Далери Имомалӣ хабарнигори тоҷик, дар шабакаи ютубии худ бо сухангӯи ширкати “Барқи тоҷик”, Нозирҷон Ёдгорӣ дар мавриди лимити барқ ва корҳои профлактикии ин ширкат дар истгоҳҳои барқӣ мусоҳиба анҷом додааст.
Дар ин мусоҳиба сухангӯи ширкати “Барқи тоҷик” мегӯяд, корҳои профилактикӣ дар кишвар қариб пурра ба анҷом расидааст, вале рӯзи дақиқи ба анҷом расидани корҳои таъмириро нагуфтааст. Танҳо иброз доштааст, ки пас аз 4 ё 5 рӯз барқ дар кишвар доимӣ мешавад. Ёдгорӣ лимити сартосарӣ дар кишвар ва фурӯши барқ ба кишварҳои ҳамсояро рад мекунад.
Ба қавли ин намояндаи ширкати “Барқи тоҷик” дар кишвар маҳдудияти барқ аз 17 январи соли 2017 лағв шуда буд ва ҳоло танҳо давоми сол корҳои таъмирӣ рафта истодааст. Ӯ исрор меварзад, ки ин бебарқии сартосарӣ дар кишвар лимит нест, балки “корҳои профилактикӣ” мебошад, ки ба зудӣ рафъ хоҳад шуд.
Яке аз сабабҳои тӯл кашидани корҳи профлактикиро Ёдгорӣ ба пандемия рабт дода гуфтааст, бо сабаби он ки марзҳо баста ҳастанд, лавозимоти зарурӣ барои таъмир, ки аз хориҷа ворид мегардад, дер дастрас шуданд, ба ҳамин хотир таъмири дастгоҳҳои нерӯгоҳ зиёд тӯл кашид.
Ӯ мегӯяд, аксар таҷҳизоти нерӯгоҳҳои кишвар аз даврони Шӯравӣ боқӣ мондаанд, ки ба таъмир ниёз доранд.
Бино ба гуфтаи намояндаи ин ниҳоди барқрасон, бо вуҷуди сохта ва ба истифода додани ду чархаи Роғун Тоҷикистон ҳоло ҳам ба истиқлоли энергетикӣ нарасидааст. Ӯ мегӯяд:
“Мо ҳанӯз ба истиқлолияти энергетикӣ нарасидаем ва то он замоне, ки мардум истифодаи оқилонаи онро ёд нагирад, нахоҳем расид”.
Ин дар ҳолест, ки ҳафтае пеш муовини сарвази Тоҷикистон Усмоналӣ Усмонзода дар вилояти Хатлон аз сокинон хоста буд, ки нерӯи барқро сарфакорона истифода кунанд, зеро сатҳи обанборҳои кишвар хело кам шудааст.
Шакли пурраи мусоҳибаро инҷо бубинед:
