Вакилони парлумони Русия мегӯянд, надонистани забон боиси мушкилӣ дар ҳамгироии муҳоҷирон дар ҷомеа шудааст.
20-уми июни соли 2022, Виктор Смирнов, узви Кумитаи Думаи Давлатӣ оид ба маориф ба рӯзномаи расмии парлумони Русия гуфт, санҷиши дониш ва маҳорати сухангӯӣ бо забони русӣ дар Русия аз сабаби мушкилӣ дар ҳамгироии муҳоҷирон дар ҷомеа ба миён омад ва ин амр вакилони парлумонро водор карда, ки ба қонунгузории ҷорӣ ислоҳот ворид кунанд.
Қаблан Вазорати маориф ва илми Федератсияи Русия пешниҳод карда буд, ки ба тартиби супоридани имтиҳони забони русӣ барои шаҳрвандони хориҷӣ тағйирот ворид карда шавад. Смирнов таъкид кард, ки аз соли 2023 барқароршавии бозори меҳнат пешбинӣ шудааст.
Ба гуфти вакили парлумон, шахсе, ки барои дарёфти патент ё иҷозаи корӣ дар Русия қарор дорад, бояд дониши ҳадди ақалро дошта бошад, ки дар кадом ҷомеа будани худро дарк кунад.
«Омӯхтани забон худ як раванди тарбиявӣ низ ҳаст. Донистани забон барои ҳимояи ҳуқуқҳои худ дар мақомоти ҳифзи ҳуқуқ низ зарур аст. Ба назари ман, Вазорати маориф ва илм чизеро тағйир надодааст. Аммо илова бар имтиҳони хаттӣ, ҳатман бояд имтиҳони даҳонӣ низ бошад”, - таъкид кард Смирнов.
Гуфта мешавад, имтиҳонҳо барои шаҳрвандони хориҷӣ ва шахсони бешаҳрвандӣ дар се дараҷа гузаронида мешавад: барои гирифтани иҷозатномаи корӣ ё патент (дараҷаи 1), иҷозаи иқомати муваққатӣ ё “РВП” (дараҷаи 2), иҷозаи иқомати доимӣ ё “ВНЖ” (дараҷаи 3).
