Тоҷикистон мавқеи худро дар радабандии ҷаҳонии суръати интернет беҳтар кард.
Тибқи маълумоти охирини радабандии байналмилалии Speedtest Global Index барои моҳи марти соли 2026, Тоҷикистон аз рӯйи суръати интернети ноқилӣ миёни 153 кишвар дар зинаи 117-ум қарор гирифт. Ин нишондиҳанда нисбат ба моҳи гузашта чор зина боло рафтааст.
Суръати миёнаи интернет дар кишвар ба 45,10 Мбит/с барои боргирӣ ва 38,30 Мбит/с барои боргузорӣ расидааст, ки беҳтарин натиҷа дар панҷ соли охир арзёбӣ мешавад.
Қобили зикр аст, ки соли 2023 барои соҳа душвортарин давра ба ҳисоб мерафт он вақт суръати интернет ба 26,84 Мбит/с коҳиш ёфта, Тоҷикистон то зинаи 133-юм поин рафта буд. Аммо аз соли 2024 сар карда, тамоюли мусбат ба назар мерасад ва дар давоми ду сол мавқеи кишвар 16 зина беҳтар шудааст.
Бо вуҷуди ин, дар радабандии ахир маълумоти марбут ба интернети мобилӣ як сол боз нашр намешавад.
Дар муқоиса бо кишварҳои дигари Осиёи Марказӣ, Узбекистон пешсаф боқӣ монда, Қазоқистон ва Қирғизистон низ нишондиҳандаҳои нисбатан баланд доранд. Туркманистон дар ин гузориш зикр нашудааст.
Дар сатҳи ҷаҳонӣ бошад, Сингапур бо фарқияти назаррас пешсаф буда, баъдан Имороти Муттаҳидаи Арабӣ ва Ҳонконг дар ҷойҳои дуюм ва сеюм қарор доранд.
Новобаста аз каме беҳтар шудани суръати интернет, бисёре аз истифодабарандагон дар Тоҷикистон ҳанӯз аз сифати пасти он, махсусан интернети мобилӣ изҳори нигаронӣ мекунанд. Коршиносон таъкид мекунанд, ки нишондиҳандаҳои оморӣ на ҳамеша таҷрибаи воқеии истифодабарандагонро, бахусус дар минтақаҳои дурдаст, пурра инъикос менамоянд.
