10-уми декабри соли ҷорӣ гурӯҳе аз фаъолон бо талаби озодии Дилмурод Эргашев ва Абдуллоҳи Шамсиддин дар назди бинои кор бо муҳоҷирони шаҳри Дортмунди Олмон ҷамъ омаданд.
Дар ин тазоҳурот фаъолони ҳуқуқибашарӣ ва ҷомеаи шаҳрвандии Олмон, инчунин фаъолони тоҷики муқими ин кишвар ширкат доштанд.
Фарҳод Одинаев, фаъоли тоҷик, ки дар ин тазоҳурот ширкат дошт, дар суҳбат бо Azda.tv гуфт, ки ҷамъомадагон аз мақомоти Олмон талаб доранд, то барои озод намудани Дилмурод Эргашев ва Абдуллоҳи Шамсиддин талош намуда, онҳоро ба Олмон баргардонанд.
Ёдовар мешавем, ки мақомоти Олмон 6-уми ноябри соли 2024 узви Ҷунбиши ислоҳот ва рушди Тоҷикистон Дилшод Эргашевро, ки аз соли 2011 дар Олмон ба сар мебурд ва дар эътирозҳои осоишта алайҳи режими Эмомалӣ Раҳмон фаъолона ширкат кардааст, тариқи Туркия ба Тоҷикистон истирдод карданд.
Пас аз истирдод ин фаъолро кормандони Кумитаи давлатии амниятии миллии Тоҷикистон дар фурӯдгоҳи Душанбе боздошт карда, барои 2 моҳ ба ҳабси пешакӣ гирифтанд. Маълум нест Дилмурод ба кодам моддаи Кодекси ҷиноии кишвар гумонбар мебошад.
Эргашев дар остонаи ихроҷаш, 5-уми ноябри соли ҷорӣ қасди худкушӣ карда, рагҳои дасту пойи худро бурида буд ва ба эҳтимоли зиёд дар Тоҷикистон мавриди шиканҷа қарор гирифта, дар шифохона бистарӣ гашт.
Пеш аз Дилмурод мақомоти Олмон 18-уми январи соли 2023 Абдуллоҳи Шамсиддин, писари узви аршади ҲНИТ Шамсиддини Саидро аз Олмон ба Тоҷикистон ихроҷ кард. Гуфта мешавад, Абдуллоҳ пас аз ихроҷ аз Олмон дар Фурӯдгоҳи байналмилалии шаҳри Душанбе тавассути мақомоти тоҷик боздошт ва ба ҷои номаълум бурда шуд.
Дертар 29-уми марти соли 2023 Додгоҳи ноҳияи Синои шаҳри Душанбе ӯро бо моддаи 307 қисм 1-и Кодекси ҷиноятии Тоҷикистон гунаҳкор дониста, ба ҳафт соли зиндон маҳкум кард. Созмонҳои ҳуқуқи башар ва пайвандонаш сабаби аслии боздошт ва ҳукми зиндони Абдуллоҳро ба фаъолиятҳои сиёсии падараш рабт медиҳанд.
Инчунин мақомоти ин кишвар Билол Қурбоналиев, узви фаъоли “Гурӯҳи 24”-ро ба Тоҷикистон ихроҷ карда буд, ки баъдан ӯ ба 10 соли зиндон маҳкум шуд.
Гуфта мешавад, бар иловаи эътирозҳо борҳо созмонҳои байналмилалӣ, фаъолони олмонӣ ва тоҷик аз мақомоти расмии Тоҷикистон раҳоии Дилмурод ва Абдуллоҳро талаб кардаанд.
Ҳомиёни ҳуқуқи башар мегӯянд, ки амалкарҳои Олмон хилофи қонунҳои байналмилалӣ аст, ки баргардонидани афродро ба кишварҳое, ки дар он ҷо шиканҷа ё таъқиб онҳоро таҳдид мекунад, манъ мекунад.
