Хона блог саҳифа 501

Муҳокимаи 5 муҳоҷири тоҷик дар Русия бо иттиҳоми ғоратгарӣ

Аз ҷониби
AZDA TV
-
0

Додгоҳи шаҳри Суворови вилояти Тулаи Русия 5 шаҳрванди Тоҷикистонро бо иттиҳоми ғоратгарӣ ва дуздии авмоли ғайр муҳокима мекунад.

Акс аз “1tulatv.ru”

Бино ба иттилои дафтари матбуоти додгоҳи вилояти Тула, додгоҳ парвандаи 5 шаҳрванди Тоҷикистонро бо иттиҳоми дуздии маблағ дар ҳаҷми калон бо истифода аз силоҳ ва зӯроварии ба ҳаёт хатарнок ва ғайриқонунӣ даромадан ба манзили дигарон баррасӣ мекунад.

Дар хабар гуфта мешавад, ки ин 5 шаҳрванди Тоҷикистон дар моҳи ноябри соли 2020 ду маротиба ба хонаи дигарон ғайриқонунӣ ворид шуда, бо таҳдиди силоҳ ва зарбу лати соҳибони хона, дар маҷмуъ наздики 1 миллиону 250 ҳазор рубли русиро дуздидаанд.

Аммо то ҳол назари наздикон ва ё вакили дифоъи боздоштшудагон маълум нест.

Мурофиаи ниҳоии боздоштшудагон 1-апрели соли ҷорӣ баргузор мешавад.

Русия дар ҷанги Украина ақибнишинӣ мекунад?

Аз ҷониби
AZDA TV
-
0

Рӯзи 29-уми март ҳайати музокиракунандаи Украина ва Русия дар Истанбул давраи навбатии музокироти худро гузарониданд. Дар ибтидои ин вохӯрӣ раисҷумҳури Туркия Раҷаб Тайиб Эрдуғон ширкат ва суханронӣ намуд.

Акс аз “РИА Новости”

Ҷониби Туркия музокироти навбатии ҷонибҳоро пурсамар хонд. Пас аз се соати гуфтушунид муовини вазири дифои Русия Александр Фомин ба хабарнигорон гуфт, Русия нерӯҳояшро аз аӣрофи Киев ва Чернигов ба самти Шимол қафо мекашад.

“Ба хотири тақвияти эътимоди байниҳамдигарӣ ва заминасозӣ барои гуфтугӯҳои ояндаву расидан ба ҳадафи ниҳоӣ, қарор шуд фаъолияти низомӣ дар самтҳои Киев ва Чернигов шадидан кам карда шавад”, – гуфт муовини вазири дифои Русия.

Бино ба иттилои расонаҳо дар давраи якуми ворхӯрии ҷонибҳо чунин пешниҳодот иро шудааст:

  • Напайвастани Украина ба НАТО ва қувваҳои низомии дигар дар баробари он Русия вазифадор шуда, ки амнияти Украинаро кафолат медиҳад;
  • Таҳияи созишнома дар бораи бетарафӣ ва мақоми ғайриҳастаии Украина;
  • Русия нерӯҳои худро аз атрофи Киев ва Чернигов берун мекунад;
  • Пешниҳод шуд, ки мулоқоти Путин ва Зеленский сурат бигирад ва ҳамзамон имзои созишномаи сулҳ аз ҷониби вазирони корҳои хориҷӣ баргузор шавад;
  • Киев кишварҳои аъзои Шӯрои Амнияти СММ, инчунин Олмон, Канада, Лаҳистон, Исроил ва Туркияро ҳамчун кишварҳои кафили сулҳи Украина пешниҳод кард; бояд кафил шаванд;
  • Пешниҳодоти матраҳ кардаи Украина дар мавриди созишномаи тарафайн ба Путин арза мешаванд ва сипас посух дода мешавад;

Ин буд чанде аз нукоти муҳими тавофуқоти имрӯзаи Киев ва Маскав. Аксари коршиносон аз ин мулоқоти ахир умеди бештари ба сулҳ расидани ҷонибҳоро доранд.

