Шаби 7-уми ба 8-уми май расонаҳо аз рух додани даргириҳо ва табодули оташ дар тангаи Ҳурмуз хабар доданд. Бино ба гузоришҳо, дар ин ҳодиса чанд киштӣ ва минтақаҳои соҳилии Эрон мавриди ҳадаф қарор гирифтаанд.
Шомгоҳи панҷшанбе расонаҳои эронӣ аз шунида шудани садои инфиҷорҳо дар Бандараббос ва ҷазираи Қишм хабар доданд. Баъдтар хабаргузории “Форс”-и Эрон гуфт, ки садои инфиҷорҳо ба сабаби даргирӣ бо дифои ҳавоии бо ду ҳавопаймои амрикоӣ будааст.
Пас аз ин ҳодиса, Қароргоҳи марказии Хотамуланбиё маркази идораи ҷанги Эрон бо нашри изҳорот Иёлоти Муттаҳидаи Амрикоро ба вайрон кардани оташбас муттаҳам кард. Ин ниҳод иддао намуд, ки ба як киштии нафтии Эрон дар наздикии бандари Ҷаск аз ҷониби Амрико мавриди ҳамла қарор гирифт. Ин ниҳод ҳамчунин гуфт, ки нерӯҳои эронӣ ба ин ҳамлаҳо посухи низомӣ додаанд.
Аммо Фармондеҳии марказии Амриок зимни нашри изҳороте Эронро ба нақзи оташбас муттаҳам карда, гуфт, ки нерӯҳои дарёии ин кишвар ба сӯи киштиҳои низомии Амрико дар тангаи Ҳурмуз мушак ва паҳпод партоб карданд.
Дар ҳамин ҳол, президенти ИМА Доналд Трамп изҳор дошт, ки оташбас миёни ду кишвар ҳанӯз побарҷо боқӣ мемонад. Ӯ ҳамчунин таъкид кард, ки Эрон бояд ҳарчи зудтар ба созиш бирасад ва тавофуқномаро имзо кунад, дар акси ҳол бо фишори сахттари низомӣ рӯ ба рӯ хоҳад шуд.
Ба гузориши расонаҳо, ҳоло вазъият дар минтақаи Ҳурмуз ҳассос боқӣ монда, то ҳол ҳеҷ як аз иддаоҳо ба таври мустақил тасдиқ нашудаанд, ки аввал кӣ оташ кушодааст.
