Вазири тандурустӣ ва ҳифзи иҷтимоии аҳолии Тоҷикистон мегӯяд, ки айни замон дар муассисаҳои тандурустии Тоҷикистон наздик ба се ҳазор табиб ва ҳамшераи тиббӣ намерасад.
Имрӯз, 9-уми августи соли 2023 Ҷамолиддин Абдуллозода, вазири тандурустӣ ва ҳифзи иҷтимоии аҳолии Тоҷикистон дар шаҳри Душанбе дар ҷамъи хабарнигорон гуфт, айни замон дар муассисаҳои тандурустии Тоҷикистон 2 ҳазору 298 табиб ва 575 нафар ҳамшираҳои тиб намерасанд.
Вазири тандурустии Тоҷикистон дар бораи норасоии кадрҳои ин соҳа дар Вилояти Мухтори Кӯҳистони Бадахшон чизе нагуфт, вале таъкид кард, ки айни замон дар шаҳри Душанбе 49 табиб, 35 ҳамшираи тиб, дар вилояти Хатлон 788 табиб, дар вилояти Суғд 579 табиб, 54 ҳамшираи тиб ва дар ноҳияҳои тобеи марказ 412 табиб ва 219 ҳамшираи тиб намерасанд.
Ҷамолиддин Абдуллозода таъкид кард, ки сол гузашта 546 табиб ва 1 ҳазору 187 корманди миёнаи тиббӣ ба муҳоҷирати меҳнатӣ ба Федератсияи Русия сафар доштанд ва 6 моҳи соли 2023 бошад, 70 табиб ва 343 нафар ҳамшираи тиб тарки Тоҷикистон карда, ба муҳоҷират рафтаанд. Инчунин дар ҳамин шашмоҳа 70 табиб ва 51 ҳамшираи тиб аз хориҷ ба Тоҷикистон омада, дар соҳаи тандурустӣ кор мекунанд.
Гуфта мешавад, дар ҳоли ҳозир дар Тоҷикистон 5 ҳазору 116 муассисаи тиббӣ амал мекунад. Биноҳои 243 адади онҳо таъмирталаб мебошанд. Инчунин биноҳои 133 адади дигари ин муассисаҳои тандурустӣ, ки аксари онҳо дар ноҳияҳо қарор доранд, дар ҳолати садамавӣ қарор дошта, фаъолияти онҳо дар ҷойҳои ғайри муқаррарӣ таъйин карда шудааст.
