Хона блог саҳифа 61

Боздошти гумонбари қатли Муҳаммадалӣ Саъдуллоев

Аз ҷониби
AZDA-TV
-
0

Мақомоти тафтишотии Тоҷикистон Сулаймон Одинаев, сокини 19-солаи шаҳри Кӯлобро бо иттиҳоми қатли размикори ҷавон Муҳаммадалӣ Саъдуллоев боздошт кард.

Гуфта мешавад, Одинаев ҳамчунин ба захмӣ кардани ду ҷавони дигар бо корд гумонбар буда, нисбаташ бо иттиҳоми “Расонидани зарари вазнин ба саломатӣ, ки боиси ҳалокати инсон мешавад” ва “авбошӣ” парванда боз шудааст ва дар сурати исбот шудани иттиҳомот ба Сулаймон аз 12 то 20 соли зиндон таҳдид мекунад.

Назари худи ин ҷавони 19-сола ба иттиҳомоти мақомот дастрас нест, аммо як хешаш бо номи Фариза ба Радиои Озодӣ гуфтааст, ки гӯё Муҳаммадалӣ бо дӯстонаш Сулаймон Одинаевро азият додааст ва ӯ маҷбур шудааст, ки “худро бо корд муҳофизат кунад”. Пайвандони варзишгари кушташуда ин гуфтаҳоро рад карда, иддао кардаанд, ки ӯ як ҷавони беозор буд.

Ёдовар мешавем, ки шаби 11-уми январ дар шаҳри Кӯлоб кордкашӣ ва занозании гурӯҳие рух дод, ки дар натиҷаи он размикори ҷавон Муҳаммад Саъдуллоев кушта ва ду тани дигар, яке аз шикам ва дигаре аз даст захм бардошта, дар бемористон қарор доранд.

Чун мақомоти расмии кишвар то ҳол ин ҳодисаро шарҳ надодаанд, фарзияҳои сабаби сарзадани ин занозании маргбор гуногунанд.

Пештар Камол Валиев, устоди Муҳаммадалӣ Саъдуллоев бо тасдиқи ин ҳодиса ба расонаҳо гуфта буд, ки муноқиша дар пайи нофаҳмиҳои лафзӣ дар яке аз марказҳои бозии компютерӣ сар задааст.

Аммо дертар Радиои Озодӣ дар истинод ба манобеаш аз мақомоти тафтишотӣ ва сокинони маҳаллаи Шамсиддин Шоҳини Кӯлоб навиштааст, ки баҳс аз “як телефони мобилӣ сар шудааст”. Ба иддаои онҳо, гӯиё Муҳаммадалӣ Саъдуллоев телефони мобилии Сулаймон Одинаевро барои ба ҷое занг задан гирифта, бозпас надодааст.

Ҳамчунин гуфта мешавад, ки занозанӣ дар Маркази бозиҳои компютерӣ оғоз нашуда, балки яке аз ҷавонон пас аз оғози кашмакаш ба ин марказ паноҳ бурдааст ва муноқиша онҷо идома кардааст.

Дар навори дурбинҳои назоратӣ ҳам дида мешавад, ки як нафар талош дорад, вориди Маркази бозиҳои компютерӣ шавад, вале каси дигаре ӯро бо мушту лагад мезанаду шаш нафар вориди марказ мешаванд ва яке зоҳиран бо корд ба се нафар ҳамла мекунад, ки яке аз онҳо Муҳаммадалӣ будааст.

Ба нақли шоҳидон, пас аз ҳамла Муҳаммадалӣ қалбашро бо дасташ медорад ва аз бинои марказ берун шуда, тақрибан дусад метр поинтар меравад ва баъдан аз пой меафтад ва ӯро ба беморхона мебаранд, вале ӯ онҷо ҷон медиҳад.

