Ба иттилои расонаҳои хабарӣ, созишнома дар бораи муайянсозии марзи давлатии Тоҷикистону Қирғизистон то ҷашни Наврӯз аз ҷониби президентҳо ба имзо мерасад.
Ба қавли расонаҳо, Камчибек Тошиев, муовини раиси Ҳукумати Қирғизистон ва роҳбари Кумитаи давлатии амнияти миллии ин кишвар изҳор доштааст, ки ҳанӯз ҳам марҳилаи муайянсозии сарҳад идома дорад.
“Созишнома оид ба тамоми хатти сарҳад ба даст омадааст. Ҳоло танҳо ҳудуди 50 километр боқӣ мондааст. Комиссияи давлатии Тоҷикистон оид ба делимитатсия ва демаркатсияи сарҳад дар шаҳри Бишкек қарор дорад. Ман фикр мекунам, ки то охири моҳи январ корҳо ба анҷом мерасанд.” — мегӯяд Қамчибек Тошиев.
Раиси КДАМ-и Қирғизистон изҳори умедворӣ карда, ки то иди Наврӯз президентҳои Тоҷикистону Қирғизистон созишномаро ба тасвиб мерасонанд ва табодули нотаҳо анҷом меёбад.
Тошиев ҳамчунин афзуда, ки “Пас аз имзо гузоштани президентҳо зери созишнома, аз ҷиҳати ҳуқуқӣ ҳамаи корҳои таъйин ва аломатгузории марзи давлатӣ миёни ду кишвар ба анҷом мерасанд.”
Қаблан хабар дода шуда буд, ки Қирғизистон ва Тоҷикистон дар ин маврид тавофуқоти ниҳоиро ба даст овардаанд ва муаянсозии қитъаҳои мавриди баҳс пурра анҷом шудааст. Ба ҳайатҳои ҳукуматии ҳар ду кишвар супориш шуда буд, ки ба раванди таҳияи ҳуҷҷатҳои ниҳоии делимитатсияи сарҳади давлатии ду кишвар оғоз кунанд.
