Парлумони Аврупо бо иттифоқи аксари оро қатънома дар мавриди саркӯби эътирозгарон дар Вилояти Мухтори Кӯҳистони Бадахшон аз ҷониби ҳукуматро қабул кард.
7-уми июли соли 2022, Парлумон Аврупо бо қабули қатънома аз бадтар шудани вазъи ҳуқуқи башар дар Тоҷикистон шадидан изҳори нигаронӣ карда, хостори ҳимоят аз ақаллиятҳои қавмӣ дар Вилояти Мухтори Кӯҳистони Бадахшон шуд.
Дар ин қатънома таъкид шудааст, ки дар моҳи ноябри соли 2021 ва майи соли 2022 дар Вилояти Мухтори Кӯҳистон Бадахшон мақомоти Тоҷикистон тазоҳургарон, рӯзноманигорон, блогерҳо, ҳуқуқшиносон ва фаъолони ҷомеаи шаҳрвандиро саркӯб ва рафторҳои хушунатомезро алайҳи онҳо раво дидаанд.
Ҳамчунин дар ин қатънома дар хитоб ба мақомоти Тоҷикистон таъкид мешавад, ки муборизаи қонунӣ бо терроризм ва ифротгароӣ набояд ҳамчун баҳона барои саркӯб кардани фаъолияти мухолифон истифода шавад ва инчунин аз мақомот хоста шуда, ки озодиҳои бунёдии тамоми шаҳрвандони Тоҷикистон ва волоияти қонун бояд кафолат дода шавад.
Вакилони Парлумони Аврупо ҳамчунин аз мақомоти Тоҷикистон хостори он шуданд, ки ба созмонҳои байналмилалии башардӯстона ва ҳуқуқи башар барои назорати вазъ ва таҳқиқи одилона даргириҳои хушунатомез иҷозат дода шавад. Ва инчунин хоста шуда, ки дар Вилояти Мухтори Кӯҳистони Бадахшон ба таври фаврӣ ва бидуни шарт дастрасии комил ба фаврӣ ба интернет ва иттилоот барқарор карда шавад.
Ҳамзамон яке аз талаботи дигари Парлумони ИА аз мақомоти Тоҷикистон ин аст, ки афроди худсарона боздоштшуда фавран озод ва ҳама иттиҳомоти зидди онҳо эъломшуда лағв карда шаванд.
Гуфта мешавад, ҳангоми ба раъйгузории ин қатънома 520 нафар аз вакилони Парлумони Аврупо раъйи мусбат додаву 24 вакил зид ва 31 каси дигар дар ин раъйигирӣ ҳузур надоштаанд.
Ёдовар мешавем, ки Парлумони ИА 9-уми июни соли 2016 қатъномае дар бораи вазъияти зиндониёни сиёсӣ дар Тоҷикистонро ба тасвиб расонида буд ва дар он хостори озодии фаврии Зайд Саид, раиси Ҳизби Тоҷикистони Нав, раҳбарони зиндонии Ҳизби наҳзати исломии Тоҷикистон ва вакилони зиндонӣ Бузургмеҳр Ёров ва Нуриддин Махкамов шуда буд, вале Ҳукумати Тоҷикистон талаботи ин қатъномаро нодида гирифта, иҷро накард.
