.

Қарори мазкурро адибону олимони тоҷик бо хушҳолӣ истиқбол намуданд. Пас аз нашри ин хабар адиб ва нависандаи тоҷик Абдуқодири Рустам дар саҳифаи фейсбукияш навишт: “Ақли солим пирӯз шуд. Рустами Эмомалӣ писари президенти Тоҷикистон ва шаҳрдори Душанбе гуфтааст, хона-музейи Айнӣ вайрон карда нашавад, ба ҷойи дигар кӯчонида нашавад ва ба сохторҳои марбутаи шаҳрдорӣ супориш додааст, гирду атрофи хона-музейро тоза нигоҳ доранд ва обод кунанд!  Худоро шукр!”

Баъд аз расонаӣ шуданӣ хабари тахриби хона-мӯзеи Устод Садриддин Айнӣ, Қаҳрамони миллии Тоҷикистон дар шаҳри Душанбе фаъолони ҷомеаи шаҳрвандии тоҷик, олимону нависандагон аз гӯшаву канори дунё садо баланд карданд ва монеъи ин кор шуданд. Аз ҷумла адиб Абдуқодири Рустам яке аз аввалинҳо буд, ки дар ин маврид садо баланд кард.

Рӯзи 17-уми ноябр Иёлоти Муттаҳидаи Амрико Тоҷикистонро бо забони вазири умури хориҷааш Энтони Блинкен ба хотири ҷорӣ кардани маҳдудиятҳои динӣ интиқоди шадид кард.

Вазири умури хориҷаи Амрико зимни як изҳороте кишварҳои Русия, Эрон, Чин, Куриёи Шимолӣ, Бирма, Покистон, Арабистони Саудӣ, Тоҷикистон, Туркманистон ва Эритреяро ба феҳристи “кишварҳои мавриди нигаронии хос” шомил кардааст. Ба гуфтаи вазири умури хориҷаи Амрико, мақомоти ин кишвар ба “нақзи муназзам, пайваста ва дағалона озодиҳои динӣ” даст мезананд.

Блинкен дар идома афзуд, ки “Мо минбаъд низ ба ҳама ҳукуматҳо фишор меорем, то камбудиҳоро дар қонунҳо ва рафтори худ ислоҳ кунанд ва шахсонеро, ки сӯиистифода мекунанд ба ҷавобгарӣ кашиданд.”

Аммо мақомоти Тоҷикистон то ҳол дар ин бора вокуниш накардааст, вале соли гузашта чуннин гузоришеро “ноодилона” хонда буданд.

Ҳамасола Тоҷикистон дар қатори дигар кишварҳои маҳдудкунандагони озодиҳои динӣ ворид мешавад ва барои ин кораш мавриди интиқод қарор мегирад. Аммо ба чунин гузоришҳо вокуниш нишон дода, онро бо гуфтани: “ин гуфтаҳо асоси воқеӣ надоранд”, рад мекунад ва вуҷуди беш аз 3 ҳазор масҷидро далел меорад.

Коршиносон мегӯянд, Ҳукумати кишвар ҳамеша барои аз чолиш баромадан вуҷуди ҳақоиқро рад мекунад, аммо воқеияти ҳол, яъне таъқибу фишор ва зиндон кардани садҳо руҳонӣ ва донишомӯзони мадориси исломӣ, бастани садҳо масҷиду мадорис, маҷбуран тарошидани ришу гирифтани сатри занҳои ҳиҷобпӯш шоҳиди ин гуфтаҳост.