Озодиеро, ки Ислом ба занон додааст, назир надорад

Бознашр аз саҳифаи фейсбукии Абдураҳим Умариён, рузноманигори тоҷики муқими ИМА.

Abdurahim Omariyan
Озодиеро, ки Ислом ба ЗАНОН додааст, назир надорад! Албатта бар истиснои «голый» гаштан, ҳамонгунае, ки чанд офтобсӯхта иддаояшро доранд ва озодиро маҳз дар ҳамин мебинанд! Ман олим ва донишманди...

Озодиеро, ки Ислом ба ЗАНОН додааст, назир надорад! Албатта бар истиснои «голый» гаштан, ҳамонгунае, ки чанд офтобсӯхта иддаояшро доранд ва озодиро маҳз дар ҳамин мебинанд!

Ман олим ва донишманди Ислом нестам, аммо ончи яқин медонам, ҷойгоҳи зан дар Исломро ҳатто фариштаҳо надоранд: Амонати Худованд дар назди мард ва эҳтиёту нигоҳубини он болотар аз гавҳараки чашмаш!
Аз руйи амалкарди чор ба ном “шайх”-и чилзана ё чанд саллакалони духтарони 12 соларо ба никоҳашон дароварда ва кадом золиму занситез Исломи ПОКро сарзаниш набояд кард!
Ингуна инсонсуратони бадрафтор шӯрбахтона дар миёни ҳама қавму миллату динҳои дигар низ ҳастанд!
Ман ба эътиқод ва бовару арзишҳои аҳли башар ва кулли адён эҳтиром қоилам ва аз ин ба пас ҳар радикалеро, ки арзишҳои дигаронро зери пой мекунад, аз феҳрасти дӯстони фейсбукиам парт, делит ва бадарға хоҳам кард. Фарқ надорад, он нафар хоҳ бар зидди пайравони дини Зардушт иҳонат мекунад, ё Ислом ва ё Насорову Яҳудия, барои ҳамеша делит ва блок хоҳад шуд!
Арзишҳои дигаронро эҳтиром бояд кард, то муқаддасот ва арзишҳои мову шуморо низ эҳтиром кунанд...
Ва ҳоло як қиссаи кӯтоҳ аз шаби Қадр дар моҳи шарифи рамазон, ки ман дар калисо- ибодатгоҳи бародарони масеҳӣ гузаронидам..

Достони “шаби қадр дар калисо”

