То имрӯз қариб ҳама мақомоти давлатӣ ва додгоҳҳо дар шаҳру навоҳии Тоҷикистон сомонаи расмии худро доранд, аммо қариб, ки аксари онҳо фаъол нестанд.
Имрӯз 30-уми январ Агентии хидмати давлатии назди Президенти Тоҷикистон нишасти матбуотӣ дошт, раҳбари ин ниҳод Ҷумъа Давлатов зимни нишасти матбуотӣ ба арсонаҳо гуфт, ки “дар шашмоҳаи дуюми соли 2024 нақша дорад мониторинги сомонаҳои тамоми мақомоти давлатиро гузаронад.”
Давлатов иддао дорад, ки тамоми сомонаҳои давлатии мақомоти кишварро аз санҷиш мегузаронад, зеро онҳо тибқи қарори ҳукумати кишвар бояд ҳамеша фаъол бошанд ва дастрасӣ ба маълумотро таъмин кунанд.
Ҳукумати Тоҷикистон соли 2017 Қоидаҳои ягона дар мавриди фаъол шудани сомонаҳои расмии идораву вазоратҳоро қабул карда буд ва тамоми ниҳодҳои кишвар вазифадор шуданд, ки ба он амал кунанд.
Гуфта мешавад, ҳадаф аз қабули “Қоидаҳои ягона татбиқи Консепсияи ташаккули ҳукумати электронӣ дар Ҷумҳурии Тоҷикистон ва иҷрои Қонуни Ҷумҳурии Тоҷикистон “Дар бораи ҳуқуқи дастрасӣ ба иттилоот” мебошад.”
Аммо бо вуҷуди он ки ҳама идораву вазоратҳои кишвар сомонаҳои расмии худро доранд, вале аксари кулли онҳо фаъол нестанд ва ё як хабаре аз кадом сафари чанд моҳи қабли Эмомалӣ Раҳмон ва ё мудири ҳамон ниҳодро гузоштаанд.
Аз ҷумла, сомонаҳои додгоҳҳои кишвар вазъи буҳронӣ доранд. Худи ҳамин рӯз, пас аз тафтиш маълум шуд, ки Додгоҳи олии Тоҷикистон охирин матлабашро 26-уми декабри соли 2023 нашр кардааст, аммо сомонаи Додгоҳи шаҳри Душанбе ҳоло фаъол нест ва сомонаи Додгоҳи ноҳияи Шоҳмансур бошад охирин хабарашро 25-уми январи ҳамин сол нашр кардааст.
Вақте мехоҳед ахбори вилояти Хатлонро аз сомонаҳои расмии вилоят ҷустуҷӯ кунед, чизе пайдо намекунед. Сомонаи расмии мақомоти давлатии ин вилотро пайдо кардан мушкил аст, аммо саҳифаи расмии ин вилоят дар Фейсбук нашри охирон матлабаш 24-уми июни соли 2021 аст.
Аз байни сомонаҳои расмии мақомоти давлатӣ вилояти Суғд каме фаъолтар аст, вале сомонаҳои ноҳияҳои ин вилоят ё моҳҳо пеш охирон хабари худро нашр кардаанд ва ё умуман фаъол нестанд.