Гуфта мешавад, Муҳаммадалӣ Саъдуллоев дар риштаи муҳорибаҳои омехта тамрин мекард ва яке аз ҷавонони умедбахши варзиши тоҷик ба ҳисоб мерафт. Ӯ се маротиба қаҳрамони Тоҷикистон, аз ҷумла қаҳрамони соли 2024 дар ин ришта буд. Дар соли 2025 дар корномаи варзишии худ 8 ғалаба дар рақобатҳои касбӣ сабт карда буд. Инчунин ӯ барои иштирок дар мусобиқаи байналмилалӣ Муҳорибаҳои омехта ба шаҳри Абудабии Имороти Муттаҳидаи Арабӣ сафар намуда, дар он мусобиқа сазовори ҷои аввал гардида буд.

Боздошти ҷавоне бо силоҳи сард. Чаро ҷавонон бадахлоқ шудаанд?

Аз ҷониби
Azda TV 3
-
0

Маъмурони Раёсати Вазорати корҳои дохилии шаҳри Душанбе рӯзи 14-уми январ як ҷавони 21-солаи сокини пойтахтро бо иттиҳоми бо худ гардондани корд дастгир карданд.

Мақомот аз боздоштшуда Оев Бахтиёр ном бурдааст. Гуфта мешавад, зимни кофтуков аз номбурда як корд ва 22 донаи беҳушкунандаи дорои хусусияти нашъадор, маъруф ба “Лирика” дарёфт ва мусодира карда шуд.

Дар ҷараёни санҷиш муайян шудааст, ки Оев Бахтиёр қаблан барои содир намудани ҷинояти авбошӣ зиндонӣ шудааст. Ӯ баъд аз озодӣ боз “ба истеъмоли мунтазами воситаҳои гуногуни нашъадор машғул буда, бо истифода аз силоҳи сард тартиботи ҷамъиятиро вайрон мекардааст.”

Нисбати номбурда протоколи ҳуқуқвайронкунии маъмурӣ тартиб дода шуда, тибқи қарори додгоҳ ба ӯ ҷазо дар шакли 15 шабонарӯз ҳабси маъмурӣ таъин карда шудааст.

Пулиси пойтахт иттилоъ медиҳад, ки дар доираи амалиёти шартии “Корд” чорабиниҳои фаҳмондадиҳӣ, рейдҳо ва санҷишҳои пешгирикунанда дар самти ошкор ва пешгирии истифодаи силоҳи сард тақвият дода шудаанд. Мақомот аз шаҳрвандон даъват мекунанд, ки бо эҳсоси масъулияти шаҳрвандӣ дар пешгирии чунин ҳолатҳо саҳм гузоранд.

Ин дар ҳолест, ки шаби 10 ба 11-уми январи соли 2026 варзишгари ҷавони тоҷик Муҳаммадалӣ Саъдуллоев, 19-сола, дар ҷараёни як муноқиша дар яке аз марказҳои бозиҳои компютерӣ бар асари зарбаи корд ба ҳалокат расид. Ин ҳодиса дар ҷомеа вокуниши густарда ба бор оварда, боиси нигаронии ҷиддӣ аз вазъи ахлоқӣ ва рафтори ҷавонон гардидааст.

Ба бовари коршиносон, чандин омил ба бадшавии вазъи ахлоқӣ ва рӯй овардани ҷавонон ба ҷиноят ва истеъмоли маводи нашъадор мусоидат мекунад.

Яке аз сабабҳои асосӣ, ба гуфтаи онҳо, камранг шудани нақши падарон дар тарбияи фарзандон мебошад. Дар ҷомеаи имрӯза, бинобар муҳоҷирати кории аксари падарон ба хориҷ аз кишвар, бисёре аз кӯдакон аз назорат ва роҳнамоии мустақими падарон маҳрум мемонанд. Коршиносон таъкид мекунанд, ки гарчанде модарон нақши муҳим доранд, вале тарбияи комили фарзандон дар танҳоӣ барои онҳо кори осон нест.

Омили дигар дур мондани ҷавонон аз омӯзишҳои динӣ арзёбӣ мешавад. Бо назардошти он ки беш аз 90 дарсади аҳолии кишвар мусалмонанд, таълимоти динӣ метавонад дар тарбияти ахлоқӣ ва рафтори солими ҷавонон нақши муассир дошта бошад. Дар ислом истифодаи зӯровари масрафи маводи масткунанда мамнуъ гуноҳ шуморида мешавад, ки ин худ метавонад омили боздоранда бошад.

