Шоми дирӯз, сардеҳқони Тоҷикистон Эмомалӣ Раҳмон, ки аз ҳавзаи деҳқонҳо ба тахти раёсти ҷумҳурӣ расидааст, тайи як маросими хосса аз меҳмони олиқадри худ сардеҳқони Беларус пазироӣ кард.
Дар ин маросим, ки аксу наворҳои он ба шабакаҳои иҷтимоӣ роҳ ётфтаад, бо супориши сардеҳқони Тоҷикистон номи ин пазироии вежаро “Шоми дӯстӣ” ниҳоданд.
Шукӯҳи “Шоми дӯстӣ”-е, ки дар Бустонсарои ҳукуматӣ дар пойтахти Тоҷикистон баргузор шуд, пазироии Эмомалӣ Раҳмон аз Александр Лукашенко камтар аз пазироии Владимир Путин, ки ду моҳ пеш дар ҳамон ҷо гузашт, набуд.
Сарфу харҷҳои ин маросими якшаба, ки дар Бустонсарои ҳукуматӣ ба муносибати сафари раисҷумҳури Баларус баргузор шуд, ба садҳо ҳазор сомонӣ баробар аст.
Аммо бо ин вуҷуд, Хадамоти матбуоти Президенти Тоҷикистон таъкид мекунад, ки ин чорабинии пуршукӯҳ як “зиёфати ғайрирасмӣ” буд ва барои баргузории он “яке аз мавзеъҳои хушбоду ҳавои бӯстонсаро” интихоб гардида буд.
Ҳамзамон ба қавли котиботи Эмомалӣ Раҳмон дар канори ин “зиёфти ғайрирасмӣ” намоишгоҳи маҳсулоти кишоварзӣ ва таомҳои миллии Тоҷикистон низ баргузор гардид. Ва “дар роҳравҳои алоҳидаи он ҳар як намуд маҳсулоти кишоварзӣ бо шаклу услуби хос ва ороиши гуногун гузошта шуда буд.”
Инчунин Хадамоти матбуоти Президенти Тоҷикистон бо даҳони пур мегӯяд: “Дар намоишгоҳ даҳҳо намуди меваҳои тару тозаи Тоҷикистон, навъҳои гуногуни полезиҳо, меваҳои аз лиҳози таъму сифат беҳамто, ба мисли ангуру меваҳои донадор, хушкмеваҳои босифат, аз қабили мағзу бодом, мавизу писта ва меваҳои ситрусӣ ба маъраз гузошта шуда буд.”
Аммо ҷолиб он ки қаламкашони атрофи Эмомалӣ Раҳмон меҳмони ӯро ба навъе таҳқир карда, онро аз ҷамъи инсонҳо хориҷ намуда гуфтааст, ки “меҳмони олиқадр ба ҳар як маҳсулоти ба намоиш гузошта шуда ва намудҳои гуногуни таомҳои миллии мо таваҷҷуҳи зиёд зоҳир намуда, таъмашонро озмуданд ва ба сифату маззаи ҳар як маҳсулот баҳои баланд доданд.”
Дар аксу наворҳо ва таъкидҳои расонаҳои ҳукуматӣ ҳам дида мешавад, ки дар ин намоишгоҳҳо, ки ба муносибати “Шоми дӯстӣ” баргузор шуд, анвоъи меҳава ва маҳсулоти полезӣ ва ақсоми таъомҳо ба даҳҳо адад мерасанд ва дар воқеъ агар сардеҳқони Баларус тавре Хадамоти матбуоти Президенти Тоҷикистон мегӯяд, ба ҳамаи онҳо таваҷҷуҳ карда, “таъмашонро озмуда” бошанд, ин чиз ҳайратовар аст.
Ба иборати дигар, як одами солим ҳар чанд фил борин азимҷусса ҳам бошад, имкон надорад, ки дар як “Шоми дӯстӣ” ин қадар зиёд бихӯраду биошомад.
Амруллоҳи Низом, махсус барои Azda tv
