Гузоришгарони бидуни марз (RWB) бо нашри Шохиси озодии матбуот Тоҷикистонро дар қатори 30 кишваре, ки вазъи матбуоташон “бисёр бад” гуфта мешавад, ҷой додааст.
Шохиси озодии матбуоти RWB имрӯз, 3-уми май дар “Рӯзи ҷаҳонии озодии матбуот” нашр гардид.
Гуфта мешавад, соли гузашта Тоҷикистон дар қатори кишварҳое буд, ки вазъи матбуоташон “душвор” ба ҳисоб мерафт, аммо имсол яку якбора то мақоми 153-ум поин оварда шуд. Ҳоло Тоҷикистон дар баробари Русия, Белорус, Чин, Кореяи Шимолӣ, Эрон, Туркия, Арабистони Саудӣ, Сурия ва ғайра ҷойгир карда шудааст.
Афғонистони ҳамсоякишвар, ки ҳоло дар онҷо зимоми қудратро Толибон дар даст доранд, дар мақоми 152-ум, яъне як зина болотар аз Тоҷикистон қарор дорад.
Коршиносон то ин ҳад пойин рафтани мақоми Тоҷикистонро дар Шохиси озодии матбуот ба шиддат ёфтани саркӯби дигарандешон, таъқибу фишор ва ҳатто боздошту зиндонӣ кардани хабарнигорон аз ҷониби мақомоти ин кишвар рабт медиҳанд.
Ёдовар мешавем, ки мақомоти Тоҷикистон дар як соли охир чанд тан аз рӯзноманигорону блогерони шинохтаро бо иттиҳомоти сохта барои солҳои тӯлонӣ равонаи зиндон кард. Хуршед Фозилов, ки дертар бо иттиҳоми сохта, яъне узвият дар созмонҳои мамнӯъ боздошт шуд, ҳоло дар боздоштгоҳ мунтазири мурофиа ва ҳукми додгоҳ аст.