Коршиносон ҳамчунин сифати пасти таълим дар мактабҳо, сарфи беҳудаи вақти ҷавонон дар бозиҳои электронии дорои унсурҳои зӯроварӣ ва дурии падарон ба сабаби муҳоҷирати кориро аз сабабҳои аслии бадахлоқии ҷавонон медонанд.

Бунёди нерӯгоҳҳои офтобӣ дар Тоҷикистон: лимит аз байн меравад?

Аз ҷониби
AZDA.TV
-
0

Дар вилояти Суғд ва Хатлони Тоҷикистон барои бори аввал ду нерӯгоҳи барқи офтобӣ бо иқтидорӣ 500 МВт сохта мешавад.

Бино ба иттилои Кумитаи сармоягузорӣ ва идораи амволи давлатии Тоҷикистон, 13-уми январи соли 2026 байни ҳукумат ва ҶДММ “Аён Энерҷӣ” созишномаи сармоягузорӣ барои сохтмони ду нерӯгоҳи бузурги офтобӣ бо иқтидори умумии 500 МВт ба имзо расид. Мақомот ин иқдомро оғози марҳалаи нав дар рушди энергетикаи “сабз” ва таҳкими истиқлолияти энергетикӣ арзёбӣ мекунад.

Гуфта мешавад, мувофиқи созишнома ду нерӯгоҳ, ки яке дар ноҳияи Ашт ва дигарӣ дар ноҳияи Ҷайҳун сохта мешавад ва ҳар кадом 250 МВт нерӯи барқ аз офтоб истеҳсол мекунанд. Ин нахустин бор дар таърихи Тоҷикистон аст, ки нерӯгоҳи барқии офтобӣ бо чунин иқтидор иҷро мешавад.

Тибқи созишнома, сармоягузор уҳдадор шудааст, ки корҳои лоиҳакашӣ, сохтмон ва ба истифода додани ҳар ду нерӯгоҳи офтобиро то поёни соли 2026 ба анҷом расонад. Ҳаҷми умумии сармоягузорӣ дар доираи ин лоиҳа 250 миллион доллари ИМА-ро ташкил медиҳад.

Ба гуфтаи мақомот, нерӯгоҳҳои офтобӣ ба таҳкими истиқлолияти энергетикии кишвар, коҳиши норасоии мавсимии нерӯи барқ, бахусус дар фасли зимистон, сабук гардидани сарбории низоми энергетикӣ ва таъмини устувори аҳолӣ ва иқтисоди миллӣ бо нерӯи барқ кумак мекунанд.

Аммо коршиносон таъкид мекунанд, ки Тоҷикистон то ҳол таҷрибаи амалии татбиқи лоиҳаҳои бузурги нерӯи офтобиро надорад ва ин ҳам дар ҳолест, ки энергетикаи кишвар то ҳанӯз ба барқи обӣ вобастагии сахт дорад.

Яке аз нуқтаҳои баҳсбарангези ин лоиҳа уҳдадории сармоягузор барои анҷоми пурраи корҳои лоиҳакашӣ, сохтмон ва ба истифода додани нерӯгоҳҳо дар давоми танҳо як сол — то поёни соли 2026 мебошад. Бо дарназардошти таҷрибаи қаблии кишвар дар татбиқи лоиҳаҳои бузурги инфрасохторӣ, ки аксаран бо таъхир, болоравии арзиш ва номуайяниҳои молиявӣ рӯ ба рӯ шудаанд, иҷрои чунин муҳлати кӯтоҳ шубҳаовар арзёбӣ мегардад.

Ба гуфтаи бархе таҳлилгарон, барои нерӯгоҳҳои офтобӣ бо иқтидори 500 МВт ва он ҳам бо маблағи 250 миллион доллар эҳтимол метавонад кам бошад. Вале мақомоти тоҷик мисли ҳамеша ҷузъиёти манбаъҳои маблағгузории чунин лоиҳаҳоро намегӯянд, коршиносон тахмин мезананд, ки шояд замонатҳои давлатие дар миён бошад, чун мақомот ҷузъиёти ин лоиҳа, аз ҷумла тартиби хариди нерӯи барқро то ҳол ба таври ошкор ба ҷомеа пешниҳод накардаанд.

