Сурат: asiaplustj.info

Ҳикматулло Сайфуллозода собиқ сухангӯйи Ҳизби наҳзати исломии Тоҷикистон ва сардабри рӯзномаи “Наҷот” дар зиндон аз беморӣ ранҷ мебарад, хонаводааш мегӯянд, барои табобаташ шароит надоранд, вале масъулини зиндон мегӯянд, Сайфуллозода бемор нест ва мушкиле надорад.

Ҳамсари Ҳикматулло Сайфуллозода, ба Радиои Озодӣ гуфтааст: шавҳараш пас аз гирифторӣ ба коронавирус дар зиндон ҳоли хубе надорад ва хонавода низ бинобар тангдастӣ наметавонанд ба ӯ кумак кунанд.

Рӯзи 13-уми октябр Фароғат Сангинова, ҳамсари Сайфуллозода ба Радиои Озодӣ гуфтааст:

"шаҳварам бемории фишорбаландӣ ва дил доранд, баъди гирифторшавӣ ба коронавирус дар аввали моҳи май то ҳол сиҳатияшон хуб нест. Аз сабаби он, ки ман ҷое кор намекунам ва шароити харидани доруҳоро надорам, он кас дар дохили зиндон азоб мекашад. Дар дохили зиндон ба он кас дору ҳам намедиҳанд".

Сангинова дар идома гуфтааст, шароити молии хонаводааш хуб нест ва ӯ ба танҳоӣ ду писарашро дар хонаи иҷора бузург мекунад. Барои доруҳо дар як моҳ то 200 сомонӣ ва барои табобати ӯ ҳар се моҳ ҳудуди 1500 сомонӣ лозим аст, ки надорем, гуфтааст, ҳамсари Сайфуллозода.

Сардори  Сарраёсати иҷрои ҷазои ҷиноятӣ Мансурҷон Умаров, дар сӯҳбат бо Радиои Озодӣ гуфтааст, вазъи сиҳатии Сайфуллозода хуб аст, вале тастиқ кардааст, ки дар дар маҳбас на ҳама доруҳо дастрас мебошад.

Умаров гуфтааст, дар дохили зиндон танҳо беморони сил ва СПИД ройгон табобат мешаванд ва баъзе маводҳои доруворӣ харидорӣ мешаванд, ки барои он аз сӯи ҳукумат маблағ ҷудо мешавад.

"Аммо на ҳама доруҳо дар муассисаҳои ислоҳӣ ҳаст, аз ин хотир хешу табори маҳбусони бемор барои онҳо доруҳое, ки инҷо нест, мефиристанд", - мегӯяд, Умаров.

Вале наздикони маҳбусон гуфтаҳои Умаровро рад мекунанд, ба гуфтаи онҳо дар зиндон барои зиндониён ҳеч навъи доруро ройгон намедиҳанд.

Умаров гуфтааст, агар воқеан хонаводаи Сайфуллозода имкони харидани доруҳои ӯро надоранд, онҳо омодаанд то ҳадди тавон ба ӯ маводи доруворӣ кумак кунанд.

Ҳикматулло Сайфуллозодаи 70-сола дар доираи парвандаҳои марбут ба ҳаводиси моҳи сентябри соли 2015 боздошт ва баъдан барои 16 сол равонаи зиндон шуд. Мақомот он сол Ҳоҷӣ Ҳалим, муовини вазири дифоъро ба ташкили ошӯб ва Ҳизби наҳзати исломии Тоҷикистонро ба тарҳрезӣ ва сармоягузории он айбдор карданд. Чизе, ки раҳбарияти ҳизб дар хориҷа борҳо рад намудааст.

Фароғат Сангинова, ҳамсари Сайфуллозода мегӯяд, шавҳараш одами эҷодкор буд ва ба ягон ошубу ҷиноят рабт надорад. Ӯ мехоҳад ҳукми шавҳараш бозбинӣ ва аз зиндон озод шавад.

Аз оғози моҳи май ва баъди он ки мақомот мавҷудияти коронавирусро тасдиқ карданд, 11 маҳбус бо нишонаҳои ин беморӣ фавтидаанд. Масъулони Идораи зиндонҳо гуфтанд, марги маҳбусон аз илтиҳоби шуш аст, на коронавируси нав.

Пайвандони чанде аз маҳбусон моҳи май бо ирсоли номае ба Созмони ҷаҳонии тандурустӣ хостори беҳбуд бахшидани вазъ дар зиндонҳои Тоҷикистон ва озодии афроди гуноҳашон "сабук" ва аз 50-сола боло шуданд. Мақомоти Тоҷикистон  дар он вақт дар посух ба ин даъватҳо гуфтанд, вазъият ба андозае нест, ки наздикони маҳбусон тасвир мекунанд.

Бино ба гуфтаи баъзе пайвандони зиндониён, баъд аз эълони пандемия дар Тоҷикистон масъулони зиндонҳо барои зиндониён ва наздиконашон маҳдудиятҳо ҷорӣ намуданд. Аз ин рӯ, хонаводаи аксари маҳбусон шикоят доранд, ки моҳҳост аз ҳоли маҳбусонашон хабаре надоранд ва мақомот пандемияро баҳона карда намегузорад вохӯрие анҷом ёбад то аз ҳоли онҳо огоҳ шаванд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.