Мақомоти Тоҷикистон тасмим доранд дар кишвар маркази логистикӣ барои бастабандӣ ва содироти маҳсулот месозанд.
Тибқи иттилои Вазорати рушди иқтисод ва савдои Тоҷикистон, дар моҳи январи соли ҷорӣ тарҳи сохти маркази логистикӣ барои бастабандӣ ва содироти маҳсулоти кишоварзӣ дар нишасти шӯрои машваратии роҳбарони кишварҳои узви Бонки рушд исломӣ (БРИ) пешниҳод ва баррасӣ шуд.
Нишсати мазкур ба стратегияи ин бонк барои солҳои 2026-2035 ихтисос дода шуда, дар шаҳри Мадинаи Арабистони Саудӣ баргузор гардидааст. Гуфта мешавад, дар ин нишаст аз тарафи Тоҷикистон тарҳҳои дигаре низ пешниҳод шудааст.
Ҳайати Тоҷикистон бо роҳбарии вазири иқтисод Завқӣ Завқизода пешниҳодҳоро оид ба тавсеаи зерсохторҳо, аз ҷумла таъсиси паркҳои технологӣ, ҳимоят аз иқтисоди “сабз”, тавсеаи тавони содиротӣ ва ба вуҷуд овардани мароҳили нави тарҳҳои калони нақлиётӣ, ба монанди тарҳи бузургроҳи “Гулистон – Фархор – Панҷ – Дӯстӣ” пешниҳод намуд.
Гуфта мешавад, тарҳрезии ин бузугроҳ аз солҳои 2010 оғоз гардида, пешбинӣ мешавад то соли 2027 танҳо як бахше аз он ба охир бирасад ва иҷрои комили ин тарҳ ҳоло маълум нест. Маблағгузори аслии ин бузургроҳ Бонки рушди Осиё мебошад.
Ҳамчунин бунёди системаҳои канализатсия дар ноҳияи Панҷ ва афзоиши сармоягузорӣ ба пружаҳои энергетикӣ, аз ҷумла НБО-и “Роғун” дар ин нишаст мавриди баррасӣ қарор гирифтааст.
Масъулони Вазорати иқтисоди кишвар мегӯянд, раиси Бонки рушди исломӣ Муҳаммад Ал-Ҷосир омодагии худро барои густариши ҳамкорӣ ва афзоиши маблағгузорӣ ба тарҳҳои авлавиятдошта барои Тоҷикистон изҳор доштааст.
Ба иттилои расмӣ, аз замони оғози ҳамкории Ҷумҳурии Тоҷикистон дар соли 1996 бо БРИ, ин Бонк беш аз 900 миллион доллар ба иқтисоди Тоҷикистон сармоягузорӣ кардааст. Ин маблағҳо ба тарҳҳое дар соҳаҳои энергетика, нақлиёт, маориф ва тандурустӣ равона карда шудаанд.
Аммо, ба гуфтаи мунтақидони Ҳукумат, ингуна маблағгузориҳо ба кисаи як идда аз масъулону наздиконашон ва ширкатҳои марбут ба хонаводаи раисҷумҳур мераванд ва инҳо на сабаби ободонӣ, балки қарздор шудани кишвар мешаванд.