Оғози ин лоиҳа дар ҳолест, ки ҳамасола дар кишвар норасоии нерӯи барқ ба шиддат эҳсос мешавад ва мақомот пайвста сабаби бебарқиро ба камобӣ дар обанборҳо рабт медиҳанд. Таҳлилгарон мепурсанд, ки бо тавлиди ин миқдор нерӯи барқи офтобӣ оё таъсире дар маҳдудияти барқ мегзорад ё на? То ҳанӯз маълум нест ин лоиҳа дар самти таъмини барқ ба аҳолӣ то куҷо муваффақ мешавад.

Гуфтугӯҳои Тоҷикистону Олмон оид ба таҳкими ҳамкориҳои дуҷониба

Аз ҷониби
Azda TV 3
-
0

Намояндагони Тоҷикистон ва Олмон 13-уми январи соли 2026 дар пойтахти Олмон, шаҳри Берлин даври навбатии гуфтугӯҳои сиёсиро баргузор карданд.

Дидори навбатии машваратҳои сиёсӣ миёни Тоҷикистону Олмон таҳти роҳбарии муовини якуми вазири корҳои хориҷии Ҷумҳурии Тоҷикистон Фаррух Ҳамрализода ва ваколатдори Вазорати федеролии корҳои хориҷии Олмон доир ба ҳамкорӣ бо кишварҳои Аврупои Шарқӣ, Қафқоз ва Осиёи Марказӣ Никлас Вагнер баргузор гардидааст.

Бино ба иттилои Вазорати корҳои хориҷии Тоҷикистон, дар ҷараёни ин мулоқот ҳолати кунунии равобити ду кишвар ва роҳҳои тавсеаи он дар бахшҳои сиёсат, иқтисод, тиҷорат, сармоягузорӣ, энергетика, маориф ва фарҳанг мавриди баррасӣ қарор гирифт. Ҷонибҳо ҳамчунин назарҳои худро дар бораи масъалаҳои муҳими минтақавӣ ва ҷаҳонӣ, ҳамкориҳо дар доираи созмонҳои байналмилалӣ ва ҳамоҳангии бештар дар соҳаи обу иқлим ва ҳифзи пиряхҳо иброз доштанд.

Дар ин сафар, Фаррух Ҳамрализода ҳамчунин бо Михаэл Ҳармс, мудири иҷроияи Кумитаи шарқии иқтисоди Олмон, мулоқот анҷом додааст. Дар ин дидор ҷонибҳо масъалаҳои густариши ҳамкориҳои иқтисодиву тиҷоратӣ, ҷалби сармоя, рушди саноат ва кишоварзӣ, истифодаи имкониятҳои гидроэнергетикӣ, пешбурди сайёҳӣ ва ташкили чорабиниҳои муштарак дар Душанбе ва Берлин баррасӣ шуданд.

Дар ҳоле сухан аз рушди ҳамкориҳои сиёсӣ ва иқтисодии байни Тоҷикистон ва Олмон меравад, ки аксар мухолифони режими худкомаи Эмомалӣ Раҳмон дар Олмон паноҳанда шудаанд. Назари мунтақидони ҳукумат ҳам ин аст, ки мақомоти тоҷик бо таҳкими ҳамкориҳояш бо кишварҳои аврупоӣ бештар талош мекунанд, ки кишварҳои мизбонро қонеъ созанд ва мухолифони худро ба кишвар бозпас гардонанд.

Афтид ё афтонданд? Марги як додрас ба сабаби афтодан аз ошёнаи 9-ум

Аз ҷониби
AZDA-TV
-
0

Ҷамшед Ҷамшедзода, додраси Додгоҳи конститутсионии Тоҷикистон аз хонааш аз ошёнаи 9-уми биное дар шаҳри Душанбе афтода, ҷон додааст.

