Тоҷикистон ҳеч гоҳ аз заминҳое, ки ба таври қонунӣ ба ӯ тааллуқ доштанд даст нахоҳад кашид

Вазорати умури хориҷаи Тоҷикистон бархе ҷузъиёти музокироти дирӯзаи вазирони хориҷаи Тоҷикистон ва Қирғизистонро мунташир кард.

Тибқи навиштаи "Азия Плюс" вазорати умури хориҷаи Тоҷикистон бори дигар таъкид кард, ки гуфтугӯи телефонӣ бо ташаббуси ҷониби Қиргизистон сурат гирифта ва роҳбарони ниҳодҳои умури хориҷа вазъи мушкилеро, ки 28-29 апрели 2021 дар минтақаҳои марзи ду кишвар ба вуҷуд омада буд ба тафсил баррасӣ карданд.

Сироҷиддин Муҳриддин таъкид кард, ки Тоҷикистон мусаммам аст тавассути музокирот, ҷустуҷӯи роҳҳои ҳалли ба ҳам қобили қабул ва бо назардошти манфиатҳои миллии худ, масоили марбут ба делимитатсия ва демаркататсияи марзи давлати бо Қирғизистонро тадриҷан ҳал намояд.

Ҳамзамон вай гуфт, ки Тоҷикистон ҳечгох аз заминҳое, ки аслан ва ба таври қонунӣ ба ӯ тааллуқ доштанд даст нахоҳад кашид, гуфт департаменти иттилоотии вазорати умури хориҷаи Тоҷикистон.

Дар ҷараёни гуфтугӯ вазирон бар аҳмияти ҳалли ҳамаи масоили марзи давлатӣ аз роҳи гуфтушунидҳо таъкид карда кайд намуданд, ки ба кушиши иғвоангезии ҷонибҳои алоҳидаи манфиатдор, ки боиси шиддат гирифтани минбаъдаи вазъият мешавад роҳ надиҳанд.

Вазирон таъкид карданд, ки набуди эътимод ба минтақаҳои назди марзӣ метавонад боиси ҳаводиси нав гардад ва оқибатҳои ҷиддӣ аз ҷумла талафот дар байни аҳолии осоиштаи ду давлати ҳамсояро ба бор орад.

Раҳбарони вазоратҳои хориҷаи Тоҷикистон ва Қирғизистон ба тавофуқ расиданд, ки дар ҳалли масоили мураккаби марзи давлатӣ иродаи қавии сиёсӣ зоҳир кардан зарур аст, хулоса мекунад департамент.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.