Баъзе донишҷӯёни тоҷике, ки дар донишгоҳҳои хориҷи кишвар таҳсил мекунанду аз сабаби баста будани роҳҳо натавонистанд барои идомаи таҳсил саривақт ба дарсҳои худ ҳузур пайдо кунанд ва дар Тоҷикистон мондаанд, аз набуди барқ ва доштани интернети заифу гарон шикоят доранд.
Ин донишҷӯён, ки бештарашон дар Қирғизистон, Русия, Қазоқистон, Чин, Украина ва Белорус таҳсил мекунанд, мегӯянд, ки аз сабаби коронавирус ва бастани будани роҳҳо наметавонанд ба хориҷ бираванд ва бояд дарсҳояшонро онлайнӣ пайгирӣ кунанд. Вале дар Тоҷикистон интернет гарон асту илова бар он хеле суръати паст дорад.
Дар ҳамин ҳол имрӯз 9 ноябр қариб 20 донишҷӯи донишгоҳҳои хориҷӣ, ки натавонистанд барои идомаи таҳсил ба хориҷ бираванд, дар назди бинои ВКХ ҷамъ омада, талаб намудаанд, ки барои ба хориҷ рафтанашон мусоидат кунанд. Бештари ин донишҷӯён дар суҳбат бо Радиои Озодӣ аз набуди барқ ва гарон будани интернету суръати суст доштанашон шикоят кардаанд.
Аммо дар бештари манотиқи Тоҷикистон лимити барқ ҷорӣ шудааст ва ин донишҷӯён наметавонанд дарсҳои худро ба таври комил пайгирӣ кунанд. Онҳо мегӯянд болои набудани барқ боз интернет хеле гарон аст ва суръати суст дорад. Дар Тоҷикистон 1 гб интернет аз 20 то 30 сомон (2-3 $) нарх дорад ва дар баробари гарон буданаш, суръати бисёр паст дорад.
Дар аксари манотиқи кишвар ҳамарӯза аз соати 8-и субҳ то 17-и шаб барқ қатъ мешавад. Масъулони Ширкати “Барқи тоҷик” набуди барқро ба мушкилоти фаннӣ рабт медиҳанд.
Аз набуди барқ корбарони шабакаҳои иҷтимоӣ шикоят доранд ва мегӯянд дар бештари манотиқи Тоҷикистон лимити барқ ҷорӣ шудааст. Дар суҳбат бо “Аздо ТВ” ҷорӣ шудани лимити барқро сокинон таъйид карданд ва мегӯянд, дар ноҳияҳои дурдаст аз соати 8 то 19 ва дар манотиқи наздик ба марказ аз соати 8 то 17 барқ хомуш карда мешавад.
Назари масъулони ширкати “Барқи тоҷик” дар ин маврид дастрас нест. Дар ҳоле дар манотиқи гуногуни кишвар лимити барқ ҷорӣ шудааст, ки президент Раҳмон дар бисёре аз суҳбатҳояш ваъда карда буд, ки дигар лимити барқ афсона мешавад ва шаҳрвандон аз набуди он танқисӣ нахоҳанд кашид.
Тибқи маълумоти Вазорати маорифи Тоҷикистон, 34 ҳазор донишҷӯи тоҷик дар 30 давлати хориҷӣ таҳсил мекунанд, ки 26 ҳазор нафари онҳо донишҷӯёни донишгоҳҳои Русия мебошанд.
