Ҷустуҷӯ кунед
Ҷустуҷӯ
20.9 C
Dushanbe
Хона блог саҳифа 61

Додгоҳе дар Белгия монеи истирдоди зани тоҷик шуд

Аз ҷониби
Azda Tv
-
0

Як додгоҳ дар Белгия бо судури ҳукм нагузошт зани тоҷик ба Тоҷикистон истирдод шавад.

Тибқи иттилои созмони “Freedom for Eurasia”, додгоҳи ин кишвар рӯзи 11-уми октябр ҳукм содир кард, ки шаҳрванди Тоҷикистон Ситорамо Саидова, ки қаблан бо дархости мақомоти Тоҷикистон боздошт шуда буд, ба Душанбе истирдод нашавад.

Мақомот дар Тоҷикистон Ситораморо бо иттиҳоми кумак ба терроризм гунаҳкор медонанд. Аммо пештар нашрияи “The Insider” тибқи маълумотҳои худ ин иттиҳомотро беасос гуфта буд. Аз ин пеш хоҳари ин зан Нигора Саидоваи 27-сола бо ҳамроҳи тифли 7-моҳааш ба Тоҷикистон истирдод шуда буд. Ба гуфтаи нашрияи “The Insider”, Нигораморо дар Тоҷикистон режими Раҳмон ба 8 сол равонаи зиндон кард.

“Дар ватанаш Саидова 8 сол дар бадтарин зиндони занона, ки маҳбусон бо таҷовуз ва шиканҷа рӯбарӯ мешаванд, зиндонӣ шудааст.”, менависад “The Insider”. 

Созмони мазкур дар таҳқиқи парвандаи ин ду хоҳар менависад, ки Эмомалӣ Раҳмон бо тарс додан аз ДИИШ ба таъқиби муҳоҷирон ва хонаводаҳояшон даст мезанад. Дар ҳоле, ки инҳо ҳам хешовандони ифротиҳо ва ҳам хешовандони мухолифон буда метавонанд.

Аммо тавре “The Insider” ва ҳафтаномаи “Polityka”-и Лаҳистон маълум кардаанд, мақомоти аврупоӣ маводи парвандаро зиёд дарк намекунанд ва аксар вақт шаҳрвандони Тоҷикситонро ба дасти Раҳмон медиҳанд, ки иттиҳомот алайҳи онҳо беасос аст.

Ба гуфтаи ҳомиёни ҳуқуқ, баъзан онҳое, ки иҷборан аз Аврупо баргардонида мешаванд, онҳо дар ҳудуди пойгоҳи низомии 201 дар наздикии Душанбе тавассути русҳо бозпурсӣ ва шиканҷа мешаванд ва маҷбур дар бораи равобити худ бо Украина шаҳодат медиҳанд. 

Боздошти як гурӯҳе, ки аз муҳоҷирон бо зӯр пул меситониданд

Аз ҷониби
Azda TV 3
-
0

Вазорати корҳои дохилии Тоҷикистон аз боздошти як гурӯҳи созмонёфтаи ҷиноӣ хабар дод, ки дар Русия аз ҳамватанони муҳоҷир зӯран пул мегирифтаанд.

Ин гурӯҳ иборат аз 4 нафар ҳама шаҳрвандони Тоҷикистон мебошанд. Гуфта мешавад, онҳо дар ҳудуди Росия аз ҳамватанони муҳоҷири худ ва ҳатто аз ҳамдеҳагону шахсоне, ки қаблан мешинохтаанд, бо зӯр ва таҳдид пул мегирифтаанд.

Дар хабари ВКД гумонбарон иқрор мешаванд, ки муҳоҷирони тоҷикро боздошт карда, ба ҷангал ва ё хонае мебурдаанд ва баъдан бо силоҳ ва корд даҳдид карда, аз онҳо маблағи калон талаб мекардаанд.

Дар барномаи телевизонии ВКД чанде аз ҷабрдидагон шаҳодат доданд, ки ин афрод онҳоро ба ҷангал бурда, теғро дар гулӯяшон гузоштаву пул гирифтаанд. Ба гузориши ВКД, ин гурӯҳи аз 100 ҳазор то 2 миллион рубли русии муҳоҷирони кории тоҷикро ғорат кардаанд.

