Як сокини шаҳри Истаравшан аз мақомоти Тоҷикистон дархост карда, ки писари 25-солааш Дӯстмурод Маъруфовро бо сабаби беморӣ аз адои хидмати ҳарбӣ ҷавоб диҳанд.
Падари ӯ, Ҳамроқул Маъруфов, ба Радиои Озодӣ гуфтааст, писараш дар гузашта чанд маротиба аз ҷониби комиссияҳои тиббӣ барои хидмати ҳарбӣ “ношоям” дониста шуда буд. Ба гуфтаи ӯ, Дӯстмурод моҳи майи соли ҷорӣ ҳангоми бозгашт аз Русия ба сафи артиш ҷалб шуда, ҳоло дар яке аз қисмҳои низомии ноҳияи Деваштич қарор дорад.
Ба гуфтаи наздиконаш, Дӯстмурод гирифтори чанд бемории ҷиддӣ буда, аз ҷумла мушкили рӯда, шуш ва ҷигар дорад ва дар қисми ҳарбӣ вазъи саломатиаш бадтар шудааст. Хонаводаи ӯ бо ирсоли шикоят ба мақомоти дахлдор хостори баррасии қонунии қазия шудаанд.
Як манбаъ дар Комиссариати ҳарбии шаҳри Истаравшан ба ин расона гуфтааст, ки барои муайян кардани вазъи саломатии навсарбоз комиссияи махсус таъсис дода шудааст. Додситонии ҳарбӣ низ дар посух ба муроҷиати хонавода ваъда додааст, ки масъаларо ҳамаҷониба баррасӣ хоҳад кард.
Тарзи ҷалб намудани ҷавонон ба сафи артиш дар Тоҷикистон яке аз масъалаҳои доғ боқӣ мемонад. Ҳамасола дар мавсими даъвати баҳорӣ ва тирамоҳӣ миёни бархе аз сокинон ва мақомоти низомиву давлатӣ баҳсҳо бар сари қонунӣ будани ҷалби ҷавонон, бахусус шахсони дорои мушкилоти саломатӣ, ба миён меоянд.
