Пас аз ҳамлаҳои густардаи Исроил ба Навори Ғазза ҳазорон нафар дар аксар кишварҳои дунё бо талаби таваққуфи ҷанг таҷаммуъ карданд.
Рӯзи шанбеи гузашта дар шаҳри Варшаваи Лаҳистон садҳо нафар, аз ҷумла чеҳраҳои шинохтаи синамо, фаъолони маданӣ, бархе аз созмонҳо ва ҷамъиятҳои ҳомии ҳуқуқ ба ҷонибдорӣ аз мардуми Ғазза роҳпаймоӣ карданд.
Тазоҳургарон бо шиорпартоии худ аз Исроил хостанд, ки куштани мардуми осоиштаро дар Ғазза бас кунад ва инчунин ба ворид шудани кумакҳои башарӣ ба аҳолии зарардида иҷозат диҳад.
Гуфта мешавад, ба ин монанд дар дигар шаҳрҳои бузурги Лаҳистон, аз ҷумла Краков ва Познан чунин тазоҳуроте низ доир шуд. Мақомоти ин кишвар ба фарқ аз дигар кишварҳои аврупоӣ ба чунин роҳпаймоиҳои осоишта ба ҷонибдорӣ аз мардуми Ғазза ва маҳкум кардани ҳамлаҳои Исроил иҷозат доданд.
Ҳамзамон рӯзҳои шанбе ва якашанбе дар Бритониё, Олмон, Фаронса ва дигар кишварҳо таҷаммуъот баргузор шуд. Бино ба иттилои пулиси Лондон, шумори тазоҳуркунандагони рӯзи шанбе дар пойтахти Бритониё ҳудуди 100 ҳазор тахмин зада мешавад.
Инчунин расонаҳо гузориш медиҳанд, ки 100 узви Конгресс ва беш аз 60 бозигар ва чеҳраҳои саршиноси Ҳолливуд бо ирсоли нома ба Ҷо Байден, раисҷумҳури Амрико ҳамлаҳои Исроил ба Ғаззаро маҳкум карда, хостори таваққуфи ин ҷанг шудаанд.
Гуфта мешавад, тазоҳуроти ҳамсон дар ҳимоят аз мардуми Ғазза ва талаби таваққуфи ҷанг дар кишварҳои Босния, Австралия низ баргузор шудааст.
Ба иттилои расонаҳои Олмон, дар муқобил ҳазорон нафар аз муътиризон барои яҳудиситезӣ дар ин кишвар таҷаммуъ карда, аз Исроил дифоъ карданд. Ин гурӯҳ низ дар даст аксҳои гаравгононе, ки аз 7-уми октябр дар дасти ҲАМОС ҳастанд, гирифта, талаб намуданд, ки онҳоро озод кунанд.
Дар ҳамин ҳол имрӯз нишасти вазирони хориҷаи Иттиҳоди Аврупо низ баргузор шуд, ки қазияи Фаланстинро баррасӣ карданд. Гуфта мешавад, вазирони хориҷаи ИА дар ниҳояти нишаст таъкид бар авлвияти расондани кумакҳои инсонӣ ба мардуми Ғазза кардаанд.
Ёдовар мешавем, ки дар пайи ҳамлаи ҲАМОС ба шаҳракнишинони Исроил дар 7-уми октябри соли ҷорӣ то кунун Исроил бевақфа Ғаззаро бомборон мекунад. Тибқи омори Вазорати беҳдошти Фаластин, шумори кушташудагон дар Ғазза ба 5087 нафар расидааст, ки 2055 нафарашон кӯдакон ва 1119 нафари дигарро заонон ташкил медиҳанд. Ба гуфтаи ин фазорати фаластинӣ, шумори захмиён марзи 15 ҳазорро гузашт.
Мақомоти фаластинӣ эълон кардаанд, ки беш аз 1 миллион нафар аз аҳолии Ғазза дар пайи ҳамлаҳои Исроил овора шудаанд ва ҳазорҳо хонаву биноҳои маскунӣ пурра харобу валангор гаштаанд.
Исроил низ эълон кард, ки дар пайи ин даргириҳо то кунун беш аз 1400 нафар кушта шудаанд, ки 308 нафарашон сарбозон ҳастанд ва инчунин беш аз 3 ҳазор нафар захмӣ шудаанд.
