Сурат: аз видеои муаллиф

Прокуратураи генералии ҶТ нисбати Муҳаммадиқболи Садриддин муассиси пойгоҳи интернетии “Ислоҳ”, бо иттиҳоми қаллобӣ парвандаи ҷиноятӣ боз карда, ӯро дар кофтукоб қарор додааст.  Дар ин бора дар сомонаи расмии прокуратураи генералӣ хабар дода шудааст.

Муҳаммадиқболи Садриддин, ки феълан дар Аврупо қарор дорад, ба он айбдор мешавад, ки соли 2010 вақте дар Дубай қарор дошт, бо ваъдаи 10%-12% даромад аз Кабутов. Н, Холов С ва Қаюмов Н 430 ҳазор$-ро гирифта дигар барнагардондааст.

Ба навиштаи сомонаи расмии прокуратураи генаралӣ ба ин ниҳод шаҳрвандоне бо номи Неъматулло Кабутов, Сиёвуш Холов ва Носиҳиддин Қаюмов аз “кирдорҳои қаллобии шаҳрванди Ҷумҳурии Тоҷикистон Муҳаммадиқбол Садуридинов, зодаи шаҳри Бохтари вилояти Хатлон, соли таваллудаш 15-уми майи соли 1978” шикоят бурдаанд.

Аммо то ҳол Муҳаммадиқболи Садриддин расман дар ин бора ҷавобе нагардондааст. Муҳаммадиқбол Садриддин яке аз мухолифони Ҳукумати Тоҷикистон ба ҳисоб меравад ва дар ин авохир суханрониҳои худро ба шакли видеоӣ ва онлайнӣ роҳандозӣ кардааст.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.