Гурӯҳе аз муҳоҷирони корӣ, ки шуморашон ба садҳо нафар мерасад, шикоят доранд, ки онҳоро аз хобгоҳе дар шаҳри Маскав берун кардаанд.
Дар ин бора як муҳоҷири тоҷик наворе дар фазои маҷозӣ нашр карда ва мегӯяд, ки тақрибан 500 муҳоҷир аз як хобгоҳ дар шаҳри Маскав берун карда шуданд. Ба гуфтаи ӯ, ҳатто маблағе, ки барои иҷора пардохт карда буданд, ба онҳо баргардонида нашудааст.
Дар навор дида мешавад, ки муҳоҷирон бо ҷомадонҳояшон дар кӯча назди ин хобгоҳ ҷамъ шудаанд.
То ҳол сабаби дақиқи ин ҳодиса маълум нест ва рӯшан нест, ки бо кадом асос ин муҳоҷирон аз ҷойи зисташон хориҷ карда шудаанд. Ва ин ки кадом ниҳоди интизомӣ ин корро карда бошад ва ё дар пайи амалиёти махсус ба берун ронда шудаанд ё на, низ чизе гуфта нашудааст.
Қобили зикр аст, ки ин гуна ҳолатҳо бори аввал нест, ки бар сари муҳоҷирони корӣ дар Русия рух медиҳад. Муҳоҷирони корӣ, бахусус шаҳрвандони Тоҷикистон дар Русия солҳои охир борҳо аз фишор, таъқиб, мушкилоти ҳуқуқӣ, шароити душвори кор ва зист, инчунин муносибати зишти мақомоти рус шикоят мекунанд.