Бино ба иттилои Радиои Озодӣ ин ҳодиса пеш аз нисфирӯзии 13-уми январ дар маҳаллаи Гулистон ва ё маъруф ба “Сирк” рух додааст.

Дар маҳали ҳодиса гурӯҳе аз мардум ва кормандони милиса низ ҷамъ омада, як маъмури милиса афтодани додрасро ба ин расона тасдиқ карда, гуфтааст, ки тафтиши ҳодиса идома дорад ва ҷузъиётро баъдан маълум хоҳанд кард.

Маълум нест, ки ин мақомдори тоҷик тасодуфан афтодааст ё худро партофтааст ва ё ӯро касе куштааст.

Гуфта мешавад, Ҷамшед Ҷамшедзодаи 52-сола зодаи деҳаи Шоди ноҳияи Роштқалъа, соҳиби се фарзанд будааст. Ӯ аз соли 2011 то соли 2019 узви Комиссияи марказии интихобот ва раъйпурсии Тоҷикистон буда, соли 2019 бо пешниҳоди раисҷумҳури худкомаи Тоҷикистон Эмомалӣ Раҳмон додраси Додгоҳи конститутсионӣ интихоб шуда буд.

Дар ҳолати ҷангӣ ҳам сокинони Украина барқ доранд. Дар Тоҷикистон чӣ?

Аз ҷониби
AZDA-TV
-
0


Пас аз ҳамлаи мушакии Русия дар шаби 8-уми январи соли ҷорӣ, ки инфрасохтори энергетикии Днепр зарари ҷиддӣ дид, сокинони баъзе аз ноҳияҳои ин шаҳр беш аз чор шабонарӯз аст, ки бе барқ мондаанд.

Дар робита ба вазъияти душвори пешомада, мақомоти шаҳр ба чораҳои изтирорӣ даст зада, генераторҳои сайёрро назди биноҳои истиқоматӣ бурда, мардумро бо барқ таъмин карданд.

Яке аз чунин генераторҳоро шаҳрдори Днепр Борис Филатов нишон дода, ба расонаҳо гуфтааст, ки ширкатҳои энергетикӣ наметавонанд қисме аз ноҳияҳои соҳили чапи Днепрро зуд ба шабака пайваст кунанд, бинобар ин қарор қабул шуд, ки хонаҳои бисёрошёнаро мустақиман аз генераторҳои сайёр бо барқ таъмин намоянд.

Шаҳрдор ҳамчунин таъкид карда, ки корҳо дар шароити ниҳоят мушкил анҷом дода шуда, ҳарорати ҳаво то –12 дараҷа паст шудааст ва ҳатто сӯзишвории дизелӣ ях мебандад. Ба гуфтаи ӯ, баъзе энергетикҳо беш аз 72 соат хоб накардаанд ва маҷбуранд назди генераторҳо истироҳат ва сокинонро бо барқ таъмин кунанд.

Дар пасманзари рӯйдодҳои Украина, вазъият дар баъзе кишварҳои осоишта боз ҳам барҷастатар менамояд. Аз ҷумла, дар Тоҷикистон, ки дар он ҷо ҷанг ва ҳамла ба инфрасохтори энергетикӣ вуҷуд надорад, солҳост лимити нерӯи барқ, махсусан дар фасли тирамоҳу зимистон ҷорӣ аст.

Мақомотии Тоҷикистон қатъшавӣ ва маҳдудиятҳои барқро ба “шароити обу ҳаво” ва “норасоии об” дар обанборҳо барои нерӯгоҳҳои барқи обӣ рабт медиҳанд. Дар натиҷа, сокинони бисёре аз ноҳияҳои деҳот ва ҳатто шаҳрҳо ҳамагӣ 2 соат барқ доранд, ки вазъи зиндагии сокинонро ин ҳолат бадтар кардааст.

Ба гуфтаи таҳлилгарон, ин тафовут бозгӯйи он аст, ки на ҳама чиз танҳо ба шароити беруна вобаста буда, балки бисёр чиз аз авлавиятҳои сиёсати мақомдорони кишварҳо низ рабт дорад.

