Барои муҳоҷирони меҳнатӣ роҳи нав ба сӯи Русия боз мешавад. Муовини сарвазири Русия Марат Хуснуллин изҳор дошт, ки муҳоҷирони меҳнатӣ метавонанд на танҳо тавассути ҳавопаймо, балки ба воситаи роҳи оҳан ба Русия биёянд.

Ба гузориши хабаргузории “Спутник” Марат Хуснуллин, ки дар Форуми байналмилалии иқтисодии Санкт-Петербург (СПИФ) сухан мегуфт, баён дошт, ки “Мо кушиш мекунем, ки тавозуни манфиатҳоро пайдо кунем ва ба тавофуқ расидем, ки механизми ҳамоҳангсозӣ ва ворид кардани нерӯи кориро аз ҷониби ширкатҳои калон содда кунем. Ба низомнома тағйирот ворид карда шуд.”

Ҳамзамон вай афзуд, ки ба хотири пешгирӣ аз паҳншавии сирояти коронавирус муҳоҷирони меҳнатӣ ҳатман барои мавҷудияти COVID-19 озмоиш хоҳанд шуд. Ҳоло онҳо метавонанд бо ҳавопаймо биёянд, мо имкони омаданро тавассути роҳи оҳан баррасӣ кардем, яъне ин илова хоҳад шуд”, – шарҳ дод ӯ.

Ба гуфтаи ӯ, ҳоло дар Русия норасоии нерӯи корӣ дар сохтмонҳо тақрибан миллион нафарро ташкил медиҳад ва ин вазъро фалокатбор намуд. Бар ин асос нархи захираҳои меҳнатӣ дар Русия 50-100 дарсад афзуда аст.

Дар ҳамин ҳол роҳбари Департаменти сиёсати иқтисодӣ ва рушди шаҳрҳои Маскав Кирилл Пуртов гуфт, ки тақрибан 7 ҳазор муҳоҷири корӣ бо дархости 13 ширкат ба зуди ба Маскав хоҳанд омад.

Ба гуфтаи ӯ, инҳо асосан шаҳрвандони Узбекистон мебошанд. Вай ёдовар шуд, ки Маркази муҳоҷирати Маскав чанде пеш дар Узбекистон намояндагии худро боз кард. Таъсиси намояндагӣ пеш аз ҳама ба талаботи зиёди нерӯи кори хориҷӣ вобаста буд. Пуртов дар идомаи суҳбаташ гуфт:

“Ҳоло мо дархостҳо барои воридоти 6800 муҳоҷирро бо дархости 13 ширкат, ки аксарашон шаҳрвандони Узбекистон ҳастанд тасдик кардем”.

Муовини шаҳрдори Маскав оид ба сиёсати иқтисодӣ-моликият ва муносиботи заминӣ Владимир Ефимов маҳдудиятҳои мавҷуда барои вуруди муҳоҷирони меҳнатӣ ба Русияро аз ҳад зиёд номид.

Муҳоҷирони меҳнатӣ аз ин пас муваззафанд, ки қоидаҳои навро риоя намоянд. Муҳоҷирони меҳнатӣ бояд дар мавзӯҳои иҷтимоӣ ба забони русӣ муошират кунанд, руйдодҳои асосии таърих ва шаҳрҳои Русияро донанд ҳамчунин дар бахши ҳуқуқӣ истифода баранд.

Тибқи гузориши хабаргузории “Спутник” ҳукумати Русия талаботи ба сатҳи ҳадди ақали донишро, ки шаҳрвандони хориҷӣ бояд барои кор дар Федератсияи Русия ниёз доранд, тасдиқ кард.

Бар асоси ин талаботи нав муҳоҷирони меҳнатӣ бояд имтиҳони ягонаи давлатиро бо забони русӣ ҳамчун забони хориҷӣ, инчунин таърихи Русия ва асосҳои қонунгузории Русия супоранд.

Тибқи қарори ҳукумати Русия барои гирифтани патент ё иҷозатномаи кор шаҳрвандони дигар кишварҳо бо забони русӣ ҳам дар мавзӯҳои иҷтимоӣ ва ҳам хонагӣ ва ҳам дар баъзе мавзӯҳои махсус муошират кунанд.

Пас муҳоҷирони меҳнатӣ бояд дуруст дар бораи шуғл маълумот диҳанд, ба пулис ва клиника муроҷиат кунанд. Ғайр аз он, донистани забони русӣ бояд барои гирифтани ариза ва хуҷҷатҳои зарурӣ кофӣ бошад.

Дар қарори ҳукумати Русия омада аст, ки муҳоҷирони меҳнатӣ вазифадор ҳастанд, ки муҳимтарин далелҳо ва руйдодҳои таърихи Русияро донанд.   Ҳамзамон шаҳрвандони хориҷӣ бояд шаҳрҳои калонтарини кишвар ва ҳамчунин таътилоти давлатиро дақиқ номбар намоянд.

Ҳангоми омодагӣ ба имтиҳон оиди донистани қонунгузории Русия бояд диққати асосӣ ба ҳуқуқҳо, озодиҳо, ӯҳдадориҳои барои шаҳрвандони хориҷи дахлдошошта дода шавад. Фармонро сарвазири кишвари Русия Михаил Мишустин имзо кард.

Чанде пеш маълум шуд, ки муддати эътибори шаҳодатномаи донистани забони русӣ ба муҳоҷирон иваз карда шуда аст. Агар қаблан шаҳрвандони хориҷӣ ҳар панҷ сол имтиҳон месупориданд, аз ин пас ҳар се сол имтиҳон хоҳанд супорид.

Ба мониторинги муштараки вазъи иқтисодӣ аз ҷониби мутахассисони “РАНХиГС” ва Институти Гайдар, пандемияи коронавирус ва баста шудани марзҳо боиси коҳиши назарраси шумораи хориҷиён дар Федератсияи Русия гардид.

Агар дар соли 2019 дар Федератсияи Русия вобаста ба моҳ аз 9,6 миллион то 11,2 миллион хориҷиҳо буданд, пас дар соли 2020 шумораи онҳо аз дар охири моҳи январ 10,3 миллион ва дар охири соли 2020 то 7,1 миллион коҳиш ёфт.

Дар соли 2021 коҳиши шумораи хориҷиён идома ёфт – то 1 май шумораи шаҳрвандони хориҷӣ дар кишвар 5,66 миллион нафарро ташкил дод.

Аксарияти онҳое, ки ба Федератсияи Русия меоянд (86%) шаҳрвандони кишварҳои ИДМ мебошанд, аммо шумораи онҳо дар соли 2020 – 39% коҳиш ёфт.

Беш аз ҳама, шумораи шаҳрвандони Украина ва Молдова коҳиш ёфтааст – 53% ва 51%, шаҳрвандони Қирғизистон (18%), Арманистон (22%) ва Тоҷикистон (35%).

Дар соли 2021, дар муқоиса бо соли 2020, шумораи шаҳрвандони кишварҳои Иттиҳоди Аврупо се маротиба  коҳиш ёфтанд (226 ҳазор)  – шумораи онҳо дар Федератсияи Россия дар 10 соли охир пасттарин ба шумор мерафт.

То 1 майи соли 2021 шумораи муҳоҷирони меҳнатӣ 2,68 миллион нафарро ташкил дод.

Дар муқоиса бо соли 2020 шумораи муҳоҷирони меҳнатӣ сеяк коҳиш ёфтааст (35%), аз ҳама бештар – коргарони Украина (58% камтар), Молдова (52%) ва Озарбойҷон (49%). Ҳамчунин шумораи муҳоҷирони корӣ аз Қазоқистон ва Узбекистон 42%, аз Тоҷикистон – 37% коҳиш ёфтааст.

Шумораи муҳоҷирони меҳнатӣ аз Арманистон ва Қирғизистон, ки аъзои ЕАЭО мебошанд, камтар аз ҳама тағир ёфт – шумораи онҳо мутаносибан 17% ва 18% коҳиш ёфтааст.

Ба гузориши РАНХиГС  ва Институти Гайдар ҳиссаи муҳоҷирони меҳнатии қонунӣ дар қаламрави Русия қарордошта аз шумораи умумии онҳое, ки ба кор омадаанд, 75% -ро ташкил медиҳад.

Дар охири семоҳаи аввал муҳоҷирони меҳнатӣ барои хариди патент ба буҷаҳои минтақавӣ 8,91 миллиард рубл интиқол доданд (20% камтар аз ҳамин давраи соли 2020).