Дар хабари ВКД аз гумонбарон Муҳаммадҷон Маннонов ва Бобоқул Қориев аз ноҳияи Абдураҳмони Ҷомӣ, Сафаралӣ Қулматов аз ноҳияи Ёвон ва Комрон Забирзода аз шаҳри Ҳисор муаррифӣ мешаванд.

Вазорати корҳои дохилии Тоҷикистон мегӯяд, ин гурӯҳ дар ҳамкорӣ бо Вазорати корҳои дохилӣ ва дигар сохторҳои қудратии Русия боздошт ва ба Тоҷикистон истирдод шудаанд.

Аммо замони боздошт ва истирдоди онҳо мушаххас нест. Ҳамзамон назари худи онҳо, ки дар зери дурбини нерӯҳои амниятӣ гирифта шудааст, дақиқ нест, ки то куҷо ин иттиҳом болои онҳо дуруст аст. Зеро қаблан ВКД дар ҳолатҳои зиёде аз шаҳрвандон шоҳидӣ гирифтааст, ки баъдан ҳақиқат доштани чунин иттиҳомот рад шудааст.

Мошинҳои ҷадиди бидуни ронандаи Илон Маск ба бозор мебароянд

Аз ҷониби
AZDA.TV
-
0

Илон Маск, раҳбари корхонаи мошинсозии “Tesla” аз роботакси ҷадиди худ бо номи “Cybercab”, ки бидуни ронанда аст, рӯнамоӣ кард.

Маск эълом кард, ки ин худравҳои ҷадиди ӯ бо қобилияти ронандагии комилан худкор (FSD) ва бидуни ниёз ба ронанда ва контроли инсон ҳастанд ва метавонанд “дар манотиқе, ки қонунгузорон иҷозат диҳанд, аз ҷумла дар Калифорния ва Тексози Амрико фаъол шаванд.”

Дар ин рӯнамоии роботакси ҷадид Маск ҳамчунин гуфт, ки “Cybercab” бидуни фармон ва педоли газу тормуз тарроҳӣ шудааст ва то соли 2026 тавлид тавлид мешавад.

Қимати ин худравҳои бидуни ронанда то ҳол расман эълон нашудааст, аммо пешбинӣ мешавад, ки бо назардошт ба технологияи пешрафта дар ин мошинҳо эҳтимол аз нархи мошинҳои “Tesla”, ки ҳоло роиҷ шудаанд, гаронтар шавад. Аммо рӯзномаи Bloomberg мегӯяд, нархи ин мошинҳо то ҳудуди 30 ҳазор доллар хоҳад буд.

Илон Маск ҳамчунин аз як василаи нақлиёти бузургтаре бо номи “Robovan” низ рӯнамоӣ кард. Ин мошини бузургтар бо ҷои нишасти то 20 мусофир ё кашондани бору коло тарроҳӣ шудааст ва ин низ бидуни ронанда аст. Аммо замони тавлиди ин мошини бузургтар то ҳанӯз эълон нашудааст.

Маск иддао карда, ки ронандагӣ дар мошинҳои худкор ва бидуни ронандаи ширкати “Teslo” эминтар аз ронандагии инсон аст. Аммо ба гуфтаи коршиносон, озмоишоте, ки то имрӯз дар ин маврид анҷом шудааст, ин гуфтаҳои Маскро рад мекунад.

Хонандагони ду мактаб бо табар занозанӣ карданд

Аз ҷониби
Azda TV 3
-
0

Дар як занозанӣ байни хонандагони ду мактаб як донишомӯз захмӣ шудааст. Дар ин бора Вазорати корҳои дохилии кишвар хабар дод.

Бино ба иттилои Вазорати корҳои дохилии Тоҷикистон, шоми 7-уми октябри соли ҷорӣ хонандагони синфиҳои 10-и мактабҳои миёнаи №42 ва №30 ноҳияи Фирдавсии шаҳри Душанбе бо ҳам муноқиша карда, як нафар дар ин даргирӣ бо зарби табар захмӣ шудааст.