Аммо Раисҷумҳури Амрико мегӯяд, ба гуфтаи Русия чандон бовар надорад ва мунтазир мемонад, ки Путин гуфтаҳояшро татбиқ мекунад ё на.

Нишасти ҳамсояҳои Афғонистон дар Чин

Аз ҷониби
amrullokhi
-
0

Нишасти вазирони умури хориҷии кишварҳои ҳамсояҳои Афғонистон ба муддати ду рӯз дар Пекин баргузор мешавад.

Расонаҳои давлатии Чин хабар медиҳанд, ки рӯзҳои 30-31-уми марти соли 2022 Пекин мизбони 3-юмин нишасти Вазирони корҳои хориҷии ҳамсояҳои Афғонистон мешавад.

Ба иттилои расонаҳо, ин нишаст бо ҳузури вазирони корҳои хориҷии Тоҷикистону Туркманистон, Покистону Эрон, Ӯзбекистон ва бо шумули сарпарасти Вазорати корҳои хориҷии Афғонистон Амирхон Муттақӣ баргузор мегардад.

Инчунин дар ин нишаст вазири корҳои хориҷии Русия Сегей Лавров ва вазирони корҳои хориҷии Қатар ва Индонезия низ ба унвони меҳмонони вежа даъват шудаанд.

Нахустин нишасти ҳамсояҳои Афғонистон дар соли гузашта дар Покистон ба таври он-лайн ва нишасти дувуми он дар Теҳрон ба шакли ҳузурӣ баргузор шуда буданд.

Гуфта мешавад, ҳафтаи гузашта вазири корҳои хориҷии Чин дар доираи сафарҳои минтақаӣ дар як сафари аз пеш эълон нашуда вориди Кобул гардида, бо Амирхон Муттақӣ, сарпарасти Вазорати корҳои хориҷии Афғонистон ва Мулло Абдулғанӣ Бародар, сарпарасти ҳукумати муваққати Толибон ва дигар раҳбарони Толибон мулоқот карда буд.

Сафари Рустами Эмомалӣ ба Қазоқистон

Аз ҷониби
firuzihait
-
0

Рустами Эмомалӣ, Раиси Маҷлиси миллии Маҷлиси Олии Ҷумҳурии Тоҷикистон бо як сафари расмӣ шоми 28-уми март вориди Қазоқистон шуд.

Рустами Эмомалӣ, писари Раисҷумҳур Эмомалӣ Раҳмон барои иштирок дар ҷаласаи Шӯрои Ассамблеяи Байнипарламентии давлатҳои иштирокчии Иттиҳоди Давлатҳои Мустақил, ки ба муносибати 30-солагии таъсисёбии ин созмон баргузор мегардад, ба шаҳри Алмаатои Қазоқистон сафар кард.

Шоми 28-уми март писари Эмомалӣ Раҳмонро, ки раиси шаҳри Душанбе ва ҳамзамон Раиси Маҷлиси миллии Маҷлиси Олии Ҷумҳурии Тоҷикистон мебошад, дар фурӯдгоҳи байналмилалии шаҳри Алмаато, Сафири Тоҷикистон дар Қазоқистон ва намояндагони Сенати Парламенти ин кишвар пешвоз гирифтаанд.

Бино ба иттилои АМИТ “Ховар”, дар ин сафар Раиси Маҷлиси миллии Маҷлиси Олии Ҷумҳурии Тоҷикистонро раисони чанде аз кумитаҳои Маҷлиси миллӣ, роҳбари Дастгоҳи Маҷлиси миллӣ ва дигар шахсони расмӣ ҳамроҳӣ кардаанд.

Рустами Эмомалӣ имрӯз 29-уми март бо Раиси Сенати Парламенти Ҷумҳурии Қазоқистон Маулен Ашимбаев мулоқот намуда, муносибатҳои дуҷонибаро баррасӣ кардаанд.

