Президенти Русия Владимир Путин қонунеро имзо кард, ки тартиби гузаштани ташхиси ҳатмии тиббии шаҳрвандони хориҷиро сахттар мекунад.
Тибқи санади нав, муҳоҷирон ва дигар шаҳрвандони хориҷӣ акнун бояд дар давоми 30 рӯзи баъди вуруд ба Русия аз муоинаи ҳатмии тиббӣ гузаранд. Пештар барои анҷоми ин ташхис то 90 рӯз муҳлат дода мешуд.
Қонун нисбат ба муҳоҷирони корӣ ва инчунин шаҳрвандони хориҷие татбиқ мешавад, ки қасд доранд беш аз 90 рӯз дар қаламрави Русия иқомат кунанд.
Дар доираи ташхис муҳоҷирон бояд аз санҷиш барои ошкор кардани бемориҳои сироятии хатарнок, ВНМО (ВИЧ), инчунин истифодаи маводи мухаддир ва моддаҳои психотропӣ гузаранд.
Тибқи қонун, натиҷаҳои ташхис ба шакли электронӣ сабт шуда, ба мақомоти корҳои дохилӣ ва идораи назорати беҳдоштии Русия фиристода мешаванд. Ҳамчунин шаҳрвандони хориҷие, ки муддати дароз дар Русия мемонанд, вазифадор мешаванд ҳар сол аз муоинаи такрории тиббӣ гузаранд.
Гуфта мешавад, хароҷоти ташхисро худи муҳоҷирон ё корфармоёни онҳо пардохт мекунанд. Қонун аз 1-уми сентябри соли 2026 мавриди амал қарор мегирад.
Мақомоти Русия мегӯянд, ҳадаф аз ин тағйирот пурзӯр кардани назорат бар муҳоҷирати ғайриқонунӣ ва таъмини амнияти санитариву эпидемиологии кишвар мебошад.
Вале ба назари муҳоҷирони корӣ, ин тағйирот шароити буду бош ва корро дар ин кишвар то рафт сахттар мекунад. Муҳоҷирон мегӯянд, агар пештар ба пулисҳои роҳ ришва медоданд, ҳоло ба иловаи пардохти маблағи ташхиси тиббӣ бояд ба масъулони ниҳодҳои марбута низ ришва диҳанд, чун бе додани ришва касе кори онҳоро анҷом намедиҳад.
