10-уми июни соли ҷорӣ Сафорати Амрико дар Душанбе дар саҳифаи фейсбукияш эълон кард, шаҳрвандоне, ки барои гирифтани раводиди донишҷӯии навъи F ё М муроҷиат мекунанд, гаравпулии раводидро пардохт намекунанд.
Ин тавзеҳ дар ҳоле нашр мешавад, ки барномаи “Visa Bond Pilot Program” ё гаравпулӣ барои баъзе довталабони раводиди Амрико аз моҳи августи соли 2025 оғоз гардида, баъдан ба як қатор кишварҳо густариш дода шуд. Тибқи ин барнома, баъзе муроҷиаткунандагони раводидҳои сайёҳӣ ва тиҷоратии навъи B1/B2 метавонанд муваззаф шаванд аз 5 ҳазор то 15 ҳазор доллари амрикоӣ гаравпулӣ супоранд. Маблағ пас аз риояи шартҳои раводид ва тарки саривақтии ИМА баргардонида мешавад.
Сафорати Амрико таъкид кардааст, ки ин талабот ба донишҷӯёни дорои раводидҳои таҳсилии F татбиқ намегардад. Қаблан низ барои кишварҳое, ки ин барнома ҷорӣ шудааст, мақомоти амрикоӣ шарҳ додаанд, ки дорандагони раводидҳои F ё M (таҳсилӣ) ва инчунин баъзе барномаҳои мубодилавии J аз пардохти гаравпулӣ озод мебошанд.
Донишҷӯён мегӯянд, ки ин имтиёз барои садҳо довталаби тоҷик, ки қасди таҳсил дар донишгоҳҳо ва муассисаҳои таълимии Амрикоро доранд, муҳим аст.
Бо вуҷуди ин, шаҳрвандоне, ки барои гирифтани раводидҳои сайёҳӣ ё тиҷоратии B1/B2 муроҷиат мекунанд, бояд пеш аз мусоҳиба шартҳои ҷории раводидиро аз манбаъҳои расмии Амрико санҷанд.