Ҳамчунин Раиси Маҷлиси миллии Маҷлиси Олии кишвар дар ҷаласаи Ассамблеяи Байнипарламентии давлатҳои иштирокчии Иттиҳоди Давлатҳои Мустақил (АБ ИДМ) бахшида ба 30-солагии Ассамблея иштирок ва суханронӣ кардааст.

Боздошти боз яке аз наздикони марҳум Сайид Абдуллоҳи Нурӣ

Аз ҷониби
firuzihait
-
0

Мақомоти қудратии вилояти Хатлон домоди марҳум Сайид Абдуллоҳи Нурӣ, Сайвалӣ Ризоевро низ боздошт кардаанд. Дар ин бора Кумитаи шаҳрвандии наҷоти гаравгонҳо ва зиндониёни сиёсии Тоҷикистон (КШНГЗС) хабар дод.

Бино ба иттилои Кумита, Сайвалӣ Ризоев, шавҳари хоҳари муассиси ҲНИТ марҳум Сайид Абдуллоҳи Нурӣ дар боздоштгоҳи муваққати Вазорати корҳои дохилии шаҳри Душанбе қарор дорад.

Сабаби боздошти Сайвалӣ Ризоевро мақомот дар он гуфтаанд, ки писаронаш дар яке аз кишварҳои аврупоӣ қарор доранд ва барояш пул фиристодаанд.

Дар се моҳи ахир мақомот ду бародарзодаи марҳум Сайид Абдуллоҳи Нурӣ, Нусратулло Саидов ва Муҳибулло Нуриддинов ва бародари хурдиаш Нуруллоҳ Саидовро бо ҷурми “дарёфти пул аз хориҷ” боздошт кардаанд. Ва Ризоев инак нафари 4-ум аст, ки аз пайвандони раҳбари собиқи ҲНИТ боздошт мешавад.

Мақомот расман сабаби ин боздоштҳоро шарҳ намедиҳанд, аммо ба гуфтаи пайвандони боздоштшудагон, ҳамаи онҳо бо ҷурми “дарёфти пул аз хориҷ” муттаҳам шудаанд. Вале мақомот барои исботи ин иттиҳомот далоиле ироа накардааст.

Мақомот дар соли 2015 хоҳарзодаи марҳум Сайид Абдуллоҳи Нурӣ, Мӯсо Шеховро ба 7 сол ва бародарзодаи дигараш Сайдулло Саидовро ба 10 соли зиндон маҳкум карда буданд.

Болоравии қурби рубли русӣ дар баробари пули миллӣ-сомонӣ

Аз ҷониби
amrullokhi
-
0

Бонки миллии Тоҷикистон расман қурби пули миллӣ-сомониро дар баробари рубли русӣ поён бурд. Аммо бонкҳои тиҷоратии кишвар ҳар кадом дар алоҳидагӣ дар ин бозор ҳарфи худро доранд.

Имрӯз, 29-уми марти соли ҷорӣ Бонки миллии Тоҷикистон расман қурби 1 рубли русиро дар баробари пули миллӣ-сомонӣ 0,1393 сомонӣ эълон кард. Ба ибораи дигар, Бонки миллии Тоҷикистон эълон кард, ки қурби ҳар 1000 рубли русӣ ба 139 сомониву 30 дирам баробар аст.

Дар бонкҳои тиҷоратии Тоҷикистон хариду фурӯши арзҳои хориҷӣ, ба хусус рубли русӣ бо пули миллӣ-сомонӣ якхел набуда, балки аз ҳам фарқ мекунад.

Амонатбонк, бонки амонатгузории Тоҷикистон хариди 1000 (як ҳазор) рубли русиро барои шахсони воқеӣ 130 сомонӣ ва фурӯши онро 131 сомонӣ эълон кардааст. Аммо ин бонк хариди 1000 рубли русиро барои шахсони ҳуқуқӣ 134 сомонӣ ва фурӯши онро барои шахсони ҳуқуқӣ 145 сомонӣ таъйин кардааст.

Алифбонк, аз дигар бонкҳои тиҷоратии Тоҷикистон, ки тоза дар байни мардум ҷойгҳои худро мустаҳкамтар мекунад, хариди 1000 рубли русиро 130 сомонӣ ва фурӯши онро 148 сомонӣ эълон кардааст.

