Мақомоти Қирғизистон тасмим гирифтаанд 170 хонаеро, ки дар натиҷаи табодули қаламрав бо Тоҷикистон ба ҳисоби ин кишвар гузаштаанд, ба сокинони осебдида аз даргириҳои марзӣ тақсим кунанд.
Ба иттилои хабаргузории давлатии “Кабар”, бо истинод ба намояндагии президенти Қирғизистон дар вилояти Бодканд, дар маҷмуъ 213 хона аз Тоҷикистон ба ҷониби Қирғизистон гузаштааст. Аз ин шумор 170 хона барои зиндагӣ муносиб дониста шудааст.
Гурӯҳи кории вилоятӣ масъалаи додани ин манзилҳоро ба шаҳрвандоне баррасӣ кардааст, ки дар даргириҳои солҳои 2021–2022 ду хонаи дар як қитъаи замин ҷойгирбудаашон корношоям шудааст. Қарор аст, хонаҳои аз Тоҷикистон гузашта барои ҳалли масъалаи манзили дуюми ин оилаҳо истифода шаванд.
Роҳбарии гурӯҳи кориро Бақтибек Токсонбоев, муовини аввали намояндаи ваколатдори президенти Қирғизистон дар вилояти Бодканд, бар уҳда дорад. Ӯ ба масъулон супориш додааст, ки тақсими манзилҳо одилона ва мутобиқ ба қонун сурат гирад. Ба гуфтаи мақомоти вилоят, хонаҳо бояд рӯзҳои наздик ба шаҳрвандон супорида шаванд. Дар хабар маҳалли ҷойгиршавии ин 170 хона ва рӯйхати гирандагони онҳо зикр нашудааст.
Гуфта мешавад, ин манзилҳо дар натиҷаи табодули қитъаҳои марзӣ ба Қирғизистон гузаштаанд. Қаблан мақомоти ин кишвар аз сохтмони 257 хонаи нав барои шаҳрвандоне хабар дода буданд, ки манзилҳои пешинаашон пас аз тағйири марз дар қаламрави Тоҷикистон мондааст. Хонаҳои нав дар деҳаҳои Жани-Достук ва Мақсат ва шаҳри Раззоқови вилояти Бодканд сохта шудаанд.
Аммо дар ҷониби Тоҷикистон масъалаи таъмини сокинони кӯчонидашуда бо манзили муносиб қаблан баҳсбарангез шуда буд. Дар гузориши Радиои Озодӣ, ки 14-уми марти соли 2026 нашр шуда буд, чанде аз сокинони Хоҷаи Аълои Исфара гуфта буданд, хонаҳое, ки барояшон дода шудааст, аз манзилҳои пешинаашон бадтаранд.
Сокинон эътироз карда буданд, ки манзилҳое, ки мақомот барояшон додаанд, аз хонаҳои қаблияшон хурдтар ва бетаъмир ҳастанд. Онҳо таъкид карда бқданд, ки аз созиши марзӣ ҷонибдорӣ мекунанд, аммо ба шароити манзилҳои пешниҳодшуда розӣ нестанд.
Ба гузориши “Азия-Плюс” аз 5-уми феврали соли ҷорӣ, раиси ноҳияи Ҷаббор Расулов Олимбек Юлдошзода гуфта буд, ки 13 хонаи сокинони ноҳия ба Қирғизистон ва 36 хонаи ҷониби муқобил ба Тоҷикистон гузаштааст. Ӯ ваъда дода буд, ки арзиши амвол ҳисоб ва ҷуброни сокинон пардохт мешавад.
Ёдовар мешавем, ки рӯзи 13-уми марти соли 2025 Эмомалӣ Раҳмон ва Содир Ҷабборов созишномаи ниҳоӣ дар бораи марзи давлатии Тоҷикистону Қирғизистонро имзо карданд. Тавофуқ табодули чанде аз қитъаҳои наздимарзиро низ дар бар мегирифт. Ҳамон рӯз фаъолияти ду гузаргоҳи марзӣ аз сар гирифта шуд.
То расидан ба созишномаи ниҳоӣ моҳи апрели соли 2021 ва сентябри соли 2022 даргириҳои бузурги хунин дар марзи ду кишвар сар зада буд, ки боиси кушта ва захмӣ шудани садҳо нафар аз ду ҷониб гашта буд. Ва инчунин манзилҳои зиёде хароб гашта буданд.
