Шӯрои уламои Маркази исломии Тоҷикистон 21-уми июни соли ҷорӣ дар ҷаласаи навбатии худ рӯзи баргузории Иди Қурбонро дар саросари кишвар муайян кард.
Тавре Маҷаллаи “Дин ва ҷомеа”-и тобеи Кумитаи дини кишвар хабар дод, дар ҷаласаи имрӯзаи Шӯрои уламои кишвар, ки бо ҳузури раиси он Саидмукаррам Абдуқодирзода ва дигар аъзо баргузор гардид, масъалаи асосӣ “муайян намудани рӯзи баргузории Иди Қурбон ва вақти намози Ид” будааст.
Гуфта мешавад, Шӯрои уламои кишвар дар ин ҷаласа “қарор қабул намуд, ки тибқи ҳисобҳои илмӣ Иди Қурбон рӯзи 28 июн таҷлил мешавад. Намози ид дар масҷидҳои кишвар соати 6-00 баргузор мегардад.“
Шӯрои уламои кишвар мисли ҳарвақта имомхатибонро вазифадор кардааст, ки дар мавъизаҳои худ таваҷҷуҳи мардумро ба масъалаи дастгирии ятимону бепарасторон, сарфаю сариштакорӣ ва пешгирӣ аз исрофкорӣ, инчунин назорати кӯдакону наврасон аснои “идгардак” ҷалб намоянд.
Ин ниҳоди марбут ба умури динии кишвар ҳамасола фарорасии моҳи Рамазон ва рӯзҳои баргузории идҳои исломиро муайян месозад. Ва дар ҳар ҷаласаи худ имомхатибони кишварро ба гуфтани суханҳое вазифадор месозад, ки аз тарафи мақомоти кишвар дастур шуда бошад.