Созишномаи будубоши шаҳрвандони Тоҷикистону Қирғизистон тасвиб шуд

Аз ҷониби
Azda TV 3
-
0

Маҷлиси намояндагони Тоҷикистон рӯзи 9-уми январи соли 2026 созишномае миёни Тоҷикистон ва Қирғизистонро ба тасвиб расонид, ки бар асоси он шаҳрвандони ҳар ду кишвар метавонанд то 60 рӯз бидуни бақайдгирии расмӣ дар қаламрави якдигар ҳузур дошта бошанд.

Ба гуфтаи намояндагони парлумон, тарҳи ин созишнома ҳанӯз 1-уми феврали соли 2018 дар шаҳри Душанбе ба имзо расида буд. Аммо ба сабаби даргириҳои мусаллаҳона миёни ду кишвар сари марзҳои муштарк, иҷрои он ба таъхир афтод.

Гуфта мешавад, “Созишнома байни Тоҷикистон ва Қирғизистон дар бораи тартиби будубоши шаҳрвандон” ба танзими ҳуқуқии сафар ва иқомати муваққатии шаҳрвандони ду кишвар дахл дорад.

Муовини аввали вазири корҳои дохилии Тоҷикистон Абдураҳмон Аламшозода зимни муаррифии созишнома дар парлумон гуфта, ки созишнома ба таҳкими муносибатҳои дӯстона, осон кардани рафтуомад ва фароҳам овардани шароити мусоид барои шаҳрвандони ҳар ду давлат мусоидат мекунад. Ба гуфтаи ӯ, дар созишнома тартиби воридшавӣ, будубоши муваққатӣ ва ҳуҷҷатҳои зарурӣ пешбинӣ шудаанд.

Ҳамчунин вакили парлумон Шуҳрат Ғанизода дар суҳбат ба “Азия-Плюс” ин созишномаро шаҳрдода, таъкид кардааст, ки мутобиқи ин созишнома шаҳрвандони Тоҷикистон ва Қирғизистон ҳақ доранд то 60 рӯз бе сабти расмӣ дар қаламрави якдигар қарор дошта бошанд. Ба гуфтаи ӯ, ин иқдом ба ҳифзи ҳуқуқ ва манфиатҳои шаҳрвандони ҳар ду кишвар мусоидат хоҳад кард.

Ин қарор дар ҳоле қабул мешавад, ки моҳи марти соли 2025 президентҳои Тоҷикистон ва Қирғизистон Эмомалӣ Раҳмон ва Содир Ҷабборов дар шаҳри Бишкек созишномаи ниҳоӣ оид ба муайянсозии марзи давлатии ду кишварро ба имзо расониданд.

Пас аз имзои раисҷумҳурон, бо ҳузури сарони давлатҳо ду гузаргоҳи марзӣ боз гардид, марзе, ки беш аз чор сол баста буд, расман дубора фаъол шуд. Рӯзҳои 18–19-уми марти соли 2025 парлумонҳои ҳар ду кишвар ин санадро тасдиқ карданд.

Қуръакашии Ҷоми ФФТ-2026: 10 даста дар минтақаи Душанбе ба рақобат мепардозанд

Аз ҷониби
Azda TV 3
-
0

Дар шаҳри Душанбе рӯзи 12-уми январ маросими қуръакашии марҳилаи пешакии Ҷоми Федератсияи футболи Тоҷикистон-2026 баргузор гардид.

Тибқи иттилои Федератсияи футболи Тоҷикистон, мусобиқа пеш аз оғози мавсими нав доир шуда, ба унвони яке аз рақобатҳои муҳими сол ба ҳисоб меравад.

Марҳилаи аввал дар се минтақа — Душанбе, Суғд ва Хатлон сурат мегирад. Дар минтақаи Душанбе бозиҳо аз 23-уми январ оғоз ёфта, 10 даста барои роҳхат ба даври ниҳоӣ мубориза мебаранд.

Пас аз қуръакашӣ дастаҳо ба ду гурӯҳ ҷудо шуданд. Аз ин минтақа танҳо чаҳор дастаи пешсаф имкон пайдо мекунанд, ки ба марҳилаи ниҳоии Ҷоми ФФТ-2026 роҳ ёбанд.

