Оё Вазорати меҳнат ташаббуси дигаронро ба номи худ ҳисоб мекунад ё ташаббускорон аз вазоратро?
Пештар хабаре дар расонаҳо нашр шуда буд, ки мақомоти Вазорати меҳнат ва шуғли аҳолии Тоҷикистон барномаи сафарбар кардани як гурӯҳи муҳоҷиронро бо мақомоти Русия баррасӣ намудааст ва бояд 400 муҳоҷирро ба вилояти Иркутск барои кор фиристанд.
Ин хабарро ҳатто худи Ширин Амонзода, вазири ин ниҳод ба Радиои Озодӣ тасдиқ карда буд. Аммо Ғуфрон Ваҳобов як корбари фейсбук ин хаббаро дурӯғин номида, дар саҳифаи худ навиштааст, ки ин "дастовард"-ро ба номи Вазорати меҳнат, муҳоҷират ва шуғли аҳолии Ҷумҳурии Тоҷикистон хато нисбат додаанд.
Гӯё Вазорати меҳнат бо ҷониби Русия гуфтушунид карданд ва ба ин натиҷаи "назаррас" ноил шуданд.
Ваҳобов навиштааст, ки “Радиои Муҳоҷир” далелҳои боэътимод дорад, ки диаспораи тоҷикон дар Иркутск, ташаббускори омадани муҳоҷирони тоҷик аст ва онҳо аз ҷониби Русия иҷозати расмӣ гирифтаанд, на Вазорати меҳнат.
Дар идома гуфта шудааст, ки коргарон дар Тоҷикистон интихоб нашудаанд ва он муҳоҷироне, ки ба Иркутск барои кор меоянд, қаблан дар инҷо кор мекарданд ва корфармоён онҳоро ба рӯйхат шомил кардаанд. Яъне, номҳои ҳамаи муҳоҷирон қаблан маълум карда шудааст.
Ғуфрон Ваҳобов навишт, ки агар касе сазовори миннатдорӣ бошад, пас онҳо на намояндагони Вазорати меҳнати Тоҷикистон, балки раиси диаспораи тоҷикон Муриват Маликшоев мебошад.
То ҳол ба гуфтаҳои Ғуфрон Ваҳобов, Вазорати меҳнат ва шуғли аҳолии Тоҷикистон вокунише накардааст.
ИНЧУНИН, БИХОНЕД: Беш аз 400 тоҷикро барои кор ба вилояти Иркутски Русия мефиристанд
Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.