Парвозҳои мустақим байни шаҳрҳои Теҳрон ва Душанбе пас аз се моҳи таваққуф дубора барқарор гардиданд. Нахустин парвозро дар ин масир ширкати ҳавопаймоии эронии “Вориш” рӯзи 31-уми май анҷом додааст.
Парвозҳо дар охири моҳи феврал бинобар маҳдудиятҳои ба вуҷудомада дар пайи ҳамлаҳои Амрико ва Исроил ба Эрон қатъ гардида буданд. Дар натиҷа, иртиботи ҳавоӣ миёни ду кишвар барои чанд моҳ боздошта шуд.
Ба иттилои расонаҳо, яке аз сабабҳои асосии тӯл кашидани таваққуфи парвозҳо маҳдудиятҳои транзитӣ будааст. Аз ҷумла, Туркманистон муддате иҷозати убури ҳавопаймоҳои эрониро аз ҳарими ҳавоии худ намедод.
Дар ин давра бисёре аз шаҳрвандони Тоҷикистон, ки дар Эрон қарор доштанд, маҷбур шуданд барои бозгашт ба ватан аз роҳҳои заминӣ истифода баранд. Онҳо тавассути Озарбойҷон ва Туркманистон ба Тоҷикистон баргаштанд.
Бо вуҷуди азсаргирии парвозҳои ширкати “Вориш”, ширкати ҳавопаймоии “Сомон Эйр” ҳанӯз парвозҳои худро дар масири Душанбе – Теҳрон барқарор накардааст.
