Бархе аз сокинони шаҳри Душанбе аз сифати гӯшти ба фурӯш гузошташуда ва муносибати баъзе гӯштфурӯшон ҳангоми хариду фурӯш изҳори норозигӣ мекунанд.
Дар як навори видеоие, ки дар шабакаҳои иҷтимоӣ нашр шудааст, як шаҳрванд аз сифати гӯшти харидааш шикоят карда, мегӯяд, ки фурӯшанда гӯшти интихобкардаи ӯро надодааст. Ӯ аз мақомоти масъул хостааст, ки фаъолияти гӯштфурӯшонро бештар назорат кунанд, то ҳуқуқи истеъмолкунандагон ҳифз гардад.
Дар зери ин навор дигар шаҳрвандон низ аз таҷрибаҳои монанди худ ҳангоми хариди гӯшти гов навишта, аз рафтори баъзе гӯштфурӯшон интиқод кардаанд. Бархе аз корбарон чунин амалҳоро “беинсофона” арзёбӣ намуда, гуфтаанд, ки баъзан ба харидорон гӯшти дорои устухони зиёд, чарбии аз ҳад зиёд ё гӯшти сифати паст пешниҳод мешавад.
Сокинон бар ин назаранд, ки барои таъмини шаффофият дар бозор ва баланд бардоштани сатҳи хидматрасонӣ, назорати бештар аз ҷониби ниҳодҳои дахлдор зарур аст.
Гӯшт аз ҷумлаи маҳсулоти гаронарзиш дар кишвар ба ҳисоб меравад ва ба гуфтаи баъзе шаҳрвандон, на ҳама оилаҳо имкони хариди онро доранд. Дар солҳои гузашта мақомоти назоратӣ аз ошкор шудани ҳолатҳои гаронфурӯшӣ дар бозорҳо хабар дода, нисбат ба баъзе фурӯшандагон чораҳои қонунӣ андешида буданд.
Дар ҳамин ҳол, баъзе соҳибкорон ва коршиносони соҳа сабабҳои болоравии нархи гӯштро ба кам шудани саршумори чорво, афзоиши арзиши хӯроки чорво ва дигар хароҷоти вобаста ба парвариши он марбут медонанд.
Ҳамзамон баъзе харидорон мегӯянд, ки дар бозорҳои кишвар миқдори зиёди гӯшти воридотӣ низ ба назар мерасад. Ба гуфтаи онҳо, аксар вақт барои муштариён муайян кардани пайдоиш ва сифати дақиқи гӯшт кори осон нест. Аз ин рӯ, онҳо зарурати назорати беҳтар ва пешниҳоди маълумоти равшан дар бораи манбаи маҳсулотро таъкид мекунанд.
Сокинон аз мақомоти масъул даъват мекунанд, ки барои ҳифзи ҳуқуқи истеъмолкунандагон, беҳтар намудани сифати маҳсулот ва таъмини риояи қоидаҳои савдо дар бозорҳо тадбирҳои муассир андешанд.