Ҳамзамон Ориёнбонк, бонки шинохтаи кишвар, ки раҳбариашро додараруси Эмомалӣ Раҳмон Ҳасан Асадуллозода бар уҳда дорад, бо вуҷуди эълони бонки миллӣ хариди 1000 рубли русиро 125 сомонӣ ва фурӯши онро 141 сомонӣ эълон кардааст.

Дар ин миён Бонки Эсхата аз дигар бонкҳои тиҷоратии шинохтаи Тоҷикистон хариди 1000 рубли русиро баробар ба 143 сомонӣ ва фурӯши онро баробар ба 148 сомонӣ таъйин кардааст.

Гуфтанист, пас аз оғози ҳамлаҳои Русия ба Украина ва ҷорӣ шудани таҳримҳои кишварҳои Ғарб алайҳи Русия якбора қурби рубли русӣ дар бозори арзҳои ҷаҳонӣ ба шиддат суқут кард, аммо аз замоне, ки Путин эълон кард, ки нафту гази кишварашро ба кишварҳои “ғайри дӯст” бо рубли русӣ мефурӯшад, дубора қурби рубли русӣ дар бозори арзҳои ҷаҳон боло рафатааст.

Пеш аз ин гурӯҳи кишварҳои санъатии ҷаҳонӣ маъруф ба G7 дар Берлин эълон карда буданд, ки – тавре Путин гуфта буд – гази Русияро бо рубли русӣ намехаранд, аммо баъди он 28-уми марти соли ҷорӣ Сухангӯи Путин эълон кард, ки Русия кишвар хайрия нест, ҳар кӣ мехоҳад газ бихарад, бояд пулашро бо рубли русӣ пардохт кунад.

Эълони аввали рӯзи рамазон дар Тоҷикистон

Аз ҷониби
amrullokhi
-
0

Шӯрои уламои Маркази исломии Тоҷикистон расман эълон кард, ки оғози моҳи мубораки рамазон дар Тоҷикистон 2-юми апрел оғоз мешавад.

Имрӯз, 29-уми марти соли 2022 Шӯрои уламои Маркази исломии Тоҷикистон бо содир кардани Қарори худ шанбеи 2-юми апрелро дар Тоҷикистон рӯзи аввали моҳи рамазон эълон кард.

Дар ин Қарори Шӯрои уламои кишвар омадааст:

“Мувофиқи ҳисоби илмӣ аввали моҳи шарифи Рамазон дар соли 2022 ба ҳисоби тақвимӣ рӯзи шанбе 2-юми апрел муайян карда шавад.

  1. Мувофиқи ҳисоби шаръӣ нисоби закот 35000 сомонӣ муқаррар карда шавад, ки аз он 875 сомонӣ закот дода мешавад.
  2. Садақаи фитр мувофиқи меъёри шаръӣ ба ҳисоби гандум 7 сомонӣ ва ба ҳисоби мавиз 80 сомонӣ (барои шахсоне, ки тавоноии молии бештар доранд) муайян карда шавад.
  3. Фидяи савм дар моҳи шарифи Рамазони соли 2022 барои соҳибони узри шаръӣ (шайхи фонӣ) ва бемороне, ки аз сиҳатшавии онҳо умеде нест ба миқдори 420 сомонӣ барои 30 рӯз муайян карда шавад.”

Рӯза гирифтани моҳи мубораки рамазон яке аз рукнҳои панҷгонаи дини ислом буда, мусалмонони ба синни балоғат расидаву сиҳатманд вазифадор ҳастанд, ки тӯли як моҳ аз дамидани субҳ то шом рӯза бигиранд.

Гуфта мешавад, тибқи маъмул рамазон бо дидани моҳи нав оғоз мешавад, аммо бо пешрафти илм ин имкон низ муяйсар шуда, донишмандон метавонанд пеш аз оғози моҳҳои қамарӣ низ оғозу анҷоми моҳҳоро муайян кунанд.