Соли 2017. Шаҳри Ню Йорк. Моҳи рамазон асту шаби қадр. Аксарияти мусалмонон ин шабро дар масоҷид бо ибодат мегузаронанд. Барои ман, ки масъулияти таъмини хонавода, ҳамсару фарзандонам, Қиблагоҳам-падари нури чашмам ва ҳамсару ду тифлаки аз Бародари раҳматиям ятиммонда бо иродаи Худованд бар душам аст, кор кардан муҳимтар аз масҷид рафтан буд.
Тасбеҳамро гирифтаму ба кор баромадам. Таксӣ.
Имон дорам, Худованд ҳамаҷо дуои бандагонашро мепазирад, ҳоло он чи дар масҷид бошад, чи дохили мошин...
Шаб аз ним гузашту кор бар истилоҳ “меҷушид”. Муштарӣ (клиент)-и навбатӣ маро аз Ню Йорк ба Ню Ҷерси мебарад.
Роҳи тулонӣ. Ҳарду хомӯш. Садои пасти Майкл Ҷексон, ки муштарӣ дархост намуда буд, оромии дохили мошинро дарҳам мезад. Зоҳиран муштарӣ дилгир шуд, ки хост онро комилан хомӯш кунам ва суол кард, ки кор чи хел буд имрӯз.
Гуфтам, шукри Худо нағз.
Аз ватанам пурсид.
-Тоҷикистон.
-Ту мусалмонӣ?
-Бале, аммо бар асоси қарордоди имзокардаи ман бо ширкати корфармо ҳаққи сӯҳбат дар мавзуи дин ва сиёсатро бо муштариҳо надорам. Маро бубахшед, метавонед аз дигар боб суол кунед.
-Воқеан мусалмон будан имрӯзҳо ҷойи шарм аст бо ин ҳама амалҳои терористиву зулму ситам ва поймол кардани ҳуқуқи занон...
-Ист, косаи сабрам сар омад, -ончи ту мегуи таҳқири ошкоро ба муқаддасоти динии дигарон мебошад ва тавре мебинӣ инҷо дастгоҳи сабт насб шудааст, ки ҳар амалу гуфтори муштариёнро ба навор мегирад ва агар ту идома бидиҳӣ ман маҷбур мешавам аз болоят шикоят кунам!
-Бубахш, ба ихтиёри худам набуд, аммо магар ҳамин тавр нест?
-Албатта не!
Нохудогоҳ мо ҳарду вориди баҳси динӣ шудем ва ман идома додам:
-Ончи имрӯз дар олами Ислом мегузарад баёнгари асолат ва воқеияти ин дин нест. Нафаронеро, ки бо аъмоли нописандашон ту ба Ислом рабт медиҳӣ, мусалмон на, балки душмани ин дин ҳастанд! Исломи пок ҳатто қатли як мурчаро гуноҳ ва ҳама гуна зулму ситаму аъмоли ғайриинсониро шадидан маҳкум мекунад.
Дар фарҳанги он ҷуз меҳру ишқварзӣ, эҳтирому самимияту покӣ ва худшиносиву озодагӣ чизи дигаре нест!
-Чи гуна меҳру ишқварзӣ, ки шумо Исо (манзураш ҳазрати Исои масеҳ)-ро бад мебинеду сарзаниш мекунед?
-Ин иддао беасос аст, шахсан худи ман нисбат ба Исо дар қатори кулли анбиёи илоҳӣ эҳтиром ва муҳаббат дорам. Боре нашунидаам, ки ягон мусалмон акси Исои масеҳро карикатура карда бошад, аммо борҳо паёмбари Ислом ҳазрати Муҳаммад (САВС)-ро дигарон карикатура кардаанд. Дар зимн, ба ҳангоми намоз дар вақти дуо, пеш аз он ки мо номи шарифи паёмбари азизамонро бигирем, аввал исми паёмбарони пештар аз Ӯ омадаро зикр мекунем (Ҳазрати Одам, Нуҳи Набиуллоҳ, Иброҳими Халилуллоҳ, Мусои Калимуллоҳ. , Исои Руҳуллоҳ), яъне диди Исои Масеҳ, ки исми покаш борҳо дар Қуръон омада чи ҷойгоҳи волое дар қалбу вуҷуди мо дорад?
-Ин боваркарданӣ нест!
Муштарӣ чанд лаҳза ба андеша рафт ва бо шитоб хитоб намуд:
-Метавонӣ ин ҳама муҳаббат ба Исоро ба исбот бирасони?
-Чи гуна?
-Бо ман ба калисо медароӣ, ба эҳтироми Исои масеҳ?
-Бошад, мушкиле нест.
Вақте ба назди манзилаш расидем, дар шафақи хонааш калисо буд ва ҳарду аз мошин ба он самт пиёда шудем...
Дар даромадгоҳ ӯ даст ба косаи оби онҷо гузошта шуда заду ба пешонӣ ва ҳарду китфу қафаси синааш бурд ва аз дохили дар мунтазири ман монд.
Ман ҳам ду даст боло карда, ҳамонгуна ки дар намоз дуо мекуни:
-Худовандо, руҳи Исои масеҳро дар қатори дигар анбиё шод кун ва ин шаби қадрро барои кулли мусалмонон муборак бигардон, ҳама гуна хушунату фитна ва бадбиниву нафратро аз миёни бандагонат дур соз, омин!
Ҳамсӯҳбатам аз ин амали ман дар ҳоли шок буд ва пурсид:
-Ин чи коре буд, ки кардӣ? Ё аллакай дини масеҳиро бо шеваи худ пазируфтӣ?
-На. Фақат дуо, ҳамонгуна, ки ту анҷом додӣ, танҳо бо шакли дигар. Медонӣ, Худованд якест ва ҳар кадоми мо барои расидан ба Он роҳҳои мухталифро интихоб кардаем ва ҳар касе дар интихоби роҳи худ имон ва боварӣ дорад. Худованд моро дар ин роҳҳо амн ва солим нигоҳ дорад, омин!
Ашк дар чашмонаш ҳалқа зад ва маро бародар хитоб намуду ба оғуш кашиду гуфт:
-Худованд, ки худ зебост ва зебоиро дӯст медорад, бешак, мисли рангҳои мухталиф динҳои зиёде офарида ва моро дар ҳоли санҷиш қарор дода аст. Ҳоло ман дар симои ту беҳтарин намунаро мебинам, ки меҳри Исломро бо ин амалат дар қалбам зинда карди! Ба ту ваъда медиҳам, ки аз ин ба пас нисбат ба Ислом ва мусалмонон ягон ҳарфи носазо намегуям ва агар ҳар касе ҳам носазо гуфт, туро иқтибос меорам...
Чанд лаҳза ҳарду калисоро давр задем, аҳди бародари кардему бо изҳори муҳаббат ӯ маро гусел кард...
Мавлуди Исои масеҳ ба пайравон ва дӯстдоронаш муборак бошад!

Акс ҳангоми зиёрати оромгоҳи Брюс Ли, варзишгари нотакрор ва фарзандаш Брендон Ли, ки ба рамзи эҳтиром ба дигар эътиқоду боварҳо ва мувофиқ ба матни болост, оварда шуда аст!

Абдураҳим Умариён

Аз Идораи сомона: Матолибе, ки дар гӯшаи "Блоги Шумо" ба нашр мерасанд, назари шахсӣ ва ё таҳлили муаллифон буда, баёнгари мавқеи "Аздо тв" нестанд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.