Ин ниҳод мегӯяд, дар робита ба қазияи мазкур 8 хонандаи мактабҳои болозикр боздошт шудаанд. Ангезаи аслии сар задани ҳодиса “ҳисси бадбинӣ” байни хонандагон гуфта мешавад.

“Хонандаи яке аз ин мактабҳо бо номи Расулов И. бо табар ба гардани хонандаи дигар бо номи Раҷабов А зарба зада, ӯро маҷруҳ кардааст.“, омадааст дар хабар.

ВКД мегӯяд, вобаста ба ҳодиси мазкур маводҳои зарурӣ тартиб дода шуда, қазия пурра баррасӣ мешавад.

Ин бори аввал нест, ки байни ноболиғон муноқишаи гурӯҳӣ рух медиҳад. 5-уми октябри соли ҷорӣ низ дар як муноқишаи гурӯҳӣ бани ноболиғон як ҷавон бо зарби корд кушта шуда, 2 нафари дигар захмӣ шуданд.

Ёдовар мешавем, ки чанде пеш Вазорати корҳои дохилӣ дар шаҳри Душанбе дар доираи амалиёти “Корд” аз ошкор шудани фурӯши ғайриқонунии силоҳи сард хабар дода буд.

Ин ҳам дар ҳолест, ки солҳои ахир сокинон аз он шикоят мекунанд, ки дар байни ноболиғону навҷавонони пойтахт бо худ гардондани кордҳои хурд ба қавле “муд” шудааст, ки дар аксар ҷанҷолҳои кӯчагӣ аз чунин силоҳҳои сард истифода мешавад.

Мақомоти тоҷик аз “ифротӣ” шудани ҷавонон нигаронанд

Аз ҷониби
AZDA.TV
-
0

Ҳукумати Тоҷикистон ҳушдор медиҳад, ки омори пайвастани ҷавонон ба гурӯҳҳои ифротӣ тариқи интернет ба гунаи нигаронкунанда афзоиш ёфтааст.

Тавре бахши англисии Радиои Озодӣ хабар медиҳад, барои пешгирии ҷавонон аз пайвастан ба гурӯҳҳои ифротӣ, дар вилояти Хатлон мақомот маъракаи “Хона ба хона”-ро пеш гирифта, зиёда аз 1800 корманди мақомоти қудратӣ ва ниҳодҳои мухталиф эъзом шудаанд.

Гуфта мешавад, мақомот дари ҳар хона рафта, бо хонаводаҳо суҳбат мекунанд ва бо онҳо “фаҳмондадиҳӣ” мегузаронанд. Аз ҷумла, аз хатароти пайвастани ҷавонон ба гурӯҳҳои ифротии интернетӣ онҳоро ҳушдор медиҳанд.

Як сокини вилояти Хатлон дар суҳбат бо Радиои Озодӣ гуфтааст, ки мақомот аз мардум хостаанд, ба хешовандони худ, ки дар Русия кор мекунанд, бирасонанд, ки аз даъваткунандагони эҳтимолӣ ба созмонҳои террористӣ ҳазар кунанд.

Мақомот гуфтаанд, аксари ҷавононе, ки дар гузашта ба гурӯҳҳои ифротии динӣ, аз ҷумла ДИИШ ва ғайра пайвастаанд, аксарашон дар Русия муҳоҷир буданд. Онҳо тариқи шабакаҳои иҷтимоӣ бо ин гурӯҳҳо ошно шуданд ва баъдан ҳамроҳ гаштанд.

Давлаталӣ Саид, раиси вилояти Хатлон дар моҳи августи соли ҷорӣ зимни нишасти хабарӣ ба рӯзноманигорон гуфта буд, “Маълумоте, ки мо аз мақомоти интизомӣ мегирем, нигаронкунанда аст. Дар вилояти мо теъдоди ҷавонони ба гурӯҳҳои ифротии динӣ пайвастан хеле зиёд аст.” Аммо ӯ омори дақиқеро пешниҳод накард.

Вай гуфта буд, ки барои пешгирӣ аз пайвастани ҷавонон ба гурӯҳҳои тундгаро дастаҳои кории махсусеро аз кормандони ҳукумат, мақомоти интизомӣ, вакилони шӯрои маҳаллӣ, муаллимон ва табибон омода мекунанд ва барои онҳо курсҳои махсус мегузаранд то тавонанд бо мардум масъаларо хуб фаҳмонанд.