Тоҷикистон танҳо кишваре, нест, ки 2-юми апрелро аввали рамазон эълон кардааст, балки пеш аз он бархе донишмандони Ҷуҳурии арабии Миср ҳам 2-юми апрелро аввали моҳи мубораки рамазон эълон карда буданд.

Шикояти тоҷикони Иркутск аз набудани намаку шакар дар мағозаҳо

Аз ҷониби
AZDA TV
-
0

Дар аксар мағозаҳои хуроквории бузурги шаҳрҳои Русия шакару намак ёфт намешавад. Агар пайдо ҳам шавад, хеле гарон аст.

Акс аз навори фиристодаи корбарон гирифта шудааст

Гурӯҳе аз муҳоҷирони тоҷики муқими шаҳри Иркутски Русия дар тамос бо Аздо тв гуфтанд, дар мағозаҳо орду шакар ва ҳатто намак камёфт шудааст. Агар пайдо ҳам шавад, хеле гарон аст. Ба гуфтаи онҳо, орду шакар, ба мағозаҳо дер мерасад ва расидан баробар тамом мешавад.

Тавре корбарон мегӯянд, нархи як кг шакар дар мағозаҳои шаҳри Иркутск аз 34 рубл то ба 100 рубл расида, як кг намак аз 7 ба 22 рубл ва як халта орд аз 1200 рубл ба 1750 рубл расидааст.

Ҳамсуҳбатони мо гуфтанд, ҳатто ҳолате пеш омад, ки барои хӯроки субҳона аз мағозаҳо на намак пайдо карданд ва на шакар. “Бе намак хӯрокро хӯрдан хеле душвор будааст, ба ин ҳолат расиданро мо умуман тасаввур намекардем”, мегӯяд як ҳамсуҳбати Аздо тв.  

Аз наворҳои фиристодаи корбарон ба Аздо тв дида мешавад, ки дар рафҳои махсуси шакару нону намаки мағозаҳо ба ҷуз нархи навишташуда дигар чизе нест.

Аксари муҳоҷирони кории тоҷик, ки дар Русия кору зиндагӣ мекунанд, аз пеш омадани чунин вазъият нигарони ҳоли худ ва пайвандонашон ҳастанд ва мепурсанд, ки чунин вазъ чӣ қадар идома мекунад ва аксари онҳо дар тарси аз даст додани ҷойҳои корияшон ҳастанд.

Ёдовар мешавем, ки пас аз ҳамлаи Русия ба Украина Амрико ва кишварҳои аврупоӣ дар баробари Русия мавзеъи сахттаре гирифтанд ва барои таваққуфи ҷанг алаҳи ин кишвар таҳримҳои шидиде ҷорӣ карданд. Ва ҳамчунин ширкатҳои бузурги иқтисодӣ низ бозорҳои Русияро тарк карданд, ки дар натиҷа ҳазорҳо нафар ҷои кори худро аз даст дод. Ва аз рӯзҳои аввали ҷорӣ шудани таҳримҳо гароншавӣ ва ё камёфт шудани баъзе маҳсулоти хӯрока дар бозорҳои Русия эҳсос мешуд. Иқтисодшиносон бар ин назаранд, ки таъсири таҳримҳо пас аз гузашти 3-4 моҳ бештар эҳсос хоҳад шуд.  

Интиқоди сокинони селзадаи Дарвоз аз мақомоти кишвар

Аз ҷониби
AZDA TV
-
0

Бар асари ҷорӣ шудани сел чанд хона дар ноҳияи Дарвози Вилояти Мухтори Кӯҳистони Бадахшон хароб шуданд. Сокинон аз бетаваҷҷуҳии мақомот шикоят доранд.

Ҷорӣ шудани сел дар ноҳияи Дарвоз

Бино ба иттилои масъулони бахши вилоятии Куимтаи ҳолатҳои фавқулодда бар асари ҷорӣ шудани сел дар деҳаи Умараки ноҳияи Дарвоз хонаи ду сокини деҳа комилан ва хонаи се сокини дигар қисман хароб шудааст. Ба гуфтаи мақомоти дахлдори вилоят, сел ҳамчунин ба баъзе заминҳои наздиҳавлигӣ ва хоҷагиҳои ёрирасони деҳа зарар расондааст.

