Тоҷикистон талош дорад, ки бархе созмонҳои молии давлати Кувайт дар иқтисодиёти кишвар сармоягузорӣ кунанд.
Вазорати корҳои хориҷии Тоҷикистон хабар дода, ки Зубайдулло Зубайдзода, сафири Тоҷикистон дар Кувайт 15-уми октябр бо ҳадафи ҷалби сармоягузорони хориҷӣ бо Валид Шимлон ал-Баҳар, мудири кулли Фонди кувайтии рушди иқтисодиёти араб мулоқот кардааст.
Гуфта мешавад, дар мулоқот ҷонибҳо масъалаҳои марбут ба ҳолат ва дурнамои ҳамкорӣ, иштироки Фонди кувайтии рушди иқтисодиёти араб дар маблағгузории лоиҳаҳои муҳимми кишвар ва дигар мавзуъҳои мавриди эҳтимоми муштаракро баррасӣ карданд.
Пеш аз ин рӯзномаи электронии ал-Бурсаи Кувайт иттилоъ дода буд, ки ҷониби Тоҷикитсон ва Кувайт дар дидорҳои қаблии худ “роҳҳои таҳкими ҳамкории муштараки ду кишвар ва сармоягузории хориҷӣ, ки рушди ду кишварро дастгирӣ мекунад, баррасӣ шуд.”
Ба гуфтаи бархе шахсони огоҳ, сафири Тоҷикистон дар давлати Кувайт ба хотири ихтисос додани баъзе пулҳо ба тарҳҳои иқтисодӣ дар зодгоҳаш ноҳияи Айнӣ ба сӯиистифода аз мақом муттаҳам мешавад. Вале бо вуҷуди ин, вай яке аз фаъолони дипломатии Тоҷикистон дар байни дигар сафирҳои кишвар аст, ки барои ҷалби сармоя ба иқтисодиёти Тоҷикистон талошҳои зиёдеро анҷом медиҳад.