Ин ҳам дар ҳолест, ки давоми як соли ахир дар чандин амалиёти террористӣ, аз ҷумла дар кишварҳои Эрон, Русия, Туркия ва Афғонистон гунаҳкорони аслӣ шаҳрвандони Тоҷикистон гуфта мешавад. Ва ахиран мақомоти Толибон низ чанд наворе пахш кард, ки дар онҳо ҷавонони тоҷики аъзои ДИИШ боздошт шудаанд ва иқрор мешаванд, ки тариқи интернет ба ин гурӯҳ пайвастаанд.

Аммо мунтақидони Ҳукумати Эмомалӣ Раҳмон бар ин назаранд, ки бастани мадрасаҳои расмӣ аз сӯи ҳукумати Тоҷикистон, мамнуъ кардани вуруди ҷавонони то 18-сола ба масҷид, манъи ҳиҷобу риш ва дигар фишорҳо болои диндорон ва сокинони кишвар сабаб шуда, ки ҷавонон ба гурӯҳҳои ифротӣ бештар рӯ биёранд.

Узбекистон расман сафири Толибонро пазируфт

Аз ҷониби
AZDA.TV
-
0

Рӯзи чоршанбе, 9-уми октябри соли ҷорӣ вазири корҳои хориҷии Узбекистон Бахтиёр Саидов ба таври расмӣ Абдулғаффор Таровиро ба ҳайси сафири Толибон дар ин кишвар пазируфт.

Тавре Вазорати корҳои хориҷии Узбекистон хабар медиҳад, мақомоти ин кишвар аз намояндаи ҷадиди дипломатии Толибон ба хубӣ истиқбол карданд.

Гуфта мешавад, дар дидори вазири корҳои хориҷии Узбекистон бо сафири тозаи Толибон “ба зарурати тавсиаи ҳамаҷонибаи равобит миёни Узбекистон ва Афғонистон, таҳаққуқи зарфиятҳои тоза ва тавсиаи пружаҳои ҷадид, ки ба манфиати мардуми ду кишвар бошад, таъкид шудааст.”

Кишвари Узбекистон қаблан ҳам бо Толибон равобити дипломатиро шуруъ карда буд, вале на ба таври расмӣ. Дар байни кишварҳои ҷаҳон шояд аз аввалин кишварҳоест, ки сафири Толибонро расман мепазирад.

Дар баробари Узбекистон, кишварҳои Русия ва Чин ҳам тақрибан равобити дипломатии шибҳи расмӣ бо Толибон доранд ва сафири Афғонистонро пазируфтаанд.

Дар миёни кишварҳои Осиёи Марказӣ танҳо Тоҷикистон дар баробари Толибон мавқеи шадид дошт ва дар минбарҳои гуногуни ҷаҳонӣ аз онҳо интиқод мекард. Аммо ҳоло ин интиқодҳо камранг шудаанд ва Душанбе равобити дипломатиашро бо Кобул оғоз кардааст. Аллакай дар шаҳри Хоруғи ВМКБ Толибон консулгарӣ доранд ва расман фаъолият мекунанд.

Ҳамзамон дар ин авохир хабарҳо нашр шуд, ки Ҳукумати Тоҷикистон фаъолияти мухолифони Толибонро маҳдуд карда, аз ҷумла дафтари Ҷабҳаи муқовимати Афғонистонро, ки Аҳмад Масъуд, писари Аҳмадшоҳ Масъуд раҳбарӣ мекунад, дар Душанбе бастааст.

Ба гуфтаи таҳлилгарон, вусъат ёфтани муносибатҳои тиҷоратӣ байни Душанбе ва Кобул, қатъи фаъолияти мухолифони Толибон дар Тоҷикистон, коҳиши интиқодҳои аланӣ аз ин гурӯҳ далели таҳкими равобити дипломатӣ байни Ҳукумати феълии Афғонистон ва ҳукумати Эмомалӣ Раҳмон аст.

