Имрӯз, 9-уми май дар Майдони Сурхи шаҳри Маскав режаи ҳарбӣ бахшида ба 80-умин солгарди пирӯзии Иттиҳоди Шӯравӣ дар Ҷанги Бузурги Ватанӣ баргузор гардид.
Дар ин чорабинӣ, ки ҳамасола баргузор мешавад, намояндагони зиёда аз 30 кишвар, аз ҷумла роҳбарони Чин, Тоҷикистон, Қазоқистон, Узбекистон, Қирғизистон ва бархе кишварҳои африқоӣ ва арабӣ ширкат карданд.
Раисиҷумҳури Чин Си Ҷинпин дар остонаи сафараш ба Русия, ҷомеаи ҷаҳониро ба ҳифзи ҳақиқати таърихии Ҷанги Дуюми Ҷаҳонӣ ва нақши ҳалкунандаи Чин ва Шӯравӣ дар шикасти фашизм даъват кард. Ӯ ҳамчунин бар зарурати риояи муколама, шарикӣ ва манфиати мутақобила дар муносибатҳои байналмилалӣ таъкид намуд.
Дар ин режаи ҳарбӣ бори аввал аст Русия ҳавопаймоҳои бесарнишинеро, ки дар ҷанги Украина истифода мешаванд, ба намоиш гузошт. Аз ҷумла, паҳподҳои Шоҳид-136 сохти Эрон, ки барои зарбаҳои амиқ дар қаламрави Украина истифода мешаванд, дар ин Майдони Сурх намоиш дода шуд.
Гуфта мешавад, ин бесарнишинҳои эроние, ки Русия ба намоиш гузошт, нақши муҳим дар ҷанги Русия ва Украина бозӣ мекунанд ва қаблан дар ҳамла ба зерсохторҳои энергетикӣ ва ҳамчунин ба нерӯҳои низомӣ дар майдонҳои ҷанг истифода шудаанд.
Иттиҳоди Аврупо, Бритониё ва Иёлоти Муттаҳидаи Амрико ба хотири фурӯши ин бесарнишинҳо ба Русия, зидди Эрон таҳрим ҷорӣ кардаанд. Ҷумҳурии исломии Эрон мегӯяд, ки бесарнишинҳои интиҳорӣ (ҳамлагар)-ро қабл аз оғози ҷанг ба Русия фурӯхта буд.
