23.2 C
Dushanbe

Мулло Абдулҳаннон ба 6 соли зиндон маҳкум шуд

Додгоҳи вилояти Хатлон мулло Абдулҳаннон Усмонов (Маннонов) – қаҳрамони навори баҳсбаренгез дар шабакаҳои иҷтимоиро барои 6 сол равонаи зиндон кард. 

Мурофиаи додгоҳии ин рӯҳонии 51-сола охири ҳафтаи гузашта баргузор шуда, додрас ӯро бо иттиҳоми даъват ба ифротгароӣ гунаҳкор кардааст.

Вакили дифоъ Саидҷаббор Алиев рӯзи 11-уми апрел дар суҳбат ба Радиои Озодӣ эълони ҳукмро тасдиқ карда, аз рафти мурофиа тафсилот надодааст. 

Назари худи маҳкумшуда ва пайвандонаш дастраси расонаҳо нест ва маълум нест, ки оё қасди аз болои ҳукм шикоят бурдан доранд ё не. 

Дар ҳоле Абдулҳаннон Усмонов ба 6 соли зиндон маҳкум мешавад, ки мақомот се моҳ парвандаашро тафтиш кардаанд ва худи ӯ дар ин муддат дар Боздоштгоҳи муваққатӣ қарор доштааст. 

Мақомот то ҳол аз ҷузъиёти парвандаи ин рӯҳонии тоҷик чизе нагуфтаанд. 

Моҳи январи соли ҷорӣ дар шабакаҳои иҷтимоӣ наворе нашр шуд, ки дар он ин рӯҳонии тоҷик вориди ҳавлие мешавад, ки дар он туйи домодӣ мегузашт, ӯ дар ҳол монеи рақсу бозии мардум мешавад ва меҳмонони тӯйро аз хона меронад. 

Ин навор баҳсҳои зиёдеро дар шабакаҳои итҷимоии тоҷикӣ ба бор оварда, корбаронро ба ду гурӯҳ, тарафадор ва мухолифи ин амал тақсим карда буд.

Дертар маълум гашт, ки Абдулҳаннон Усмонов, сокини ҷамоати Меҳнатободи ноҳияи Кӯшониён ва имомхатиби масҷиди ин минтақа буда, домод бародарзодааш будааст. 

Рӯзи 27-уми январи соли ҷорӣ ВКД-и Тоҷикистон дар барномаи телевизионии “Ахбори ВКД” аз боздошт ва ҷазо додани ин рӯҳонӣ хабар дода буд. Аммо дар он дақиқ гуфта намешуд, ки мақомот нисбати ин рӯҳонӣ чӣ навъи ҷазоро татбиқ кардаанд.  

Абдулҳаннон Усмонов дар баёноташ гуфта буд, ки аз пеш писари бародарашро огоҳ кардааст, ки тӯяшро бидуни мусиқию рақсу бозӣ, дар чорчӯби тӯйи исломӣ барпо кунад, вале домод ба ин таъкиди ӯ гӯш надодааст.

Дар наворе, ки ВКД нашр кардааст, мулло Абдулҳаннон мегӯяд, ки аз ин амали бародарзодааш асабӣ шуда, худро идора карда натавонистааст ва базми тӯёнаро вайрон кардааст. Ӯ дар идома бахшиш пурсида гуфт, ки “як хато кардем. Умед аст, ки хатои мо ислоҳ мешавад”. 

Аксари корбарон ин амалкарди рӯҳонии тоҷикро кори шахсӣ ва хонаводагии ӯ дониста, боздошт ва зиндонӣ шуданашро аз ҷониби мақомот ғайриқонунӣ медонанд. Ба гуфтаи яке аз корбарон, ки дар суҳбати хусусӣ бо Azda tv дошт, “мақомот дар умури хонаводагӣ ва хусусии мардум набояд дахолат кунад ва агар ин рафтори рӯҳонӣ мухолифи қонун мебуд, бояд бо ҷазои сабуктаре, ба монанди ҷарима озод мешуд. Аммо ҳукумати Тоҷикистон, ки чанд соли ахир нисбати дигарандешон, бахусус диндорон мавқеи сахтеро пеш гирифтааст, дар андактарин хилофкорӣ шаҳрвандонро барои солҳои тӯлонӣ равонаи зиндон мекунад.”

Хабарро таблиғ кунед:

БЕШТАР БИХОНЕД
БЕШТАР БИХОНЕД

Бозгашти нахустин гурӯҳи зоирони тоҷик

Нахустини гурӯҳи зоирони тоҷикистонӣ баъд аз анҷоми маросими Ҳаҷ-2024 аз Арабистони Саудӣ ба Ватан баргарштанд.

Нопадид шудани панҷ сокини Язгулом дар фурӯдгоҳи Кӯлоб

Панҷ нафар аз сокинони ноҳияи Язғулом дар фурӯдгоҳи шаҳри Кӯлоб нопадид шудаанд. Дар ин бора хешовандонашон ба расонаҳо дар Тоҷикистон хабар додаанд. 

Ҳамлаи террористӣ дар Доғистон 20 кушта ба ҷо гузошт

Бино ба иттилои Вазорати корҳои дохилии Русия, шаби 23-уми...

Абдусалом Одиназода аз зиндон озод шуд

Абдусалом Одиназода, донишманди тоҷики муқими Австралия баъд аз 3,5 соли зиндон рӯзи 19-уми июн ба озодӣ баромад.