Собиқ раиси шаҳри Конибодом Абдусалом Тӯхтасунзода ба 12 соли зиндон маҳкум шуд.
Додгоҳи вилояти Суғд ҳукми ӯро рӯзи 30-уми апрел дар як мурофиаи пӯшида содир кардааст ва он ҳанӯз қувваи қонунӣ нагирифтааст.
Бино ба иттилои манобеи Радиои Озодӣ, Тӯхтасунзода ба “қаллобӣ” “дар ҳолати махсусан хавфнок ва ба миқдори махсусан калон” ва “гирифтани пора ба миқдори калон”, ки тариқи гурӯҳи муташаккил сурат гирифтааст, айбдор шудааст.
То ҳол назари худи собиқ раиси Конибодом, пайвандон ва вакили дифоаш дар ин бора дастрас нест ва маълум нест, ки аз болои ҳукм шикоят мебарад ё на. Мақомоти расмӣ низ то ҳол аз боздошти ӯ ва ҳукмаш чизе нагуфтаанд.
Ёдовар мешавем, ки Абдусалом Тухтасунзода пас аз се соли раисӣ дар моҳи январи соли ҷорӣ бо далели ба кори дигар гузаштан аз мансаби раиси шаҳри Конибодом барканор ва дар охири моҳи феврал дар Узбекистон дастгир ва ба Тоҷикистон оварда шуд.
Дар баробари Абдусалом Тухтасунзода чанд мақомдори дигар, ки то ҳол номи ду нафари онҳо расонаӣ шудааст, аз ҷумла Суҳроб Умарзода, муовини пешини сардори Шуъбаи корҳои дохилӣ ва Усмон Ҳайдар, мудири собиқи амволи ҳукумати Конибодом низ дастгир шудаанд. То ҳол маъоум нест, онҳо барои чанд сол зиндонӣ гаштаанд.
Боздошти ин афрод баъди ба Конибодом расидани як комиссияи вежа барои таҳқиқи кушторҳои пайиҳам дар охири соли гузашта матраҳ шудааст. Гуфта мешавад, аъзои ин комиссия сохтмони чанд хонаро дар заминҳои обӣ пайдо карда, ба Душанбе гузориш додаанд ва аз онҷо дастур шудааст, ки кори мақомоти Конибодом пурра санҷида шавад, чун онҳо ҳодисаҳои кушторро ҷиддӣ таҳқиқ накардаанд.
