Эмомалӣ Раҳмон бо Шавкат Мирзиёев дар шаҳри Тошканд, пойтахти Узбекистон мулоқот кард.
Бино ба иттилои расмӣ, рӯзи 9-уми ноябри соли 2023 Президенти Тоҷикистон бо сафари расмӣ вориди Узбекистон шуд ва бо Президенти ин кишвар Шавкат Мирзиёев мулоқот кард.
Ба қавли манбаъ, ҳадаф аз ин сафари Президенти Тоҷикистон ба Узбекистон иштирок дар 16-умин нишасти сарони кишварҳои узви Созмони ҳамкории иқтисодӣ (СҲИ) мебошад.
Эмомалӣ Раҳмон дар ҳошияи ин нишасти минтақавӣ бо ҳамтои узбекистониаш Шавкат Мирзиёев мулоқот кард. Инчунин Президенти Тоҷикистон дар ин нишаст ширкат ва суханронӣ намуда, аз ҷумла гуфт, ки зарфиятҳои иқтисодии ин созмон барои рушд ва тавсеаи кишварҳои узв ҳанӯз пурра истифода нашудааст.
Бо вуҷуди он ки Афғонистон яке аз кишварҳои узви ин созмон аст, дар ин нишаст намояндаҳои воломақоми Толибон, ки ҳоло раҳбарии Афғонистонро дар даст доранд, касе даъват нашуда буд.
Аммо Президенти Узбекистон дар ишора ба Афғонистон ва вазъи кунунуии он гуфта, ки “мо наметавонем иҷоза диҳем, ки як кишвари чандмиллиятӣ, ки дар тӯли асрҳо наздиктарин ҳамсояи мост, бо нақшҳои мураккаби кунунии худ танҳо монад.” Бояд ба он кумак карда шавад, то аз буҳрони мавҷуди иқтисодӣ хориҷ шуда, шароити мардумаш беҳтар шавад.
Гуфта мешавад, Созмони ҳамкории иқтисодӣ (СҲИ) як созмони иқтисодӣ-сиёсӣ ва фарҳангии минтақавӣ буда, “соли 1985 аз ҷониби Ҷумҳурии Исломии Эрон, Ҷумҳурии Туркия ва Ҷумҳурии Исломии Покистон пас аз бастани Паймони Измир таъсис дода шудааст.
Дар соли 1992 ҳафт кишвар, аз ҷумла Афғонистон, Қазоқистон, Қирғизистон, Озарбойҷон, Тоҷикистон, Туркманистон ва Узбекистон узви СҲИ шудаанд. 28 ноябр, яъне таърихи аъзошавии давлатҳои зикргардида рӯзи СҲИ эълон гардидааст.
