Комиссари олии СММ дар умури ҳуқуқи башар Мишел Бачелет дар ҷаласаи 49-уми Шӯрои ҳуқуқи башар аз идомаи саркӯби мухолифони тоҷик аз ҷониби мақомоти Тоҷикистон изҳори нигаронӣ кард.
Хонум Мишел бо нигаронӣ мегӯяд, мақомоти амниятии Тоҷикистон дар баробари фишору саркӯби хонаводаҳои мухолифон, инчунин дар байни сокинони Вилояти Мухтори Кӯҳистони Бадахшон тарсу ваҳшатро эҷод кардааст.
Ӯ мегӯяд, “хушунат миёни нерӯҳои амниятӣ ва эътирозгарон дар моҳи ноябри соли 2021 дар ВМКБ вазъи ҳуқуқи башарро дар ин минтақа бад кард ва фазои тарсро эҷод намуд.”
Дар идома Комиссари олии СММ қатъи интернетро дар ВМКБ нақзи ошкори ҳуқуқи башар номид. Ӯ ҳамчунин аз саркӯби мухолифони сиёсӣ дар Тоҷикистон ва зиёд шудани шумораи мухолифоне, ки барои муддатҳои зиёд равонаи зиндон мешаванд, изҳори нигаронӣ кард.
Хонум Мишел дар охир қайд кард, ки мухолифон дар чаласаҳои додгоҳие маҳкум ба зиндон мешаванд, ки ба меъёрҳои қонунӣ мувофиқат намекунанд.
Мақомоти тоҷик то ҳол ба интиқодҳои комиссари олии СММ дар мавриди ҳуқуқи башар Мишел Бачелет посухи расмӣ надодааст.