Сафари вазири дифои Тоҷикистон ба Эрон

Вазири дифои Тоҷикистон Шералӣ Мирзо бо даъвати расмӣ озими Эрон шуд. Вазири дифои Тоҷикистон дар ҷараёни ин сафар бо мақомоти расмии Эрон масоили густариши ҳамкориҳои ду кишварро дар бахши низомӣ мавриди баҳсу баррасӣ қарор хоҳад дод.

Сухангӯи Вазорати дифои Тоҷикистон Фаридун Маҳмадализода эълом дошт, ки сафари расмии вазири дифоъ аз имрӯз 5 апрел оғоз меёбад ва дар Теҳрон мулоқоти вазири тоҷик бо мақомоти сиёсӣ ва низомии Эрон барномарезӣ шуда аст. Аз ҷумла ду ҷониб масоили ҳамкорӣ дар бахши омода кардани кадрҳо ва гузаронидани тамринҳои низомии муштарак, табодули иттилоот, омӯзиш аз таҷрибаҳои ҳамдигар ва ғайраро мавриди гуфтугӯ қарор хоҳанд дод.

"Азия Плюс" бо такя ба сухангӯи Вазорати дифои Тоҷикистон қайд кард, ки диққати асосӣ дар ин гуфтугуҳо рӯи муборизаи муштараки ду кишвар бар зидди терроризм ва экстремизм нигаронида мешавад.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.