Дар Душанбе маркази муҳоҷират таъсис меёбад. Ба гуфтаи мақомоти Русия ин марказ кори тартиб ва сабти асноди муҳоҷироне, ки барои кор ба Русия рафтан мехоҳанд осон мекунад.
Ба гуфтаи онҳо, муҳоҷирон пеш аз сафар метавонанд барои гирифтани патент ва сабти ҷои будубошашон аксари аснодро аз инҷо омода ва тақдим кунанд.
Дар бораи таъсиси ин марказ сардори Сарраёсати муҳоҷирати Вазорати умури дохилаи Русия, Валинтина Казакова, ки айни ҳол дар Тоҷикистон қарор дорад, рӯзи 21 апрел зимни нишасти хабарӣ иттилоъ дод.
Казакова тдар нишасти матбуотӣ қайд намуда, ки кушода шудани чунин марказ метавонад аксари мушкилиҳои муҳоҷиронро ҳал кунад, аз ҷумла барасмиятдарории ҳузури муҳоҷиронро дар Русия соддатар хоҳад кард.
Казакова таъкид дошт, ки маркази муҳоҷират танҳо бо салоҳияти худи Тоҷикистон таъсис меёбад.
Ба навиштаи “Sputnik” Тоҷикистон, хонум Казакова афзуда, ки ташхиси тиббии муҳоҷирон ва маълумот дар бораи имкони вуруди онҳо ба қаламрави ин кишварро шарвандони Тоҷикистон метавонанд дар ватани худ гиранд ва ё дақиқ кунанд.
Ба гуфтаи Казакова, ин масъалаҳо ҳоло аз ҷониби мақомдорони ду кишвар дар ҳоли баррасӣ қарор дорад ва дар ояндаи наздик натиҷаи он маълум хоҳад шуд.