Писари вазири собиқи энержии Тоҷикистон таҳти пайгард қарор гирифт

Пулиси пойтахт писари вазири собиқи энержӣ Гул Шералӣ, Диловар  Гуловро таҳти пайгард ва ҷустуҷӯ қарор дод.

Тибқи гузориши "Азия Плюс" пулис нисбати писари собиқ вазир бо модаи 237 (авбошӣ) Кодекси Ҷумҳурии Тоҷикистон парвандаи ҷиноӣ боз кард.

Маркази матбуотии ВКД-и Душанбе хабар дод, ки номбурда аз 19 майи соли ҷорӣ мавриди ҷустуҷӯи пулис карор дорад.

Пулис аз шаҳрвандоне, ки дар бораи макони буду боши Диловар Гулов иттилоъ доранд хоҳиш карда, ки ба пулис хабар бидиҳанд.

Ба гуфтаи пулис ду писари собиқ вазир барои ширкат дар як занозанӣ дар тарабхонаи "Сим-Сим" гумонбар дониста мешаванд, ки яке аз онҳо меҳмони тарабхонаро бо корд захмӣ карда аст. Вале кадоме аз ин ду корд истифода кардааст гузориш дода намешавад.

Пулис Шералӣ Гулови 24 соларо дар Суғд боздошт карда ва Диловар Гулови 29 соларо пайдо накарда аст.

Ин бори аввал нест, ки Диловар Гулов дар гузоришҳои пулис зоҳир мешавад.

Моҳи июни соли 2018 дар Душанбе ӯ як пулисро лату куб карда аз ҷои ҳодиса фирор намуда баъдан худ ба идораи пулис омад. Барои ин ҷиноят Диловар Гулов ба як соли зиндон маҳкум гардид.

Пештар дар моҳи марти соли 2018 Диловар Гулов ҳамроҳи Дилшод Нуруллозода ва Давлатшоҳ Сайидакрамов домод ва ронандаи вазири собиқ барои задухурд дар тарабхонаи "Галакси" боздошт ва аз 5 то 15 шабонарӯз ба ҳабс маҳкум шуданд.

Дар соли 2015 Диловар Гулов барои рондани мошини сиёҳкарда шуда бидуни иҷозат ба 5000 ҳазор сомонӣ ҷарима шуда буд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.