Тоҷикистон 80-солагии Ҷанги ҷаҳонии дувумро “махсус” қайд мекунад

Аз ҷониби
AZDA TV-2
-
0

Президенти Тоҷикистон мехоҳад, ки соли оянда пирӯзии нерӯҳои артиши Иттиҳоди Шӯравӣ бар Олмонро дар Ҷанги ҷаҳонии дувум “махсус” қайд кунад.

Бино ба иттилои расмӣ, Эмомалӣ Раҳмон эълон кард, ки Тоҷикистон раёсати давраии Иттиҳоди Давлатҳои Мутсақилро дар аввали моҳи январи соли 2025 бар уҳда мегирад.

Ба қавли манбаъ, Эмомалӣ Раҳмон, ки дар нишасти навбатии сарони кишварҳои узви Иттиҳоди Давлатҳои Мустақил дар Маскав суҳбат мекард, гуфт: “яке аз авлавиятҳои асосии раёсати мо ба роҳ мондани муҳокима оид ба беҳсозии фаъолияти Иттиҳод хоҳад буд”. Инчунин, “дар ҷанбаи сиёсӣ кор барои пешбурди обрӯи мусбати ИДМ дар арсаи ҷаҳонӣ ҳамчун иттиҳодияи минтақавӣ идома хоҳад ёфт.”

Ба гуфтаи мунтақидон, Эмомалӣ Раҳмон дар гузашта узви Ҳизби конмунисти Иттиҳоди Ҷамоҳири Шӯравӣ буд ва ҳоло ҳам ба ақидаву ғаяҳои он ҳизб бовар дорад. Барои ҳамин ӯ таъкид кард, ки “дар рафти раёсати мо таҷлили 80-солагии Ғалаба дар Ҷанги Бузурги Ватанӣ мавқеи махсус хоҳад дошт”.

Пеш аз ин мақомоти олии Русия ҳам эълон карда буданд, ки барои таҷлил аз 80-солагии пирӯзи дар Ҷанги ҷаҳонии дувум, ки қарор аст соли оянда баргузор шавад, аз ҳоли ҳозир барномарезӣ мекунанд.

Гуфта мешавад, дар корбурди истилоҳи “Ҷанги Бузурги Ватанӣ”, ки то чанде пешт аксари раҳбарон ва мансабдорони кишварҳои узви собиқ Иттиҳоди Ҷамоҳири Шӯравӣ бо ифтихор аз он ёд мекарданд, хеле аз коршиносон ва равшанфикрони муосири Тоҷикистон таҷдиди назар карда, онро Ҷанги дувум ҷаҳон ном мебаранд. Ба қавли онҳо, корбурди истилоҳи “Ҷанги Бузурги Ватанӣ” ба мо тоҷикистониҳо таъаллуқ надорад, зеро асоси ҷанг байни Олмону Русия буд ва дар он замон шаҳрвандони кишварҳои дигар ба мисли Тоҷикистон ҳамчун мустамлика маҷбурӣ дар он иштирок карда буданд.

Норозигии мизоҷон аз бонки Душанбе Сити

Аз ҷониби
AZDA TV-2
-
0

Сафи мизоҷони норозӣ аз бонки Душанбе Сити рӯз ба рӯз дар шабакаҳои иҷтимоӣ зиёдтар мешавад.

Рӯзи чоршанбе, 9-уми октябри соли ҷорӣ даҳҳо нафар аз сокинони Тоҷикистон, ки худро аз мизоҷони бонки Душанбе Сити медонанд, иддао доранд, ки ба талаботи рӯз ҷавобгӯ набудани сатҳи хидматрасониҳои ин бонк онҳоро сахт нороҳат кардааст.

Бонки Душанбе Сити, ки моликаш писари Эмомалӣ Раҳмон Рустами Эмомалӣ гуфта мешавад, бо шикоятҳои зиёд аз ҷониби мизоҷон рӯбарӯ шудааст. Мизоҷон аз хизматрасонии заифи ин муассиса дар дафтари марказии он дар Душанбе нигаронӣ мекунанд. Аксари ин шикоятҳо ба дузди шудани маблағҳо аз ҳисоби мизоҷон, хизматрасонии суст, навбатҳои тӯлонӣ ва муносибати бади кормандон рабт дорад.

