Бар асари таркиш дар як нуқтаи фурӯши гази моеъ дар ноҳияи Қаршии вилояти Қашқадарёи Узбекистон 6 нафар ҷон бохта, 5 тани дигар ҷароҳат бардоштаанд.
Бино ба иттилои Вазорати ҳолатҳои фавқулодаи Узбекистон, ҳодиса рӯзи 8-уми июн рух додааст. Хабар дар бораи таркиш соати 13:50 ба мақомоти наҷотрасон ворид шуда, гурӯҳҳои оташнишонӣ ва наҷотбахшон фавран ба ҷойи ҳодиса эъзом шудаанд.
Мақомот мегӯянд, сӯхтор дар муддати кӯтоҳ маҳдуд ва баъдан пурра хомӯш карда шуд. Дар натиҷаи таркиш ва оташсӯзӣ чанд иншоот ва воситаи нақлиёт осеб дидаанд. Аз ҷумла, ду мошини интиқоли газ ва ду зарфи зеризаминии нигоҳдории сӯзишворӣ зарар дидаанд.
Ба гуфтаи масъулон, панҷ нафари маҷруҳ барои дарёфти кумаки тиббӣ ба беморхона интиқол дода шудаанд. Вазъи саломатии онҳо таҳти назорати табибон қарор дорад.
Пас аз ин ҳодиса президенти Узбекистон Шавкат Мирзиёев дастур додааст, ки комиссияи махсуси ҳукуматӣ барои таҳқиқи сабабҳои фоҷиа таъсис дода шавад. Ин комиссия таҳти роҳбарии муовини сарвазир фаъолият карда, вазифадор шудааст сабабҳои ҳодисаро муайян намуда, ба осебдидагон ва наздикони қурбониён кумаки зарурӣ расонад.
Мақомоти Узбекистон мегӯянд, таҳқиқи ҳодиса идома дошта, барои пешгирии чунин фоҷиаҳо дар оянда чораҳои иловагӣ андешида хоҳанд шуд.
