Раиси Вилояти Мухтори Кӯҳистони Бадахшон Алишер Мирзонабот ҳамроҳ бо аъзои хонавода ва ронандааш дар ноҳияи Дарвоз ба садама дучор шуда, мошини онҳо ба дарё зарозер шудааст.
Тибқи иттилои нашрияи Pamir Inside, Мирзонабот аз шаҳри Душанбе ба самти Бадахшон ҳаракат мекард. Ҷузъиёти ҳодиса ва сабабҳои рух додани он то ҳол расман эълон нашудааст.
Ду манбаи огоҳ аз ҳодиса гуфтаанд, ки ба маҳалли садама кормандони Кумитаи ҳолатҳои фавқулода ҷалб шуда, амалиёти ҷустуҷӯиву наҷотбахширо оғоз кардаанд.
Манбаи дигар низ рух додани садамаро тасдиқ кардааст, аммо гуфтааст танҳо дар бораи ба ҳодиса дучор шудани аъзои хонаводаи Мирзонабот маълумот дорад. Ба гуфтаи ӯ, дар бораи вазъи саломатӣ ва макони будубоши худи раиси ВМКБ ҳанӯз маълумоти дақиқ дастрас нест.
Дар ҳамин ҳол, дар шабакаҳои иҷтимоӣ наворе паҳн шудааст, ки дар он аз садамаи мошини дорои рақами давлатии махсуси 287 TJ сухан меравад. Ба гуфтаи шахсе, ки дар навор суҳбат мекунад, мошин бо суръати баланд аз роҳ берун шуда, пас аз бархӯрдан ба чанд сутун ба дарё сарозер шудааст.
Дар навори паҳншуда инчунин пораҳое аз мошини осебдида дида мешаванд, аммо мустақилона тасдиқ кардани замон ва макони сабти он имконпазир нест.
Ҳамзамон, як манбаъ рӯзи чоршанбе ба Azda TV низ рух додани ҳодисаро тасдиқ карда, гуфт, ки бар асари садама аъзои хонаводаи Алишер Мирзонабот ҷон бохтаанд. Ин маълумот то ҳол аз ҷониби мақомоти расмӣ тасдиқ ё рад нашудааст.
То замони нашри хабар мақомоти Тоҷикистон ё намояндагони ҳукумати ВМКБ вобаста ба ин ҳодиса изҳороти расмӣ нашр накардаанд.
Ҷузъиёти бештар дар бораи ҳодиса, шумори эҳтимолии қурбониён ва вазъи саломатии раиси ВМКБ ҳанӯз рӯшан нест. Интизор меравад мақомот дар соатҳои наздик дар мавриди ин ҳодиса тавзеҳ диҳанд.
