Варзишгари тоҷик Темур Раҳимов дар мусобиқаи ҷудои “Tel Aviv Grand Slam 2022” медали биринҷӣ ба даст овард.
Паҳлавони шинохтаи тоҷик Темур Раҳимов дар вазни +100 кг мусобиқаро аз даври дуюм оғоз карда, Серафим Компаниез аз Исроил ва Стефан Ҳегйӣ аз Австрияро шикаст дод ва ба даври нимфинал роҳ ёфт. Вале ӯ дар нимфинал аз Гурам Тушишвилӣ (Гурҷистон), ки баъдан барандаи медали тиллоӣ дар ин вазн гардид, мағлуб шуд. Темур Раҳимов дар қувваозмоӣ барои ҷои сеюм Энди Грандаи кубагиро шикаст дода, сазовори медали биринҷӣ ва 1500 евро гардид.
Темур Раҳимов соли 2019 дар Гран Прии Марокаш медали биринҷӣ, соли гузашта дар мусобиқаи Grand Slam дар Боку медали нуқра ва дар Абу Дабӣ медали биринҷӣ гирифтааст.
Ба иттилои сомонаи расмии Федератсияи байналмилалии ҷудо (IJF), дар мусобиқаи байналмилали “Tel Aviv Grand Slam 2022”, ки аз 17 то 19-уми феврал дар пойтахти Исроил баргузор гардид, 298 варзишгар (165 мард ва 133 зан) аз 34 кишвар ширкат доштанд. Дар байни 34 кишвар Фаронса ҷои аввал, Тоҷикистон бошад ҷойи 23-юмро ишғол кардаанд.
Дар ин мусобиқа аз варзишгарони тоҷик Сомон Маҳмадбеков (-73 кг), Шодмон Ризоев (-81 кг) ва Ҷаҳонгир Маҷидов (-90 кг) низ ширкат карданд.
Сомон Маҳмадбеков дар ин мусобиқа қувваозмоиро аз даври дуюм оғоз карда, варзишгари бразилягӣ Ҷеферсон Сантос Юниор мағлуб кард. Вале дар даври чорякфинал аз Тоҳар Бутбул (Исроил) ва дар даври тассалобахш аз Игор Вандтке (Олмон) шикаст хӯрда, дар натиҷа мақоми ҳафтумро ишғол кард.
Ду паҳлавони дигари тоҷик, Шодмон Ризоев ва Ҷаҳонгир Маҷидов дар даври аввал аз рақибони худ шикаст хӯрданд.