Таркиби гурӯҳҳо дар минтақаи Душанбе:

Гурӯҳи «А»: «Рангон», «Сардор», «Регар-ТадАЗ», «Шоҳмансур», «Шодмон».
Гурӯҳи «Б»: «Душанбе», «Ҳосилот», «Саройкамар», КМВА, «Барқчӣ».

Ҷоми Федератсия бо фонди умумии ҷоизавии 100 ҳазор сомонӣ баргузор мегардад. Ғолиби мусобиқа бо 50 ҳазор сомонӣ қадрдонӣ мешавад. Барои ҷойи дуюм 30 ҳазор сомонӣ ва барои ҷойи сеюм 20 ҳазор сомонӣ мукофотпулӣ пешбинӣ шудааст.

Афзоиши омори кушташудаҳо дар эътирозҳои хиёбонии Эрон

Аз ҷониби
AZDA.TV
-
0

Дар пайи эътирозҳои хиёбонӣ дар Ҷумҳурии исломии Эрон наздики 650 нафар аз тазоҳургарон ва ҳудуди 110 нафар аз маъмури интизомӣ кушта шудаанд.

Расонаи ғайридавлати “Ҳароно”, ки марбут ба гурӯҳҳои мухолифи режими Эрон аст, дар як гузорише аз кушта шудани 250 нафар танҳо дар шаҳри Каҳрезаки шаҳристони Рай, ҷануби Теҳрон хабар додааст. Ин расона омори кушташудагон дар тазоҳуроти Эронро ҳудуди 540 нафар мегӯяд. Аммо то ҳол оморҳои расмие вуҷуд надорад, ки ин гуфтаҳоро тасдиқ кунад.

Дар ҳамин ҳол Созмони Дидбони ҳуқуқи башар (Human Rights Watch) дар гузорише рӯзи сешанбе омори кушташудагон аз ҷониби тазоҳургаронро 648 нафар эълон кард. Ин созмони байналмилалӣ таъкид мекунад, ки омори пешниҳодшуда ҳадди ақал аст ва шояд омори воқеӣ аз ин ҳам бештар бошад. Дар гузориши ин созмон гуфта мешавад, ки мақомоти эронӣ дасти кам то 10 ҳазор нафар аз тазоҳургаронро боздошт кардаанд.

Аммо расонаҳои давлатӣ аз Абдураҳим Мусавӣ, раиси Ситоди кулли Нерӯҳои мусаллаҳи Эрон анвиштанд, ки мегӯяд, Исроил ва Амрико бо истифода аз вазъи ноороми кишвар гурӯҳҳои силоҳбадасти аъзои ДИИШ-ро барои куштани нерӯҳои амниятӣ, интизомӣ ва мардуми осоишта вориди Эрон кардаанд.

Хабаргузории давлатии Эрон – “Тасним” иттилоъ дод, ки ҷомеаи варзишии кишвар аз мардум талаб намуда, ки бар зидди тазоҳургарон ба майдо бароянд. Ин расонаи давлатӣ мегӯяд, ҷомеаи варзишии кишвар аз ҳама мардум, бавежа варзишгарон даъват намуда, ки 12-уми январ дар саросари кишвар ба майдонҳо бароянд ва “мушти маҳкаме бар даҳони террористҳои амрикоии саҳюнистӣ бизананд.”

Ин дар ҳолест, ки мавҷи эътирозҳо дар ин кишвар то рафт афзоиш ёфта, аксар шаҳру вилоятҳои ин кишвар шоми рӯзи душанбе низ шоҳиди таҷаммуоти густарда буданд. Эътирозгарон бар иловаи талаби ислоҳоти вазъи иқтисодӣ, инчунин истеъфои ҳукуматро низ талаб доранд. Дар шабакаҳои иҷтимоӣ наворҳое паҳн гашта, ки гуфта мешавад, бархе аз тазоҳургарони хиёбонӣ, ки маълум нест аз кадом гурӯҳанд, даст ба харобкориҳо зада, бинои давлатӣ, аз ҷумла идораҳои пулис ва амниятро ба оташ кашиданд.