Аммо сокинон аз ноҳияи Дарвоз дар тамос бо Аздо тв маълумоти КҲФ-ро рад карда, мегӯянд, ки сел беш аз 12 хона ва боз чанд макони дигарро хароб кардааст. Аммо мақомот дар фикри онҳо нестанд.

Сокинон бо ирсоли чанд навор аз вуқуи сел ба Аздо тв ва хароб дода, гуфтанд, ки “Сел дар ноҳия 12 хона ва парки Шералӣ Кабир ва ҷойҳои зиёди дигарро хароб кардааст, касе дар фикри мо нест.”

Гуфта мешавад, комиссияи ҳолатҳои фавқулодаи ноҳия гуфта, ки айни замон то 15 хонаи дигарро хатари сел таҳдид мекунад ва мақомот барои кӯчонидани онҳо ба ҷойҳои амн чора меандешанд. Вале сокинон дар суҳбат ба Аздо тв гуфтанд, ҳоло вақти ҳарчи тезтар кумак расондан ба зарардидагон ва кӯчондани онҳо ба ҷойҳои бехавф аст, вақти чораандешӣ нест.

Қирғизистон марзҳояшро бо Тоҷикистон пурзӯр мекунад

Аз ҷониби
firuzihait
-
0

Қирғизистон барои тақвияти марзҳояш бо Тоҷикистон аз Туркия ҳавопаймоҳои бесарнишини “Байрақдор”, аз Имороти Муттаҳидаи Араб 40 мошини зиреҳпӯш, аз Русия  55 мошини зиреҳпӯши “Тигр” ва 50 мошини “КАМАЗ” харидааст.

Қамчибек Ташиев раиси КДАМ-и Қирғизистон дар суҳбат бо расонаҳо аз хатарнок будани вазъ дар марз бо Тоҷикистон таъкид кард ва гуфт, ки ин техникаҳои нав барои ҳимояи амнияти кишвараш ба вилояти Бодкенд фиристода мешаванд.

Ташиев мегӯяд, барои хариди техникаҳои нав аз будҷаи давлатӣ ҳудуди 2 миллиард сом (беш аз 20 миллион доллар) ҷудо шуда, аз касе барои хариди онҳо кумак нагирифтаанд.

Дар идома ӯ қайд кард, ки рӯзҳои наздик бо ҷалби ин техникаҳои нав, аз ҷумла ҳавопаймоҳои бесарнишини “Байрақдор”, машқҳои ҳарбӣ доир хоҳад кард.

Содир Ҷабборов президенти Қирғизистон, ки дар супоридани ин техникаҳо ба Хадамоти марзбонӣ ва Вазорати ҳолатҳои фавқулоддаи кишвараш иштирок дошт, гуфт, ки “Соли гузашта барои ин ҳадафҳо аз буҷет 7,5 миллиард сом ҷудо шуда буд. Имсол барои таҳкими ҳифзи сарҳад ҳудуди 3 миллиард сом ҷудо мекунем.”

Қирғизистон дар ҳоле марзбонҳояшро бо техникаҳои навизамонавӣ муҷаҳҳаз мекунад, ки пайваста дар марзи ин кишвар бо Тоҷикистон муноқишаҳои мусаллаҳона сурат мегирад ва дар як соли охир аз ҳарду ҷониб 58 нафар ба ҳалокат расида, 270 нафари дигар захмӣ шудаанд.

Корбарони шабакаҳои иҷтимоӣ суолгузорӣ мекунанд, ки Қирғизистон дар як соли охир нерӯҳои низомияшро дар марз бо техникаҳои нав муҷаҳҳаз карда, оё Тоҷикистон дар фикри пурқувват кардани марзҳояш ҳаст ва чаро дар ин бора чизе намегӯяд?

1...500501502...802саҳифаи 501 аз 802