Кумитаи наҷоти гаравгонҳо ва зиндониёни сиёсии Тоҷикистон аз исёни навбатӣ дар зиндони шаҳри Ваҳдат хабар дод.
Дар иттилоияи ин Кумита, ки 3-юми феврали соли ҷорӣ нашр шудааст, гуфта мешавад, ки дар пайи исён 10 маҳбус кушта ва даҳҳо нафари дигар захмӣ шудаанд.
Кумитаи наҷоти зиндониён аз ҷузъиёт ва дар кадом зиндон сурат гирифтани исён чизе нагуфтааст.
Ҳамчунин мақомоти расмии кишвар то ҳол ин хабарро тасдиқ ё рад накардаанд. Аммо чанд манбаъ имрӯз дар суҳбат бо Azda.tv аз эҳтимоли вуқуи ҳодисае дар зиндони куҳнаи шаҳри Ваҳдат хабар доданд.
Аз ҷумла, як манбаъ бо шарти зикр нашудани номаш гуфт, ки “имрӯз соати 15:00 ба вақти маҳаллӣ дар зиндони куҳнаи Ваҳдат чӣ ҳодисае рух додааст, аммо аз тафсилоташ хабар надорам”.
Дар ҳамин ҳол як манбаи дигар гуфт, ки дар кӯчаҳои шаҳри Душанбе мошинҳои низомиро дидааст, ки сӯйи шаҳри Ваҳдат мерафтанд. Ӯ илова кард, ки алоқаи мобилӣ дар атрофи зиндони шаҳри Ваҳдат қатъ шудааст.
Инчунин Сайидисҳоқ Бобоев, узви ҲНИТ дар суҳбат ба Azda.TV гуфт, ки “нафаре барои расондани озуқаворӣ ба пайвандаш дар назди зиндон мунтазир будааст, ки ҳамон вақт тирпаронӣ шуруъ мешавад ва ӯро кормандони зиндон аз он ҷой меронанд.” Ба гуфтаи Бобоев, дар пайи ин ҳодиса 11 зиндонӣ кушта ва 4 нигаҳбон захм бардоштаанд.
Azda.tv ин хабарро натавонист мустақим аз манобеи расмӣ тасдиқ кунад.
Ёдовар мешавем, ки моҳи майи соли 2019 бар асари ошӯби сохтаи мақомот дар зиндони шаҳри Ваҳдат 29 маҳбус ва се нозири зиндон, аз ҷумла Каримов Абдусаттор (маъруф ба Махдуми Саттор), Саид Қиёмиддини Ғозӣ ва Саидмаҳдихон Сатторов (маъруф ба Шайх Темур) кушта шуда буданд.