Мизоҷон изҳор медоранд, ки барои иҷрои ҳатто корҳои оддитарин ба маркази хизматрасонӣ муроҷиат кардан лозим меояд, зеро дар аксар мавридҳо тавассути телефон ин мушкилоти соддаро ҳал кардан ғайримумкин аст.

Ин баҳс дар гурӯҳи фейсбукии “Ахбор барои афкор” матраҳ шуда ва ҳанӯз ҳам ҷараён дорад. Баъзе аз мизоҷон қайд кардаанд, ки барои хизматрасонӣ аз ин бонк бояд навбатҳои тӯлониеро интизор шаванд. Корбаре бо номи Рустам Рустамов, ки ин баҳсро оғоз кардааст, дар бораи муносибати кормандони ин бонк бо муштариёнаш мегӯяд: “Ягон зарра эҳтиром ба мардум надоранд“.

Ҳамчунин корбарон шикоят мекунанд, ки бар иловаи муносибатҳои дурушт кормандони ин бонк, банкоматҳояш на ҳамеша пул доранд, ки ба осонӣ рафта пули худашонро бигиранд.

То ҷое ин шикоятҳо зиёд шудаанд, ки бархе корбарон пешниҳод мекунанд: “Бонки миллӣ бояд фаъолияти ин ширкатро бубандад. Чун оддитарин хизматрасониро барои шаҳрвандон ба роҳ монда наметавонад“.

Корбарон мегӯянд, аз рӯи ночорӣ ба ин бонк муроҷиат мекунанд, вале дигар бонкҳое дар кишвар вуҷуд дорад, ки хидматрасониҳояшон аз Душанбе Сити ба маротиб беҳтар аст. Чунончи, Рустам Рустамов мегӯяд: “Ман аз бонки Душанбе Сити миллион бор безорам, аз хизматрасонии Алиф истифода мебарам, аммо чанд шарики тиҷоратиамон Душанбе Сити доранд ва мо ҳам маҷбурем аз хадамоти ин бонк, ки бадтарин аст, истифода барем.“

Мизоҷон аз ин бонк талаби ҷорӣ кардани механизми содда барои баррасии муроҷиатҳояшон ва таъмини кумакрасонии саривақтии коршиносонро доранд. Ширкати мазкур ҳанӯз расман ба ин шикоятҳо вокуниш нишон надодааст, аммо интизор меравад, ки масъулон тадбирҳоеро барои беҳтар намудани сифат ва самаранокии хизматрасонӣ андешанд, то ки муносибат бо мизоҷон ба таври бунёдӣ тағйир ёбад.

Мушкилоти муҳоҷирон таъсире бар равобити Раҳмону Путин надорад

Аз ҷониби
AZDA.TV
-
0

Ёвари раисҷумуҳури Русия Юрий Ушаков дар ҳузури рӯзноманигорон гуфт, ки мушкилоти муҳоҷирони тоҷик таъсире бар робитаҳои Раҳмону Путин намегузорад.

Юрий Ушаков ёрдамчии перзиденти Русия дар умури равобити хориҷӣ дар посух ба ин суол, ки оё танише байни роҳбарони Тоҷикистону Русия бар сари мавзуи муҳоҷират вуҷуд дорад, гуфт, “робитаи роҳаброн гарм ва дӯстона боқӣ мемонад.”

“Баҳси муҳоҷирон ба равобити президентҳои Русияву Тоҷикистон Владимир Путин ва Эмомалӣ Раҳмон таъсир намерасонад: онҳо гарм ва дӯстона боқӣ мемонанд. Онҳо якдигарро мешиносанд, равобити хуб дорад ва мехоҳанд ин робитаҳо идома ёбад.“, таъкид кард Ушаков.

Ин гуфтаҳо дар ҳоле садо медиҳад, ки вазъи муҳоҷирони корӣ, бахусус зодагони Тоҷикистон дар Русия якбора баддатар шудааст. Аз ҷумла, пас аз ҳодисаҳои хунин дар “Крокус Сити Ҳолл” ва гаравгонгирӣ дар зиндони Волгоград, ки мақомоти Русия дар он зодагони Тоҷикистонро гумонбар донистанд. Ҳоло ба назар мерсад, ки мақомоти Русия мехоҳанд ба қабули қонуну қарорҳои нав шароитро барои муҳоҷирон, бахусус тоҷикистониён душвортар кунанд.