Расонаи ББС ва дигар расонаҳои мухолифи Эрон аз манобеи худ менависанд, ки пулис дар либоси мардуми оддӣ дар байни эътирозгарон ворид шуда, ба сӯи мардум тир мекушоянд. Аммо расонаҳои давлатӣ Эрон мегӯянд, инҳо гурӯҳҳои махсуси силоҳбадасти ҷонибдори Исроилу Амрико ҳастанд, ки вориди майдонҳо шуда, нерӯҳои амниятӣ ва мардуми оддиро мекушанд.

Идомаи ҷойивазкунии мақомдорон

Аз ҷониби
AZDA-TV
-
0

Раисҷумҳури худкомаи Тоҷикистон Эмомалӣ Раҳмон соли 2026-ро бо таъйину ҷойивазкунии мақомдорон оғоз кард.

Имрӯз, 12-уми январ дар Додгоҳи олӣ, Додгоҳи олии иқтисодӣ, Вазорати корҳои хориҷӣ ва мақомоти дигари давлатӣ тағйироту ҷойивазкунии кадрҳо сурат гирифтааст.

Аз ҷумла, бо қарорҳои Ҳукумати Тоҷикистон собиқ муовини якуми вазири адлия Ализода Нигина, собиқ сафири Тоҷикистон дар Утриш Қаландар Идибек ва Бойзода Санои Шодӣ муовинони вазири корҳои хориҷии кишвар таъйин шудаанд.

Бо як қарори дигари Ҳукумат курсии холии директори Муассисаи давлатии “Институти илмию таҳқиқотии сайёҳӣ ва соҳибкорӣ”-ро соҳиб шудааст.

Ҳамчунин бо фармонҳои Эмомалӣ Раҳмон Ализода Довуд муовини якум ва Муқимӣ Дилором муовини директори Агентии назорат дар соҳаи маориф ва илми назди Президенти Ҷумҳурии Тоҷикистон таъин гардидаанд.

Дар идомаи ин тағйироту ҷойивазкуниҳо Раҳмон номзадии Кенҷазода Муҳаммадҷалолиддин, Ғуломзода Сафарбек, Сафарзода Маҳинабону, Раҳмонзода Икромро барои вазифаи додраси Додгоҳи олии Ҷумҳурии Тоҷикистон ва Нурализода Одилро барои вазифаи додраси Додгоҳи олии иқтисодии Ҷумҳурии Тоҷикистон ба Маҷлиси миллии Маҷлисии олии Ҷумҳурии Тоҷикистон пешниҳод карда, раисони додгоҳҳои шаҳру ноҳияҳои Сино, Шоҳмансур, Мурғоб, Шаҳристон, Вахш, Рашт, Ховалинг, Норак, Рӯдакӣ, ҳамчунин муовинони додрасҳоро дар додгоҳҳо ва додгоҳҳои иқтисодии вилоятҳои Хатлону Суғд, шаҳри Душанбе ва шаҳру ноҳияҳои кишвар иваз кардааст.

Бояд гуфт, ин ягона тағйиру ҷойивазкунии мақомдорон дар соли 2026 набуда, пештар раисҷумҳури худкомаи Тоҷикистон Эмомалӣ Раҳмон аксари раҳбарони сохторҳои Вазорати корҳои дохилӣ ва чанд раиси шаҳру ноҳияҳои кишварро низ иваз карда буд.

Тибқи маъмул дар Тоҷикистон ҳамасола тағйироти кадрӣ сурат мегирад ва аксари коршиносон ин тағйиротро шаклӣ ва ҷойивазкунӣ медонанд. Зеро ба гуфтаи онҳо, одатан Эмомалӣ Раҳмон дар тақсимоти мансабҳо ихтисосу донишу маҳоратро меъёр қарор намедиҳад, балки меъёр дар интихоби кадрҳо бештар маҳал ва шинос будану наздик будан ба хонавода аст.

1...606162...785саҳифаи 61 аз 785