Омбудсмени Тоҷикистон аз поймолшавии ҳуқуқи муҳоҷирон дар Русия изҳори нигаронӣ кард.
Рӯзи панҷшанбе, 10-уми окятбри соли ҷорӣ, Умед Бобозода, Ваколатдорلا ҳуқуқи инсон (омбудсмен) дар Тоҷикистон бо ирсоли номае ба ҳамтои русаш Татяна Москалкова аз авҳоли бади муҳоҷирони кишвар изҳори норозигӣ кардааст.
Тавре сомонаи расмии ин ниҳод менависад, Умед Бобозода дар номаи худ зимни изҳори нигаронӣ аз поймолшавии ҳуқуқи муҳоҷирони тоҷик, аз ҳамтои русаш хоста, ки “Барои риояи ҳуқуқи шаҳрвандони Тоҷикистон аз ҷониби кормандони мақомоти ҳифзи ҳуқуқи Федератсияи Россия мусоидат намуда,” ин гуна қазияҳоро зери назорат ва баррасии худ қарор диҳад.
Ваколатдори ҳуқуқи инсон дар Тоҷикистон дар номаи худ таъкид кардааст, ки “кормандони мақомоти ҳифзи ҳуқуқ нисбат ба муҳоҷирони меҳнатӣ аз усулҳои мамнуи муомила, аз қабили дағалӣ, латукуб ва таҳқир алайҳи онҳо истифода мекунанд ва мо аз нақзи ҳуқуқ ва озодиҳои муҳоҷирон нигарон ҳастем.”
Умед Бобозода дар идомаи номаи худ бо изҳори нигаронӣ афзудааст, ки “аксар вақт шаҳрвандони Тоҷикистон ҳангоми вуруд ба Русия дар марз бо муддати тулонӣ ва рӯзҳои зиёд бидуни шароити дурусти нигоҳдорӣ ва ғизо боздошт мешаванд, ки дар байни онҳо аъзоёни ҳайати расмӣ, донишҷўён, пиронсолон, занон ва кӯдакон низ ҳастанд.”
Гуфта мешавад, шоми 22-уми марти соли 2024 дар толори консертии “Крокус Сити Ҳолл” алайҳи мардум ҳамлае сурат гирифт. Мақомоти Русия чанд нафар аз шаҳварндони Тоҷикистонро бо иттиҳоми даст доштан дар ин ҳамла боздошт карданд, аммо бархе аз онҳо ин иттиҳомотро рад карда, мегӯянд, ки мақомоти рус бо фишорҳои шадид аз онҳо баёнот гирифтаанд.
Баъд аз ин ҳамла фишору озори муҳоҷирони кишварҳои Осиёи Марказӣ ва бахусус муҳоҷирони Тоҷикистон дар Русия зиёд шуд ва тақрибан 20 ҳазор тоҷикистонӣ, аз ҷумла бархе донишҷӯён ҳам аз ин кишвар ронда шуданд. Ҷониби Русия то ҳол ба ин нома ба сурати расмӣ посух надодааст.