Ҳамарӯза муҳоҷирони тоҷик аз шаҳру ноҳияҳои гуногуни Русия мегӯянд, ки санҷишу боздошт ва ихроҷи иҷбории тоҷикон афзуда, муносибати мардуму корфармоён бо онҳо тағйир ёфтааст ва аз ҷониби пулис ва ҳатто мардуми оддӣ мавриди ҳамлаҳои лафзӣ ва ҷисмӣ қарор мегиранд.

Умеди бисёре аз муҳоҷирон пас аз сафари Раҳмон ба Русяи дар он буд, ки перзидент мушкилии онҳоро бо ҳамтои Русаш ба миён гузошта, аз мақомдорони рус эҳтироми ҳуқуқи муҳоҷиронро талаб мекунад. Аммо бо гузашти се рӯз Раҳмон то ҳол ҷое аз мушкилоти муҳоҷирон изҳори назар накардааст.

Мунтақидон мепурсанд, ки робита байни ду расиҷумуҳр ҳамчун робитаи ду расиҷумуҳр бар асоси масолеҳи миллӣ аст ё миёни ду дӯсти дерина, ки мушкили мардум ба он ҳеҷ рабте надорад?

Аз ҷумла, Фарҳод Одинаев, фаъоли маданӣ ва ҳомии ҳуқуқи муҳоҷирон рӯзи чоршанбе дар ин робита ба Azda TV чунин гуфт:
“Мақомотҳои болоӣ дар Тоҷикистон ва ҳатто Русия ва хосатан дар сатҳи президентҳо эҳтимоми зиёде ба мушкилоти муҳоҷирон намедиҳанд. Масалан, Раҳмон зиёд ба мушкилоти муҳоҷирон расидагӣ намекунад. Аз мақомдорони тоҷик дар бораи муҳоҷирон ҳадди аксар шояд ягон вазир ибрози назар кунад. Ин ҳам хело бо эҳтиёт ва кӯтоҳ. Ман фикр мекунам, ки дар сатҳи президентҳо мавзуи муҳоҷирон матраҳ нест. Ин ҷанбаи дигар ҳам дорад. Раҳмон ҳеҷ вақт ҷуръат нахоҳад кард, ки ба Путин дар мулоқоти рӯбарӯ ё аз тариқи мактуб дар бораи поймол шудани ҳуқуқи муҳоҷирон чизе бигӯяд“.

Боздошти боз як зодаи Тоҷикистон дар Русия

Аз ҷониби
AZDA-TV
-
0

Мақомоти шаҳри Санкт-Петербурги Федератсияи Русия як муҳоҷири зодаи Тоҷикистонро боздошт карданд.

Бино ба иттилои расонаҳои русӣ, ин мард 37 сол дошта, бо иттиҳоми зархаридӣ дар Тоҷикистон дар кофтуков қарор доштааст.

Ин нафар, ки номаш маълум нест, пас аз содир кардани як дуздии хурд аз ҷониби мақомоти интизомии Русия дастгир шуда, маълум гаштааст, ки дар хоки ин кишвар ғайриқонунӣ қарор дорад.

Ба иддаои тафтишот, боздоштшуда узви созмони террористии ДИИШ буда, шаҳрвандони Тоҷикистон, бахусус сокинони минтақаи Хатлонро барои ширкат дар амалиёти ҷангӣ дар Сурия ҷалб мекардааст.

Дар Тоҷикистон ин мард ғоибона ба ҳабс гирифта шуда, ҳанӯз маълум нест, ки кай ба мақомоти Тоҷикистон супорида мешавад.

Инчунин назари мақомоти Тоҷикистон ва худи гумонбару адвокаташ дар ин бора дастраси расонаҳо нашудааст.

1...606162...675саҳифаи 61 аз 675

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
overcast clouds
21.1 ° C
21.1 °
21.1 °
43 %
1kmh
98 %
Sun
38 °
Mon
36 °
Tue
38 °
Wed
39 °
Thu
38 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст