Андрей Жилтсови як шаҳрванди Руся аз асорати чаҳорсола бо таксӣ рааҳо шуда, бо таксӣ фирор кардааст. Дар ин бора нашрияи “Baza” дар Telegram-канали худ хабар медиҳад.
Рӯзи 19 март дар Твер ба хадамоти таксӣ аз марде фармоиш мешавад, ки хоҳиш кардааст то ӯро ба Маскав баранд. Ин мард бо худ пул надоштааст ва гуфтааст, ки бо марг рӯбарӯст. Ронандаи таксӣ Константин барои гирифтани ӯ ба автовокзали Западная Двина (вилояти Твер) рафтааст. Баъд аз савор шудан ба таксӣ мусофир аз ӯ телефон хост, то ба дӯстонаш занг занад ва барои пардохти роҳкиро 10 ҳазор рубл гирад.
Дар роҳ ширкати таксӣ бо ронанда тамос гирифт ва гуфт, ки барои баргардонидани мусофир ба ҷои пештарааш ба ӯ 100 ҳазор рубл пешниҳод намудаанд.
Баъд аз ин тамос Андрей ба ронандаи таксӣ нақл кард, ки корфармое, ки ӯро чор сол пеш ба ғуломӣ гирифта буд, меҷӯяд. Нафаре, ки Андрейро ба ғуломӣ гирифта буд, шиносномаашро гирифта, ӯро дар хонаи хусусӣ дар деҳаи Никулинкаи вилояти Твер ҷойгир кардааст.
Якҷоя бо Андрей аз шаш то ҳашт ғуломи дигар, шаҳрвандони Русия, Белоруссия, Тоҷикистон ва Украина дар асорат буданд. Ду нафари дигар барои хоҳари корфармо кор мекарданд.
Дар шоҳроҳи Волоколамск мошине хостааст пеши роҳи таксиро бигираду нагузорад ҳаракат кунад, вале ронандаи таксӣ тавонистааст аз мошини таъқибкунанда халос шавад.
Ронанда Андрей Жилтсовро ба Маскав бурд ва ба дӯстонаш супурд. Жилтсов барои эҳтиёт маҷбур аст, ки аз корфармои пешинаш пинҳон шавад. Ӯ дар бораи 4 сол пеш рабуда шуданаш ба полис ариза навиштааст.
То ҳол дар бораи таҳқиқоти пулис чизе гуфта намешавад ва ҳамчунин маълум нест, ки ин корфармо чаро дар баробари шаҳрвандони хориҷӣ шаҳрвандони Русияро низ ба кор даъват намуда, ба асорат мегирифтааст.
Ба ин монанд чанд шаҳрванди тоҷик аз ҷониби баъзе шаҳрвандони Русия ба минтақаҳои дурдасти ин кишвар даъват шуда, шиносномаҳояшонро мегирифтаанд ва бо ин тариқ солҳои тӯлонӣ ҳамчун асир ба он корфармо кор мекарданд, ки бо кумаки шаҳрвандони Тоҷикистон ёфт шуда ба ватан фиристода шуданд.
