Шаш созмони ҳуқуқӣ бо нашри изҳороти якҷоя аз мақомоти Тоҷикистон талаб карданд, ки даст аз фишору боздошти пайвандони мухолифон бардоранд.
Дар изҳороти якҷояи Бунёди “Бузургмеҳр”, Ассотсиатсияи муҳоҷирони Осиёи Марказӣ, Маркази ҳуқуқи башар, Кумитаи наҷоти гаравгонҳо ва маҳбусони сиёсии Тоҷикистон, “АЛГА УЗБЕКИСТОН” ва “Интихоб” гуфта мешавад, ки мақомоти Тоҷикистон даҳҳо нафар аз пайвандони мухолифонро, баъд аз тазоҳуроти рӯзҳои 28 ва 29-уми сентябр, ки зидди сафари Эмомалӣ Раҳмон ба Олмон баргузор шуд, боздошт кардаанд.
“Тибқи иттилои мустақим аз наздикони қурбониён, боздоштҳо бидуни пешниҳоди ягон ҳуҷҷат сурат мегиранд. Шахсоне, ки ба мақомоти ҳифзи ҳуқуқ бурда мешаванд, мавриди муносибати дағалона, таҳдид, шантаж ва таҳқир қарор мегиранд. Дар миёни боздоштшудаҳо як пирамарди 81-сола ва кӯдаки якунимсола низ ҳаст“, – омадааст дар изҳорот.
Ин созмонҳои мудофеи ҳуқуқи башар мегӯянд, ки мақомоти Тоҷикистон як навъи ҷазои коллективиро, ки бо номи “Sippenhaft” машхур аст ва тибқи он тамоми оила барои кирдорҳои аъзоёни алоҳидаи оила чавобгар аст, аз нав зинда кардаанд. Усули “Sippenhaft” дар Олмони фашистӣ васеъ истифода мешуд.
Дар охир ин шаш созмон аз тамоми ҷомеаи пешрафтаи ҷаҳонӣ, созмонҳои ҳуқуқи башар ва намояндагони корпусҳои дипломатӣ дар Тоҷикистон даъват намудаанд, ки барои озод кардани шаҳрвандони бегуноҳ чораҳои фаврӣ, воқеӣ ва зарурӣ андешанд.
Ёдовар мешавем, ки мақомоти Тоҷикистон баъд аз тазоҳуроти мухолифон дар шаҳри Берлин ва бо тухм задани мошини ҳомили Эмомалӣ Раҳмон, даҳҳо нафар аз пайвандони дуру наздики аъзои Ҳаракати сиёсии “Гурӯҳи 24, Паймони миллии Тоҷикистон ва фаъолони дигарро боздошт карда бо худ бурдаанд, ки то ҳол аз баъзеи боздоштшудаҳо хабаре нест.
Мақомоти қудратии Тоҷикистон то ҳол ин боздоштҳои густардаро расман шарҳ надодаанд. Вале мухолифон мегӯянд, чун Раҳмон дар ҳеч сафаре мисли сафараш ба Олмон мавриди ҳамлаи мухолифонаш қарор нагирифта буд, мехоҳад аз хонаводаи онҳо “қасос” бигирад.
Ба гуфтаи худи мухолифон ва фаъолон, мақомоти кишвар вақти боздошти пайвандонашон гуфтаанд, ки чаро онҳо президентро диктатор гуфта, ба мошинаш бо тухм задаанд ва фишор меоранд, ки мухолифони дар хориҷбуда ба кишвар баргарданду бахшиш пурсанд.
